Asonekene Marku 8:1-38
8 Ha matangwa aze, mbunga yinene yiyilikungulula nawa. Alioze o te keshi ni kulia. Chocho Yesu yasanyika tumbaji twenyi ni kwalweza ngwenyi:
2 “Keke ngunevwila mbunga yino, mumu kali ni yami ha matangwa atatu. Chikwo nawa keshi ni yize malia.
3 Anji a kuli ayo kusuku akatukile, kashika nyi neecha hanga ahiluke ku mazuwo jo ni zala,* mahasa kulezumuka mu jila.”
4 Alioze tumbaji yamukumbulula ngwo: “Ku chihela chino kwahola chize, kulihi mutuhasa kuwana kulia chakumbana mba tulise mbunga yipwahaha?”
5 Chocho, Yesu yaahula ngwenyi: “Mbolo jingahi nuli najo?” Ayo yakumbulula ngwo: “Shimbiali.”
6 Iye yambila mbunga hanga atwame hashi. Mba yanda je mbolo shimbiali, yalemba, yajipalwola, yajihana kuli tumbaji twenyi hanga atetele mbunga. O yalinga chocho.
7 Kapwile nawa ni tumwe tuyishi. Mba muze Yesu te halemba, yalweza nawa tumbaji twenyi hanga atetele mbunga.
8 Chocho atu yalia yakuta, mba tumbaji yazalisa mitonga* shimbiali yinene-yinene ya too ni yipalupalu yize yasalileho.
9 Hapwile 4,000 a malunga. Mba Yesu yalishika no.
10 Hazehene yanjila mu wato hamwe ni tumbaji twenyi, yaya mu njiza ya Ndalumanuta.
11 Koko, A-Fwariseu yakundama kuli iye, yahamika nenyi ni kumwita chilayi cha mwilu hanga amweseke.
12 Chocho Yesu yatwa mikuma ni kwamba ngwenyi: “Mumu liaka vungu lino linafupu chilayi? Pundu ngunambe kuli yenu ngwami: Vungu lino kulichi kamona nichimwe chilayi.”
13 Mba Yesu yaahichika, yanjila mu wato, yazauka mu sali likwo lia kalunga-lwiji.
14 Alioze tumbaji yavulama kumbata mbolo jakumbana. Kapwile wika ni mbolo yimuwika mu wato.
15 Yesu yaatoweza ngwenyi: “Kanyamenu; keyenu ni futunwiso ya A-Fwariseu ni ya A-Heronde.”
16 Chocho tumbaji yaputuka kulipinjisa mumu lia kuhona mbolo.
17 Yesu ha kuchimona yaahula ngwenyi: “Kuchi kevwe nunalipinjisa mumu lia kuhona mbolo? Ndo haliapwila yuma yize nakwamba kuyishi kunulumbunuka nyi? Shina mbunge jenu nihindu jinachikale nyi?
18 ‘Chipwe ngwe nuli ni meso nihindu kunushi kumona nyi? Chipwe ngwe nuli ni matwi nihindu kunushi kwivwa nyi?’ Shina nunewuluka
19 unji wa mitonga yize nwazalishile ni yipalupalu ya mbolo muze nalishile 5,000 a malunga ni mbolo jitano?” O yamukumbulula ngwo: “Kumi ni yiali.”
20 “Chikwo nawa, mitonga yingahi yinene-yinene ya too ni yipalupalu nwakungile muze nalishile malunga 4,000, ni mbolo shimbiali?” O yamukumbulula ngwo: “Shimbiali.”
21 Chocho iye yamba kuli ayo ngwenyi: “Ndo haliapwila yuma yize nakwamba kuyishi kunulumbunuka nyi?”
22 Mba yaheta ku Mbeteseta. Chocho atu yamunehena umwe kapuputa ni kuliumba kuli iye hanga amuse kama moko.
23 Yesu yakwata ku kwoko lia kapuputa yamutwala haze lia limbo. Mba muze te hamukwita mate ha meso, yamusa moko, yamuhula ngwenyi: “Shina unahase kumona chimwe chuma?”
24 Lunga yatala mwilu yamba ngwenyi: “Ngunamono atu, alioze kanasoloka ngwe mitondo yinende.”
25 Yesu yasa cheka nawa moko ha meso ja lunga wacho, meso jenyi yalaula. Chocho lunga yaputuka kumona yuma yeswe zwalala.
26 Yamulweza hanga aye ku zuwo lienyi ni kumutoweza ngwenyi: “Kanda unjila mu limbo.”
27 Yesu ni tumbaji twenyi, yakatuka yaya ku membo a Sesarea Fwilipu. Shimbu te achili mu jila, yahula tumbaji twenyi ngwenyi: “Atu kakwamba ngwo yami nguli iya?”
28 Ayo yamukumbulula ngwo: “Yoano Chipapachisa, alioze akwo kakwamba ngwo, yena uli Eliya, eka nawa ngwo, uli umwe wa kuli Aprofeta.”
29 Yesu yaahula ngwenyi: “Mba kuli yenu, yami nguli iya?” Petulu yamukumbulula ngwenyi: “Yenu nuli Kristu.”
30 Chocho iye yaakanjisa hanga achine kulweza chikuma chacho kuli mutu niumwe.
31 Yesu yaputuka kwalongesa ngwenyi, mwe Mwana-mutu katamba kumona lamba linji ni kulitunaye kuli makulwana, ni kuli asasendote a lutwe ni kuli alongeshi a shimbi. Chikwo nawa, makamushiha, mba kulutwe lia matangwa atatu makamuhindwisa.
32 Yesu kahanjikile yuma yacho zwalala. Alioze Petulu yamutwala ku tenga, yaputuka kumukanjisa.
33 Mumu lia chino, Yesu yatewuluka, yatala kuli tumbaji twenyi, mba yambila Petulu ngwenyi: “Yako kunyima liami, Satana! Mumu uli ni manyonga ja atu hi a Zambi ko.”
34 Hohene Yesu yasanyika mbunga hamwe ni tumbaji twenyi, yamba kuli ayo ngwenyi: “Nyi mutu mazanga kungukaula, alitune iye mwene, azundule mutondo wenyi wa lamba,* anunge ni kungukaula.
35 Mumu mweswawo mazanga kulamwina mwono* wenyi makautokesa, alioze yoze matokesa mwono* wenyi mumu lia yami ni ha sango jipema, makaulamwina.
36 Kwamba pundu, yika mutu mayuka nyi mazuka yuma yeswe ya hano hashi, alioze matokesa mwono wenyi?
37 Yika chamwenemwene mutu mahasa kusumbakenya nayo mwono wenyi?
38 Mumu mweswawo manguvwila sonyi hanji mevwila sonyi maliji jami hakachi ka chisemuko chino cha utanji,* kanda cha shili, Mwana-mutu neye kumakamuvwila sonyi muze makeza mu uhenya wa Tato hamwe ni angelo asandu.”
Footnotes
^ Hanji “chakuhona kulia.”
^ Hanji “yisoka ya too ni kulia.”
^ Hanji “alma.”
^ Hanji “alma.”
^ Hanji “kuchishi kushishika.”
