Asonekene Marku 14:1-72
-
Asasendote yatesa kushiha Yesu (1, 2)
-
Yesu yamukwita maji a vumba lipema (3-9)
-
Yundase yakunjika Yesu (10, 11)
-
Chizomboka chakasula (12-21)
-
Chiwanyino cha Mwene cha Ufuku (22-26)
-
Yesu kaprofetezele ngwenyi Petulu malitunaye (27-31)
-
Yesu kanalembe ku Ngetesemane (32-42)
-
Yesu yamukwata (43-52)
-
Upatwilo ku chota cha akwa-kuyula A-Yunda (53-65)
-
Petulu yalituna Yesu (66-72)
14 Muze te hikwasala matangwa aali hanga kulingiwe Chizomboka ni Chiwanyino cha Mbolo Kuyishi Futunwiso, asasendote a lutwe ni alongeshi a shimbi te kanafupu uhashi* wa kukwachilamo Yesu ni kumushiha.
2 Mumu o ambile ngwo: “Kanda tumukwata ha mashimbu a chiwanyino, kuchina hanji mukukapwa chizungo-zungo hakachi ka atu.”
3 Muze te Yesu anali ku zuwo lia Semone mukwa-mbumba mu Mbetaniya, yikwiza umwe pwo yoze wapwile ni mulangi wa maji a vumba lipema, a ndando yinji. Iye yazulula mulangi wacho, chocho yaputuka kuzujila e maji ha mutwe wa Yesu.
4 Mumu lia chino, amwe yevwa kupiha mba yaputuka kwamba ngwo: “Mumu liaka pwo yono anakishi maji wano a vumba lipema chize?
5 Mumu te mahasa kulanjisa maji wano, ha ndando yahiana 300 ja ndenariu* ni kuhana mbongo jacho kuli yiswale!” Chocho* yevwila pwo wacho uli.
6 Alioze Yesu yamba kuli ayo ngwenyi: “Mwechenu. Mumu liaka nunamupinjisa? Chuma chize alinga hali yami chili chipema chinji.
7 Mumu yiswale kali hamwe ni yenu matangwa eswe. Ha shimbu lieswalio munuzanga kwalingila yuma yipema, munuhasa. Alioze yenu, kunuchi kupwa ni yami matangwa eswe.
8 Iye kalinga kulita ni uhashi wenyi. Halianga kuzujila maji a vumba lipema ha mujimba wami, shimbu kanda achingufunda.
9 Pundu ngunanulweze ngwami: Kweswako atu makambujola sango jipema hashi heswe, chuma chino pwo yono alinga, makachambujola hanga akamwiwuluke.”
10 Mba Yundase Ka-Keriote umwe wa kuli e Kumi ni Aali, yaya kuli asasendote a lutwe hanga akunjike Yesu.
11 Muze o achivwile yawahilila, yalakenya kumwaha mbongo ja prata. Mba Yundase yaputuka kufupa uhashi hanga akunjike Yesu.
12 Ha tangwa litangu lia Chiwanyino cha Mbolo Kuyishi Futunwiso, muze akushiha chitapo cha Chizomboka, tumbaji twenyi yamuhula ngwo: “Kulihi unazange hanga tululiekeleko yuma ya Chizomboka?”
13 Chocho iye yatuma aali a kuli tumbaji twenyi, yamba kuli ayo ngwenyi: “Yeenu mu mbonge, mba munulitakana ni umwe lunga yoze unambata mulondo wa meya. Mukaulenu.
14 Mweswamo manjila, hulenu mwenya-zuwo ngwenu: ‘Longeshi kanambe ngwenyi: “Chipatulo cha ngeji kulihi chili hanga yami ngulilemo Chizomboka ni tumbaji twami?”’
15 Iye makanulweza chipatulo chinene cha kwilu cha kululieka kulu. Mwenamo munululiekela yuma.”
16 Chocho tumbaji yaya, yanjila mu mbonge, yawana yuma yeswe ngwe chize Yesu aalwezele. Mba yalulieka Chizomboka.
17 Muze kwapwile chingoloshi, Yesu yaheta ni e Kumi ni Aali.
18 Shimbu te anatwama ku mesa ni kulia, Yesu yamba ngwenyi: “Pundu ngunambe kuli yenu ngwami: Umwe wa kuli yenu unali hamwe ni yami, mangukunjika.”
19 O yaputuka kwivwa chinyengo, mba mutu ni mutu yamuhula ngwenyi: “Shina yami?”
20 Yesu yamba ngwenyi: “Umwe wa kuli yenu Kumi ni Aali yoze unase kwoko ha longa hamwe ni yami.
21 Mumu mwe Mwana-mutu maya kwenyi, ngwe chize chinasonewa hakutwala kuli iye. Alioze lamba kuli mutu yoze makunjika mwe Mwana-mutu! Hapwa kama nyi mutu wacho te kasemukine.”
