Asonekene Marku 6:1-56
6 Yesu yakatuka kuze apwile, yaya mu mbonge* yo, ni tumbaji twenyi yamukaula.
2 Muze tangwa lia Sambata liahetele, iye yaputuka kulongesa mu sunangonga, mba atu eswe waze amupanjikile akomokene chinji ni kwamba ngwo: “Kulihi lunga yono alilongesele yuma yino? Iya wamuhele mana apwahaha ni ndundo ja kulinga yikomokeso yino yinene-yinene?
3 Yono hi mukwa-kusonga mapaya ko mwana wa Maria, chikwo nawa, yayo ya Tiangu, ni Yosefwe, ni Yunda ni Semone, nyi? Ngwami ni mandumbu jenyi a mapwo twatwama no mu mbonge yino yene?” Kashika, ayo yaputuka kutalinga hamukunda wa iye.
4 Alioze Yesu yamba kuli ayo ngwenyi: “Profeta mweswe kakumulemesa ku yihela yeswe, alioze atu a mu limbo, vungu hanji jiko lienyi e keshi kumulemesa.”
5 Mumu lia chino, iye kalingile yikomokeso mu mbonge yize, shina wika kusayika moko hali mieji amwe ni kwawuka.
6 Yesu yakomoka mumu ayo kakapwile ni ufulielo. Mba Yesu yaya ni kulongesa mu yihunda* yeswe yapwile hakamwihi.
7 Yesu yasanyika e Kumi ni Aali, yaatuma aali, aali, ni kwaha chiyulo cha kutuhwisa maspiritu a luchisa.
8 Yaaha nawa shimbi yino ngwenyi: “Kanda numbata chuma nichimwe mu wenyi, chipwe yakulia hanji chipakumuna, chipwe mbongo nijimwe mu muya, shina wika mulumbu.”
9 Yaalweza nawa ngwenyi, azale wika sapato ni chikuto chimuwika.*
10 Chikwo nawa, yamba kuli ayo ngwenyi: “Mu zuwo lieswalio mununjila, twamenumo ndo muze munukakatuka ku chihela chacho.
11 Ku chihela cheswacho kuze munuya, nyi kanutambwile hanji kunupanjika, ha kukatukako, kukumunenu fufuta ku molu jenu hanga chikapwe uchela kuli ayo.”
12 Chocho, o yaya yambujola ngwo, atu eswe katamba kulikonyeka,
13 o atuhwishile maspiritu anji api, akwichile maji kuli mieji anji ni kwawuka.
14 Mwanangana Heronde yevwa lufuma hakutwala kuli Yesu, mumu jina lienyi liafumanyine chinji, ni atu nawa ambile ngwo: “Yoano Chipapachisa kamuhindwisa hakachi ka afu, kashika analingi yikomokeso yino ya ndundo.”
15 Alioze atu akwo ambile ngwo: “Iye Eliya.” Eka nawa ambile ngwo: “Iye kali umwe profeta walifwa ni aprofeta a ku shakulu.”
16 Heronde ha kuchivwa yamba ngwenyi: “Yoano, yoze natetele mutwe, kamuhindwisa.”
17 Heronde kambile maliji wano, mumu kunyima iye katumine kukwata Yoano yamukasa ni kumusa mu zuwo lia ususu hamukunda wa Herondeya, pwo lia ndumbwenyi Fwilipe, yoze alimbachile nenyi.
18 Mumu Yoano kapwile ni kulweza Heronde ngwenyi: “Kuchalitele ni shimbi kumbata pwo lia ndumbwe.”
19 Kashika Herondeya yahalila Yoano, yazanga kumushiha. Alioze te keshi ni chize machilinga.
20 Heronde kapwile ni kuvwila Yoano woma mumu te kananyingika ngwenyi, kali lunga mukwa-ululi, chikwo nawa musandu. Kashika apwile ni kumufunga. Mashimbu eswe waze apwile ni kwivwa Yoano mahanjika, te keshi kumona yize mamulinga, chipwe chocho kapwile ni kuwahilila ha kumupanjika.
21 Alioze, muze tangwa lia chiwanyino cha kusemuka cha Heronde liahetele, iye wahanyine chiteleka kuli yilolo, miata a jita ni akwa-lutwe a mu Ngalileya. Chocho, Herondeya yapwa ni uhashi wa kulinga yize azangile.
22 Mba muze mwana wa Herondeya wa pwo anjilile, yahangana yavwisa Heronde kuwaha ni waze alile* hamwe nenyi. Mba mwanangana yamba kuli mwana-pwo ngwenyi: “Ngwite cheswacho unazange, mungukwahacho.”
23 Ewa, iye yalishinga ngwenyi: “Chuma cheswacho chize muwita, chipwe chihanda cha wanangana wami, kumungukwahacho.”
24 Kashika, mwana-pwo yatuhuka yahula naye ngwenyi: “Yika natamba kwita?” Naye yamukumbulula ngwenyi: “Mutwe wa Yoano, Chipapachisa.”
25 Hazehene, mwana-pwo yazomboka kuli mwanangana ni kumwita ngwenyi: “Ngunazange ungwehe ni kawashi mutwe wa Yoano Chipapachisa ha longa.”
26 Chipwe ngwe chino chavwishile mwanangana yinyengo yinji, nihindu kahashile kulituna kwita chenyi mumu lia shingo lize alishingile ni mumu lia atu* waze apwile hamwe nenyi.
