Asonekene Marku 2:1-28
2 Kulutwe lia matangwa amwe, Yesu yanjila nawa mu Kafwanaume. Chocho sango hakutwala kuli iye yijilimwanga, atu yanyingika ngwo mu zuwo ali.
2 Atu anji akungulukile ku chikolo, chipwe chihela kuchasalileko nawa. Chocho waputukile kwambulwila lie liji.
3 Amunehenene umwe lunga yoze te keshi kwenda, wakumbata kuli malunga awana.
4 Alioze, amu kwapwile atu anji, o kahashile kutwala lunga wacho kuli Yesu. Kashika, yachiza fulumba lia zuwo muze Yesu apwile, yasunwisa chipoya haze te anapombo mukwa-kalepa.
5 Muze Yesu amwene ufulielo wo, yamba kuli mukwa-kalepa ngwenyi: “Mwanami, shili ye hakukonekenayo.”
6 Alioze, alongeshi amwe a shimbi waze apwileko yaputuka kunyonga ngwo:
7 “Mumu liaka lunga yono anahanjika chocho? Iye kanashililika Zambi. Iya mahasa kukonekena shili, shina umuwika, iye Zambi?”
8 Hazehene, Yesu yanyingika yuma yize te ayo ananyongo. Chocho yaahula ngwenyi: “Mumu liaka nunanyongo yuma yino mu mbunge jenu?
9 Chuma chika chashi kwamba, shina kwamba kuli mukwa-kalepa yono ngwami: ‘Shili ye hakukonekenayo,’ nyi kwamba ngwami, ‘katuka anda chipoya che wende?’
10 Alioze, mba nunyingike ngwenu Mwana-mutu kali ni ndundo ja kukonekena shili hano hashi —” iye yamba kuli mukwa-kalepa ngwenyi:
11 Ngunambe kuli yena ngwami, “Katuka, anda chipoya che, yako ku zuwo lie.”
12 Hohene, lunga yakatuka yanda chipoya chenyi yaya kwenyi ni kwenda kulutwe lia atu. Atu eswe yalishimwoka, yahalisa Zambi ni kwamba ngwo: “Kanda tumona kama chuma cha mutapu au.”
13 Cheka nawa, iye yaya ku sesa lia kalunga-lwiji. Mbunga eswe yamukaula, chocho yaputuka kwalongesa.
14 Shimbu te machenda, yawana Levi mwana wa Alefweu te kanatwama ku zuwo lia kufwetela lijimu. Yamwamba ngwenyi: “Pwako kambaji kami.” Iye yakatuka, yamukaula.
15 Kulutwe, muze Yesu te anali mu zuwo lia Levi, akwa-kufwetesa lijimu anji ni yivulumunyi te kanali* hamwe nenyi ni tumbaji twenyi. Mumu anji a kuli ayo, amukawile.
16 Alioze, muze alongeshi a shimbi a ku mbunga ya A-Fwariseu amumwene kanali ni yivulumunyi ni akwa-kufwetesa lijimu, yahula tumbaji twenyi ngwo: “Mumu liaka longeshi wenu anali hamuwika ni akwa-kufwetesa lijimu ni yivulumunyi?”
17 Yesu ha kuchivwa yamba kuli ayo ngwenyi: “Waze ahinduka keshi kufupa ndotolo,* alioze waze ayiza e akumufupa. Yami chejile ni kufupa akwa-ululi, alioze yivulumunyi.”
18 Tumbaji twa Yoano ni tumbaji twa A-Fwariseu apwile ni kulitwamina kulia. O yakundama kuli Yesu yamuhula ngwo: “Mumu liaka tumbaji twa Yoano ni tumbaji twa A-Fwariseu akulitwamina kulia, alioze tumbaji twe keshi kuchilinga?”
19 Kashika Yesu yaakumbulula ngwenyi: “Shina masepa ja sandungi katamba kulitwamina kulia shimbu sandungi uchili hamwe no? Ha shimbu lize sandungi uchili hamwe no, o katambile kulitwamina kulia.
20 Alioze, mukwiza matangwa waze sandungi kechi kapwa hamwe no, mba o makalitwamina kulia ha tangwa liacho.
21 Niumwe mutu yoze wakunukina chihanda cha hina liaha helu lia hina likulu wakuhi. Mumu nyi machilinga, chihanda cha hina liaha muchipula hina likulu, mba chituwa cha hina liacho muchitohwa chinji.
22 Chizechene nawa, niumwe mutu wakulonga vinyu yaha mu tuku jikulu wakuhi. Mumu nyi machilinga, vinyu yaha muyipula tuku jikulu. Iye matokesa ye vinyu ni je tuku. Kashika vinyu yaha, kakuyilonga mu tuku jaha.”
23 Ha tangwa lia Sambata, Yesu te kanapalika mu minda ya tiliku. Chocho tumbaji twenyi yaputuka kuhulula mitwe yimwe ya tiliku shimbu te anende.
24 A-Fwariseu ha kuchimona, yamuhula ngwo: “Mumu liaka ayo analingi yuma yize kuchatelele kulinga ha tangwa lia Sambata?”
25 Alioze Yesu yaakumbulula ngwenyi: “Kanda nuchitanga kama yuma yize Ndawichi alingile muze iye ni atu waze apwile nenyi evwile zala?
26 Chize anjilile mu zuwo lia Zambi ha matangwa ja sasendote mukwa-lutwe Abiatare, yalia mbolo ja kutumbieka hamwe ni atu waze apwile nenyi, jize te kulita ni shimbi mutu mweswawo katambile kujilia, shina wika asasendote nyi?”
27 Yesu yamba nawa ngwenyi: “Tangwa lia Sambata kalitangile mumu hali mutu, hi mutu ko mumu ha Sambata.
28 Kashika, mwe Mwana-mutu mwe nawa Mwenya-Sambata.”