22 Shimbu te machilia, yanda mbolo, yalemba, yayipalula, mba yamba ngwenyi: “Wenu; mbolo yino yinalumbunuka mujimba wami.”
23 Mba yanda musenge, yalemba, yauhana kuli tumbaji twenyi, o eswe yanwa.
24 Mba yamba ngwenyi: “Vinyu yino yinalumbunuka ‘manyinga jami a usendo’ waze makamwangana mumu hali anji.
25 Pundu ngunanulweze ngwami: Chichi kanwa nawa vinyu nilimwe tangwa, ndo ha tangwa lize mungukanwa vinyu yaha mu Wanangana wa Zambi.”
26 Mba muze hemba miaso ya uhaliso,* yaya ku Mulundu wa Olevwe.
27 Yesu yamba kuli ayo ngwenyi: “Yenu eswe munutalinga mumu lia yami, mumu chinasonewa ngwo: ‘Mungukalamba kafunga, mba mapanga kumakamwangana.’
28 Alioze muze makanguhindwisa, mungutetekela kulutwe lienu ku Ngalileya.”
29 Chocho Petulu yamba kuli iye ngwenyi: “Chipwe ngwe akwetu eswe matalinga, yami chichi katalinga.”
30 Yesu yamba kuli iye ngwenyi: “Pundu ngunambe kuli yena ngwami: Musono, ufuku unowene shimbu ndemba kanda achisanyika kaali, mukalikala yami katatu keswe.”
31 Alioze Petulu yalihalula chikolo kuhiana ngwenyi: “Chipwe ngwe mungufwa hamwe ni yena, nihindu chichi kalikala yena nilimwe tangwa.” Tumbaji eswe no yamba chochene.
32 Chocho o yaheta ku chimwe chihela avuluka ngwo, Ngetesemane. Iye yalweza tumbaji twenyi ngwenyi: “Twamenu hano, shimbu yami ngunayi ni kulemba.”
33 Yaya hamwe ni Petulu, ni Tiangu, ni Yoano. Mba yaputuka kwivwa chinyengo chinji ni kulema mu mbunge.*
34 Yaalweza ngwenyi: “Ngunevu* chinyengo chinji ngwe mungufwa. Salenu hano, nungenu ni kulawola.”
35 Mba muze hasenya ndambu kulutwe, yafulamana yalemba hanga ola yize yikatuke kuli iye, nyi muchilita.
36 Yamba ngwenyi: “Aba,* Tata, kuli yena yuma yeswe muyihasa kulingiwa; chiza kama musenge uno kuli yami. Alioze chilingiwe kulita ni upale we, hi ni upale wami ko.”
37 Yesu yahiluka, yawana tumbaji twenyi te kanapombo. Mba yalweza Petulu ngwenyi: “Semone mu tulo uli nyi? Kumana kuwahashile kununga ni kulawola chipwe ola yimuwika nyi?
38 Nungenu ni kulawola, nungenu ni kulemba hanga nuchine kunjila mu cheseko. Mumu spiritu yinazange, alioze mujimba* ulelu.”
39 Iye yasosoloka nawa, yalemba ni kwamba maliji waze wene.
40 Yesu yahiluka cheka nawa, yaawana kanapombo, mumu meso jo te kanalemenena ni tulo. Kashika o kamwene chize te mamukumbulula.
41 Yahiluka chisuho chamuchitatu yamba kuli ayo ngwenyi: “Wano hi mashimbu ko a kupomba ni kuhwima! Kwahwa! Ola hiyaheta! Talenu! Mwe Mwana-mutu mamukunjika ku moko ja yivulumunyi.
42 Katukenu, tuyenu. Talenu! Mukwa-kungukunjika kanakundama.”
43 Hohene, muze Yesu te anahanjika, Yundase umwe wa kuli Kumi ni Aali yaheta, hamwe ni mbunga yinene ya atu kanambata tutana ni mitondo. Asasendote a lutwe, alongeshi a shimbi ni makulwana e atumine mbunga yacho.
44 Mukwa-kumukunjika kaahele chilayi ngwenyi: “Mutu yoze yami mungwaha mbeju mwenawo, mukwatenu numutwale, numufunge.”
45 Muze te haheta, hazehene Yundase yakundama kuli Yesu, yamwamba ngwenyi: “Longeshi!” mba yamwaha mbeju.
46 Chocho o yamukwata ni kumukasa.
47 Alioze, umwe wa kuli waze apwileho yatomona katana* kenyi, yateta twitwi lia ndungo wa mwata wa asasendote a lutwe.
48 Mba Yesu yamba ngwenyi: “Nweza ni kungukwata ni tutana ni mitondo ngwe nguli chingalwe* nyi?
49 Napwile hamwe ni yenu mu tembele ni kulongesa tangwa ha tangwa, alioze kunwangukwachile. Alioze chino chinalingiwa hanga Yisoneko yimanunuke.”
