Asonekene Marku 5:1-43
5 O yaheta mu sali likwo lia kalunga-lwiji yanjila mu chifuchi cha A-Ngandara.
2 Muze Yesu atuhukile mu wato, umwe lunga yoze wapwile ni spiritu ya luchisa kanakatuka ku mafuka, yeza yalitakana nenyi.
3 Iye te katwama ku mafuka. Ha mashimbu jacho niumwe wahashile kumukasa wakuhi, chipwe ni malenge.
4 Ha yisuho yinji kapwile ni kumukasa ni malenge ku molu ni ku moko. Alioze iye wapwile ni kupatwola malenge jacho, kashika niumwe wapwile ni tachi ja kumuhombola wakuhi.
5 Matangwa eswe ufuku ni mwalwa, wapwile ni kukololoka ku milundu ni mukachi ka mafuka ni kulilemieka ni mawe.
6 Alioze, muze amwene Yesu kusuku, yazomboka ni kufulamana kumeso jenyi.
7 Chocho iye yakololoka ni liji linene ngwenyi: “Yesu, Mwana wa Zambi Chitunda, yika unafupu kuli yami? Lishinge kuli Zambi ngwe, kuchi kungupinjisa.”
8 Iye kambile chino, mumu Yesu te hamwamba ngwenyi: “Yena spiritu ya luchisa, tuhuka muli mutu yono.”
9 Mba Yesu yamuhula ngwenyi: “Jina lie iya?” Iye yamukumbulula ngwenyi: “Jina liami Tununu,* mumu tuli anji.”
10 Spiritu yacho, yiyiliumba kuli Yesu hanga achine kuhanga maspiritu a luchisa mu chifuchi chize.
11 Kwapwile chendo chinene cha ngulu waze te anali ku mulundu.
12 Kashika maspiritu a luchisa yaliumba kuli iye ngwo: “Tutume kama muli ngulu hanga tunjile muli ayo.”
13 Hazehene Yesu yatayiza, mba maspiritu a luchisa yatuhuka muli mutu yanjila muli ngulu. Chendo cheswe yichilundumukina mu chimbongo, yanjila mu kalunga-lwiji. Chocho, unji wa tununu aali a ngulu yafwila mu kalunga-lwiji.
14 Alioze tufunga ngulu yachina, yaya ni kwambulula yuma yacho mu mbonge ni mu yihunda. Chocho atu yeza ni kutala yuma yize yalingiwile.
15 Yaheta kuli Yesu, yamona mutu yoze wapwile ni maspiritu a luchisa hatangu, kanatwama, hazala mazalo, hapwa ni manyonga a utu, chocho yevwa woma.
16 Atu waze amwene yuma yacho, yaalumbunwina mbunga yuma yize yalingiwile kuli lunga yoze wapwile ni maspiritu a luchisa ni kuli ngulu.
17 Kashika, atu jacho yaputuka kuliumba kuli Yesu hanga akatuke mu chifuchi cho.
18 Muze te ananjila mu wato, lunga yoze wapwile ni maspiritu a luchisa yaliumba kuli iye hanga aye hamwe nenyi.
19 Alioze Yesu kamutayijile. Yamba kuli iye ngwenyi: “Yako ku mahienu kuli usoko we, ukaambulwile yuma yeswe yize Yehova* hakulingila ni keke yize akusolwela.”
20 Lunga yaya yaputuka kwambujola mu Ndekapoli yuma yeswe yize Yesu alingile hali iye. Chocho atu eswe yalishimwoka.
21 Muze Yesu anjilile cheka nawa mu wato ni kuya mu sali likwo lia kalunga-lwiji, mbunga yinene yalikungulula kuli iye ku sesa lia kalunga-lwiji.
22 Hazehene, yikuheta umwe wa kuli akwa-kuyula sunangonga, avuluka ngwo Yaru. Hakumona Yesu, yafulamana ku molu jenyi.
23 Yaliumba kuli iye yisuho yinji ngwenyi: “Mwanami wa pwo kanayiji chinji.* Lisesa tweya kama umuse moko hanga ahinduke, apwe ni mwono.”
