Asonekene Marku 16:1-8
-
Yesu yamuhindwisa (1-8)
16 Muze tangwa lia Sambata te hiliapalika, Maria Ka-Mandala, Maria naye ya Tiangu ni Salome yalanda maji a vumba lipema hanga akakwite ha mujimba wa Yesu.
2 Ha tangwa litangu lia poso, yaalimenekena ku fuka muze te tangwa hiliavumbuka.
3 O aliambile umwe ni mukwo ngwo: “Iya matuchijila liwe ku chikolo cha fuka?”
4 Alioze muze ahetwile meso jo, yamona liwe halilangumuna kulu, chipwe ngwe liapwile linene.
5 Muze o anjilile mu fuka, yamona umwe mukweze kanatwama ku chindume, te kanazala mazalo atoma, asuku, chocho yevwa woma.
6 Alioze, mukweze yamba kuli ayo ngwenyi: “Kanda nwivwa woma. Nunafupu Yesu Ka-Nazare yoze ashihile ha mutondo wa lamba. Amuno keshimo, kamuhindwisa. Talenu homa haze anakamusa.
7 Alioze, yeenu nulweze tumbaji twenyi eswe ni Petulu ngwenu: ‘Yesu hanutetekela ku Ngalileya. Kwenako munukamumwena ngwe chize iye ambile kulu.’”
8 O yatuhuka yachina ku fuka, mumu te woma anevu ni kulishimwoka. Kashika, kalwezele mutu niumwe, mumu evwile woma unji.*
Footnotes
^ Kulita ni yisoneko yikulu ya ushindakenyo, Evangelu ya Marku kuyinahu ni maliji a mu versu 8. Tala Apendice A3.