50 Hazehene tumbaji twenyi yamuhichika, yachina.
51 Umwe mukweze yoze te unazala wika hina lia linyu, yaputuka kukaula Yesu. Chocho o yeseka kumukwata.
52 Alioze iye yatusula hina lienyi lia linyu, yachina uselesele.*
53 Yaatwala Yesu kuli sasendote wa lutwe, mba asasendote eswe akwo, ni makulwana ni alongeshi a shimbi yalikungulula.
54 Petulu yamukaula kanonajila ndo muchima lia yiize ya mwata wa asasendote a lutwe; iye yatwama hamuwika ni ndungo hanga ote kahia.
55 Asasendote a lutwe ni Akwa-Kuyula eswe yafupa uchela hali Yesu hanga amushihe, alioze kauwanyine.
56 Mumu anji ahanyine uchela wa mahuza hakutwala kuli iye, alioze uchela wo te kuwalitele.
57 Chikwo nawa, anji akatukile ni kuhana uchela wa mahuza hakutwala kuli iye ngwo:
58 “Twamuvwile ngwenyi: ‘Mungukapuzula tembele yino yakutunga ni moko ja atu, mba kulutwe lia matangwa atatu mungukatunga yikwo yize kuyishi kutungiwa ni moko ja atu.’”
59 Alioze chipwe ha chikuma chino, uchela wo te kuwalitele.
60 Chocho mwata wa asasendote a lutwe yakatuka mukachi ko ni kuhula Yesu ngwenyi: “Kushi kukumbulula nichimwe nyi? Shina uli ni yimwe yakwamba hakutwala ku uchela wa atu wano hali yena?”
61 Alioze Yesu yanunga ni kuhola kuluu kakumbulwile nichimwe. Mwata wa asasendote a lutwe yamuhula nawa ngwenyi: “Yena uli Kristu Mwana wa Mukwa-Kufumana nyi?”
62 Yesu yakumbulula ngwenyi: “Ewa; munukamona mwe Mwana-mutu kanatwama ku chindume cha Mukwa-Ndundo-Jeswe. Kumunukamumona kaneza ni malelwa a kwilu.”
63 Hohene mwata wa asasendote a lutwe yasuwa mazalo jenyi ni kwamba ngwenyi: “Yela aka nawa tunafupu?
64 Hinwevwa chize anashililika Zambi. Kuchi nwanyonga?”* Ayo eswe yamupatwila ngwo, kanatela kufwa.
65 Mba amwe aputukile kumufwila mate, kumufuka ku meso ni kumumbufula, ni kwamba kuli iye ngwo: “Profeteza!” Hanyima lia kumumbufula, tupita yaya nenyi.
66 Shimbu Petulu apwile mushi mu yiize, umwe wa kuli ana-mapwo akwa-milimo ya sasendote wa lutwe yeza.
67 Iye hakumona Petulu kanoto kahia, wamutalile kanawa ni kwamba ngwenyi: “Ni yena wapwanga hamwe ni Yesu Ka-Nazare.”
68 Alioze, iye yalikala ni kwamba ngwenyi: “Chamunyingikine, chipwe yuma yize unambe chayinyingikine.” Mba Petulu yakatuka, yaya ku unjililo wa yiize.*
69 Mwana-pwo wamumwene, waputukile kwamba cheka nawa kuli waze apwileko ngwenyi: “Yono kali umwe wa kuli ayo.”
70 Cheka nawa, Petulu yalikala. Hakupalika cha mashimbu akehe, atu waze apwileho no yamba ngwo: “Pundu lume, yena uli umwe wa kuli ayo, mumu uli Ka-Ngalileya.”
71 Petulu yaputuka kulikala ni kulishinga ngwenyi: “Mutu yono nunambe yami chamunyingikine!”
72 Hazehene ndemba yasanyika ha chisuho chamuchiali. Mba Petulu yewuluka maliji waze Yesu ambile kuli iye ngwenyi: “Shimbu ndemba kanda achisanyika kaali, mukalikala yami katatu keswe.” Hohene Petulu yevwa chinyengo chinji, yaputuka kulila.
Footnotes
^ Hanji “mana.”
^ Tala Apendice B14.
^ Hanji “yamukanjisa.”
^ Hanji “masamu.”
^ Hanji “kusakalala.”
^ Hanji “mbunge yami yinevu.”
^ Lili liji lia Hepreu hanji Arame lize linalumbunuka ngwo, “Tata!”
^ Chize Alisonekene, “musunya.”
^ Hanji “njangu.”
^ Hanji “chilianyi.”
^ Hanji “ni hina lia muchima wika.”
^ Hanji “Chiyulo chenu chika?”
^ Hanji “senge.”