24 Chocho, Yesu yaya hamwe nenyi. Mba mbunga yinene yamukawile ni kumushinjieka.
25 Kwapwile umwe pwo yoze te ukwete musongo wa kuhita manyinga ha miaka 12.
26 Iye kamwene lamba linji ku moko ja mandotolo anji waze azangile kumuwuka. Yahwisa upite wenyi weswe uze apwile nawo, chipwe chocho kahindukile. Alioze wayijile chinji kuhiana.
27 Muze evwile hakutwala kuli Yesu, yeza hakachi ka mbunga kunyima lia Yesu, yakwata ku hina lienyi,
28 mumu iye wanyongene ngwenyi: “Nyi mungukwata wika ku hina lienyi, munguhinduka.”
29 Hazehene kuhita cha manyinga yichipatuka. Yalivwa mu mujimba wenyi ngwenyi, yikola yize yapwile ni kumupinjisa yahwa.
30 Chocho, Yesu yanyingika ngwenyi, ndundo jatuhuka muli iye. Kashika yatewuluka mukachi ka mbunga ni kuhula ngwenyi: “Iya wangukwata ku mazalo?”
31 Tumbaji twenyi yamukumbulula ngwo: “Unamono mbunga yinakushinjieka, nihindu unahula ngwe: ‘Iya wangukwata?’”
32 Alioze, Yesu yaputuka kutala sali ni sali hanga amone mutu yoze walingile chuma chacho.
33 Mwe pwo yakundama ni kuchikima ni woma mumu kanyingikine yize yalingiwile kuli iye. Yafulamana kumeso ja Yesu ni kumwambulwila umwenemwene weswe.
34 Iye yamwamba ngwenyi: “Mwanami, ufulielo we wakuuka. Yako ni sambukila, ni musongo uze wapwile ni kukupinjisa uhwe lume.”
35 Shimbu Yesu te machihanjika, yikuheta amwe malunga a ku zuwo lia mukwa-kuyula sunangonga, ni kumwamba ngwo: “Mwane hafwa. Kanda upinjisa nawa Longeshi.”
36 Alioze, Yesu ha kwivwa maliji jo, yamba kuli mukwa-kuyula sunangonga ngwenyi: “Kanda wivwa woma, fuliela wika.”
37 Kashika, Yesu katayijile niumwe kuya hamwe nenyi, shina wika Petulu, Tiangu ni mwana-kwo Yoano.
38 Muze ahetele ku zuwo lia Yaru, yawanako chizungo-zungo cha atu waze te analinyenge ni kulila chikolo.
39 Ha kunjila mu zuwo, Yesu yaahula ngwenyi: “Chizungo-zungo ni kulila chipwahaha achi chaka? Mwana-pwo kafwile, kanapombo.”
40 Alioze, atu yaputuka kumuseha ni kumulelesa. Mba muze te hatuhwisa atu eswe, yasala wika ni yisemi ja mwana-pwo ni tumbaji twenyi atatu waze apwile hamwe nenyi. Yanjila muze mwapwile mwe mwana-pwo.
41 Iye yakwata ku kwoko lia mwana-pwo, yamba kuli iye ngwenyi: “Talita kumi,” liji lize linalumbunuka ngwo: “Mwana-pwo ngunambe kuli yena ngwami, ‘hinduka!’”
42 Hohene, mwana-pwo yakatuka, yaputuka kwenda. (Iye kapwile ni miaka 12.) Chocho atu eswe awahilile chinji.
43 Alioze iye yaakanjisa yisuho yinji* hanga achine kulweza mutu niumwe yuma yize yalingiwile. Mba yaalweza hanga ahane kulia kuli mwana-pwo wacho.
Footnotes
^ Chize Alisonekene, “chizaji.”
^ Tala Apendice A5.
^ Hanji “kanafu.”
^ Hanji “yaatoweza chikolo.”
