Asonekene Marku 3:1-35
3 Yesu yanjila cheka nawa mu sunangonga, muze mwapwile umwe lunga ni kwoko liasosewa.*
2 A-Fwariseu te kanamutale hanga amone nyi mauka lunga yoze ha tangwa lia Sambata mba amusume mulonga.
3 Iye yalweza lunga ukwete kwoko liasosewa* ngwenyi: “Katuka, tweya mukachi.”
4 Chocho iye yaahula ngwenyi: “Shina chinalite ha tangwa lia Sambata kulinga chuma chipema hanji chipi, kulamwina mutu* hanji kumushiha?” Alioze o kahashile kumukumbulula.
5 Muze Yesu hatala kuli atu waze apwile hamwe nenyi, yevwa uli ni chinyengo chinji mumu lia kukala cha mbunge jo, kashika iye yamba kuli mwe lunga ngwenyi: “Olola kwoko lie.” Iye yaliolola mba kwoko lienyi yilihinduka.
6 Hazehene, A-Fwariseu yatuhuka, yaputuka kumutwama punga* hamwe ni atu ja Heronde hanga amushihe.
7 Alioze, Yesu yakatuka hamwe ni tumbaji twenyi yaya ku kalunga-lwiji, mba mbunga yinene ya ku chifuchi cha Ngalileya ni Yundeya yiyimukaula.
8 Kulutwe, muze atu anji a ku limbo lia Yerusaleme, chifuchi cha Indumeya, a mu sali likwo lia Yordau, ni a ku membo waze alisulangana ni Teru ni Sendone, evwile hakutwala ku yuma yize Yesu alingile, yeza kuli iye.
9 Kashika, iye yamba kuli tumbaji twenyi amusele wato amanemo hanga mbunga yichine kumushinjeka.
10 Amu apwile ni kuuka atu anji, kashika eswe waze apwile ni misongo yeka ni yeka, yalishinjeka hanga amukwate.
11 Chipwe maspiritu a luchisa muze apwile ni kumumona, kapwile ni kufulamana kumeso jenyi ni kukololoka ngwo: “Yena uli Mwana wa Zambi.”
12 Alioze, ha yisuho yinji iye yaakanjisa chikolo hanga ahone kumusolola kuli akwo.
13 Yesu yakanduka ku umwe mulundu, yasanyika waze azangile, mba o ayile kuli iye.
14 Yatongola e 12 waze iye alukile ngwenyi, apostolo, waze te mamukaula ni kwatuma akambujole sango jipema.
15 Yaaha nawa chiyulo cha kutuhwisa maspiritu api.
16 Majina ja e 12 waze atongwele wano: Semone yoze kulutwe avulukile nawa ngwenyi, Petulu,
17 Tiangu ni mwana-kwo Yoano ana a Zebedeu, (waze alukile nawa ngwenyi, Mboaneje, jina lize linalumbunuka “Akwa-Kukulunguza,”)
18 Andeleu, Fwilipe, Mbatolomeu, Mateu, Tomase, Tiangu mwana wa Alefweu, Tateu, Semone Ka-Kanana,*
19 ni Yundase Ka-Keriote, yoze kulutwe wakunjikile Yesu.
20 Yesu ni tumbaji twenyi yanjila mu limwe zuwo, mba mbunga yiyikungama cheka nawa, kashika o kahashile chipwe kulia.
21 Alioze muze asoko jenyi evwile yize te yinalingiwa, yaya ni kumufupa, mumu ambile ngwo: “Kanazaluka.”
22 Chipwe alongeshi a shimbi waze akatukile ku Yerusaleme ambile ngwo: “Iye Mbelezepu* akwete, chikwo nawa kakutuhwisa andemoniu ni tachi ja mwata wa andemoniu.”
23 Kashika, Yesu yaasanyika yaatela yishima ngwenyi: “Kuchi Satana mahasa kulituhwisa mwene?
24 Nyi atu a umwe wanangana malihandununa ene, wanangana wacho kuuchi kukola.
25 Chikwo nawa, nyi atu a ku zuwo limwe malihandununa ene, zuwo liacho kulichi kukola.
26 Chizechene nawa, nyi Satana malihandununa ni kulitachika mwene, kechi kukola, mumu songo lienyi linakundama.
27 Kwamba pundu, nyi mutu mazanga kwiya yuma mu zuwo lia umwe chitakame, chitangu katamba kukasa chitakame wacho, mba ahase kwiya yikumba yenyi.
28 Pundu ngunambe kuli yenu ngwami, Zambi makakonekena atu shili yo yeswe ni kushililika cho cheswe.
29 Alioze, mweswawo mashililika spiritu yisandu, Zambi kechi keza kamukonekena ndo ku miaka yeswe.”
30 Yesu kambile yino yuma mumu kamwambile ngwo: “Iye kali ni spiritu ya luchisa.”
31 Kulutwe, naye ni ana-kwo yeza yamana haze, yaatuma umwe amusanyike.
32 Alioze, amu hapwile atu anji waze te anamujingilika, yamulweza ngwo: “Noko ni ana-kwenu kali haze, kanakufupu.”
33 Yesu yaakumbulula ngwenyi: “Mama ni ana-akwetu aya?”
34 Chocho, iye yatala kuli atu waze te anamujingilika yamba ngwenyi: “Mama ni ana-kwetu wano!
35 Yoze wakulinga upale wa Zambi, mwe ndumbwami wa lunga, ndumbwami wa pwo ni mama.”
Footnotes
^ Hanji “kwoko lia ulema.”
^ Hanji “kwoko lia ulema.”
^ Hanji “mwono.”
^ Hanji “yalikungulula.”
^ Hanji “chikilikita.”
^ Jina lize akuzachisa hali Satana.
