Asonekene Marku 7:1-37
7 A-Fwariseu ni alongeshi a shimbi amwe waze akatukile ku Yerusaleme, yakunguluka kuli Yesu.
2 O yamona amwe a kuli tumbaji twenyi kanali ni moko a majilo chakuhona kusana.*
3 (Mumu A-Fwariseu ni A-Yunda te keshi kulia chakuhona kusana ku moko ndo ku minguza. O kapwile ni kulikwachilila ha ndako ja tulamba two.
4 Ha kuhiluka ha chitanda, o te keshi kulia chakuhona kusana ku moko. Kwapwile nawa mianda yinji yize te akukaula ni kulikwachilila ngwe, kuchupika* misenge, milondo ni yenga ya utale mu meya.)
5 Chocho A-Fwariseu jacho ni alongeshi a shimbi yamuhula ngwo: “Mumu liaka tumbaji twe keshi kukaula mianda ya tulamba twetu, alioze akulia ni moko a majilo?”
6 Iye yaakumbulula ngwenyi: “Izaia kaprofetezele kanawa hakutwala kuli yenu, yilembekese, ngwe chize chinasonewa ngwo: ‘Atu wano kakungulemesa wika ni kanwa, alioze mbunge jo jili kusuku chinji ni yami.
7 Kananungu ni kunguwayila chamokomoko, mumu kakulongesa mianda ya atu ngwe shimbi ja Zambi.’
8 Yenu hinunehuka shimbi ja Zambi ni kulikwachilila ha ndako ja atu.”
9 Yesu yaalweza nawa ngwenyi: “Nunanyingika kanawa kwehuka shimbi ja Zambi ni kulikwachilila ha mianda ya atu.
10 Chakutalilaho, Mose kambile ngwenyi: ‘Lemesa tatenu ni noko, chikwo nawa yoze mahanjika yuma yipi* hali tato ni naye akamushihe.’
11 Alioze yenu nwakwamba ngwenu: ‘Nyi umwe mutu mamba kuli tato hanji kuli naye ngwenyi: “Yuma yeswe nguli nayo yize te natamba kukwaha, yapwa korpane (chekwamba, yili mulambu kuli Zambi),’”
12 yenu nwakukwika mutu wacho kulinga chuma chimwe hanga akwase tato hanji naye.
13 Kashika, nwakulelesa liji lia Zambi mumu lia mianda yenu yize nwakulongesa. Chikwo nawa, nwakulinga yuma yinji yalifwa ni yino.”
14 Mba muze asanyikine cheka nawa mbunga, yamba kuli ayo ngwenyi: “Yenu eswe ngupanjikenu hanga nunyingike ulumbunwiso wa yuma yize ngunambe.
15 Mutu keshi kupwa wa luchisa mumu lia yuma yize akulia. Alioze yuma yize yakutuhuka mu kanwa lienyi, ye yakumupwisa wa luchisa.”
16 * ——
17 Muze akatukile hakachi ka mbunga ni kunjila mu limwe zuwo, tumbaji twenyi yamuhula ulumbunwiso wa chishima.
18 Chocho, yaahula ngwenyi: “Kumanyi ni yenu nawa yuma yino kuyanulumbunukine, nyi? Shina kunwanyingikine ngwenu, chuma chize mutu akulia chishi kumupwisa wa luchisa,
19 mumu kuchishi kunjila mu mbunge yenyi alioze mu jimo lienyi, mba chakutuhuka ku musenge* nyi?” Kashika Yesu yamba kuli ayo ngwenyi, kulia cheswe chalita chapwa chipema.
20 Chikwo nawa yamba ngwenyi: “Yuma yize yakutuhuka mu mbunge ya mutu ye yakumupwisa wa luchisa.
21 Mumu mu mbunge ya mutu mwe mwakutuhuka manyonga api ngwe: utanji,* wiji, ungalwe,
22 upangala, kuzo, ungulungulu, kalimbalimba, yitanga ya sonyi,* chipululu, kushililika, kulizelula ni uhepuke.
23 Yuma yino yeswe yakutuhuka mu mbunge ya mutu ni kumupwisa wa luchisa.”
24 Mba Yesu yakatuka yaya mu njiza ya Teru ni njiza ya Sendone. Muze aheteleko, yanjila mu limwe zuwo. Mumu te kazangile hanga atu anyingike kuze ali, nihindu kahashile kuswama.
25 Hazehene, umwe pwo wapwile ni mwanenyi mukepe wa pwo yoze te ukwete spiritu ya luchisa, yevwa lufuma hakutwala kuli Yesu, yeza kuli iye yafulamana ku molu jenyi.
26 Pwo wacho kapwile Ka-Ngresia wa kusemukina mu mbonge ya Seru-Fwenishia. Iye kaliumbile yisuho yinji kuli Yesu hanga atuhwise spiritu ya luchisa muli mwanenyi.
27 Yesu yamwamba ngwenyi: “Chitangu echa ana akute, mumu kuchalitele kwanda kulia cha ana hanga achihane kuli ana-a-tuwa.”
28 Pwo yamukumbulula ngwenyi: “Ewa mwene, alioze chipwe ana-a-tuwa kakulia yifwenyu-fwenyu yize ana akuhwolwela kushi lia mesa.”
29 Chocho Yesu yamba kuli iye ngwenyi: “Kulita ni kumbululo lie, yako; spiritu ya luchisa yatuhuka muli mwane.”
30 Kashika pwo yaya ku zuwo lienyi yawana mwanenyi kanapombo ha muhela, spiritu ya luchisa te hiyamutuhuka.
31 Muze Yesu akatukile mu mbonge ya Teru, yapalikila mu Sendone ni kuya ku Kalunga-Lwiji wa Ngalileya, yaya ndusu ndo ku njiza ya Ndekapoli.*
32 Mu njiza yacho atu yamunehena umwe kafwa-matwi kanda mukwa-chilimi ni kuliumba hanga amuse kama kwoko.
33 Yesu yaya nenyi kwaukawenyi kusuku ni mbunga. Chocho yamusa minwe mu matwi, yafwila mate mba yamukwata ha limi.
34 Yesu yatala mwilu, yatwa mikuma ni kumwamba ngwenyi: “Efatá,” liji lize linalumbunuka ngwo: “Jikuka.”
35 Hazehene matwi ja lunga wacho yajikuka, ni limi lienyi yilitusuka, chocho yaputuka kuhanjika kanawa.
36 Yesu yaakanjisa hanga achine kulweza chikuma chacho kuli mutu niumwe. Alioze chuma chize aakanjishile, yachambujola kuhiana.
37 Mba atu alishimwokene kuhiana chikolo ngwo: “Iye kakulinga yuma yeswe kanawa. Kakuvwisa chipwe afwa-matwi ni kuhanjikisa tumama.”
Footnotes
^ Hanji kuhona kusana kulita ni chijila cho.
^ Hanji “kupapachisa.”
^ Hanji “mashinga.”
^ Tala Apendice A3.
^ Hanji “mu kumba.”
^ Hanji “Chifuchi cha Membo Kumi.”