27 Hazehene, mwanangana yatuma umwe swalale wenyi anehe mutwe wa Yoano. Iye yaya mu zuwo lia ususu, yamupatula mutwe,
28 mba yausa ha longa. Yauhana kuli mwana-pwo, mwana-pwo aye yautwala kuli naye.
29 Muze tumbaji twa Yoano achivwile, yaya yanda mujimba wenyi yaufunda.*
30 Apostolo yalikungulula ni Yesu, yamwambulwila yuma yeswe yize alingile ni yize alongesele.
31 Yesu yamba kuli ayo ngwenyi: “Tuyenu kwa ukawetu, hanga tukahwime ko yimwe ndambu.” Mumu atu anji apwile ni kwizaza, amwe ni kuyaya, kashika chipwe mashimbu a kulia kapwile no.
32 Chocho, o yanjila mu wato yaya ku chihela cha ukawo.
33 Alioze, atu anji yaamona muze te anakatuka, eka yachinyingika. Kashika, atu a ku membo eswe yazombokela ko, yalianga kuheta.
34 Muze Yesu ni tumbaji twenyi ahetele ko, Yesu yamona mbunga yinene yevwila keke, mumu kapwile ngwe mapanga waze keshi kafunga. Hachino, yaputuka kwalongesa yuma yinji.
35 Ha kutoka cha tangwa, tumbaji twenyi yaya kuli iye yamba ngwo: “Kuma kuno kwahola chinji ni lie tangwa hiliatoka.
36 Lweza atu hanga aye kwo mu membo ni mu yihunda yili hakamwihi, hanga alande kulia.”
37 Yesu yamba kuli ayo ngwenyi: “Ehenu yimwe hanga alie.” O yamuhula ngwo: “Tuye tukalande mbolo ja 200 ja mbongo* tukaahe kulia, nyi?”
38 Iye yaahula ngwenyi: “Mbolo jingahi nulinajo? Yeenu nutale!” Muze te hanyingika, yamba ngwo: “Mbolo jitano ni yishi aali.”
39 Yesu yamba kuli eswe hanga atwame mu yizavu ha mwambu.
40 O yatwama mu yizavu ya kulakaji ni yizavu ya makumi atano.
41 Yesu yanda mbolo jitano ni yishi aali, yatala mwilu, yalemba.* Mba yapalula mbolo yajihana kuli tumbaji twenyi hanga atetele mbunga. Yalinga nawa chocho ni yishi aali.
42 Kashika, atu eswe yalia, yaakuta,
43 mba tumbaji yazalisa mitonga 12 ya too ni yipalu-palu ya mbolo ni yisoka yikwo ya yishi.
44 Atu waze alile mbolo kapwile 5,000 a malunga.
45 Hazehene, Yesu yalweza tumbaji twenyi anjile mu wato hanga atetekele mu sali likwo lia kalunga-lwiji ku limbo lia Mbeteseta, shimbu iye mwene te machilishika ni mbunga.
46 Hanyima lia kulishika ni mbunga, yaya ku umwe mulundu hanga alembe.
47 Muze tangwa liatokele, ulungu wapwile mukachi lia kalunga-lwiji, alioze Yesu te kali ha tunda.
48 Kashika, muze amwene ngwenyi, tumbaji twenyi kanapinji mumu lia fuji yize te yinaahungumuna, yaya kuli ayo ha mandemba* ni kwenda helu lia meya. Alioze yalinga ngwe te kumaahiana.*
49 Muze tumbaji twenyi amumwene kanende helu lia meya, yanyonga ngwo: “Chipupu!” Kashika yaputuka kuteta.
50 Mumu eswe amumwene, chocho yatungumuka. Alioze iye yamba kuli ayo ngwenyi: “Hamukenu! Kanda nwivwa woma, yami.”
51 Kashika yanjila mu wato hamwe no, ni fuji yiyihola. Chocho o alishimwokene chinji,
52 mumu chikomokeso cha mbolo te kanda chichalumbunuka. Chikwo nawa, mbunge jo te jinachikale.
53 Muze te hazauka, yaheta ku chifuchi cha Ngenezare yakasa wato ku zuzu.
54 Mba muze te haasunuka mu wato, hazehene atu yamunyingika.
55 O yazomboka chifuchi cheswe ni kulilweza umwe ni mukwo hakutwala ku chihela kuze Yesu apwile. Chocho yaputuka kumutwalila mieji anji.
56 Ku yihela yeswe kuze iye apalikile, ngwe mu yihunda, mu mambonge hanji ku minda, atu te kakusa mieji ha yitanda ni kuliumba kuli iye hanga aatayize akwate kama chipwe ku songo lia mazalo jenyi. Eswe waze akwachile ko, yahinduka.
Footnotes
^ Hanji “mu njiza yenyi.”
^ Hanji “yendangana mu yihunda ya mu njiza.”
^ Chize Alisonekene, “kanda azala yikuto yaali.”
^ Hanji “waze atwamine hamwe nenyi ku mesa.”
^ Hanji “waze atwamine nenyi ku mesa.”
^ Hanji “yausa mu fuka.”
^ Chize Alisonekene, “kulakaji aali a ndenariu.” Tala Apendice B14.
^ Chize Alisonekene, “yayiwahisa.”
^ Hanji ngwetu, ha kukundama cha ola 3 ya ha mandemba, ndo ha kututuka cha tangwa ha ola 6 ya chimene.
^ Hanji “alioze yazanga kwahiana.”
