Asonekene Marku 9:1-50
-
Kwalumuka cha Yesu (1-13)
-
Umwe mukweze wapwile ni ndemoniu yamuuka (14-29)
-
Yuma yeswe muyihasa kulingiwa kuli yoze wakufuliela (23)
-
-
Kufwa cha Yesu yachiprofeteza cheka nawa (30-32)
-
Tumbaji yazwela hakutwala kuli yoze wapwa munene (33-37)
-
Yoze keshi kulimika ni yetu, kali niwetu (38-41)
-
Liwe lia chitalingiso (42-48)
-
“Pwenu ni mungwa muli yenu ene” (49, 50)
9 Yesu yamba nawa ngwenyi: “Pundu ngunambe kuli yenu ngwami, atu amwe waze anamana hano kechi kafwa, ndo muze makamona Wanangana wa Zambi kuuneza ni ndundo.”
2 Mba muze matangwa asambano hapalika, Yesu yasanyika Petulu, Tiangu ni Yoano, yakanduka no ukawo ku umwe mulundu usuku. Kokwene, iye yalumuka kumeso jo.
3 Mazalo jenyi yapeyima, yatoma ngwe neve. Niumwe mukwa-kukosa mazalo hano hashi te mahasa kwatomesa chocho wakuhi.
4 Hohene, Eliya ni Mose yasoloka kuli ayo, te kanahanjika ni Yesu.
5 Chocho, Petulu yalweza Yesu ngwenyi: “Longeshi,* chili chipema kupwa hano. Kashika mututunga mbalaka jitatu: Yimwe ya yena, yikwo ya Mose, yeka ya Eliya.”
6 Kwamba pundu, Petulu te kanyingikine yize mamba mumu eswe te woma anevu.
7 Hazehene yikusoloka limwe lelwa lize liaafukile, mba liji limwe yilituhuka mu lelwa ngwo: “Yono mwe Mwanami, nakumuzanga chinji, mupanjikenu.”
8 Susumuku, tumbaji yatala sali ni sali, alioze kamwene nawa mutu niumwe, shina wika Yesu.
9 Muze te ayo machipalumuka ha mulundu, Yesu yaakanjisa hanga achine kwambulula yuma yize amwene, ndo haze mwe Mwana-mutu makamuhindwisa hakachi ka afu.
10 O yononokena maliji * jenyi, alioze yalihula hakachi ko chize kuhinduka mukachi ka afu chinalumbunuka.
11 Chocho, tumbaji yamuhula ngwo: “Mba mumu liaka alongeshi a shimbi akwamba ngwo, Eliya katamba kwiza chitangu?”
12 Iye yaakumbulula ngwenyi: “Chamwenemwene Eliya katamba kwiza chitangu hanga alulieke yuma yeswe. Mba kuchi chinasonewa hakutwala kuli mwe Mwana-Mutu ngwo, katamba kumona lamba linji ni kulitunaye kuli atu?
13 Pundu ngunambe kuli yenu ngwami, Eliya haneza kulu, ni atu alingile kuli iye cheswacho azangile ngwe chize chinasonewa hakutwala kuli iye.”
14 Muze ahetele homa haze hapwile tumbaji akwo, yawana mbunga yinene yize te yinaajingilika, ni alongeshi a shimbi waze te analihangujola ni tumbaji.
15 Alioze muze mbunga amwene Yesu, yakomoka chinji, yaazombokela kuli iye hanga amumeneke.
16 Chocho iye yaahula ngwenyi: “Yika nunalihangujola no?”
17 Umwe hakachi ka mbunga yamukumbulula ngwenyi: “Longeshi, nakunehenanga mwanami yoze uli ni spiritu ya luchisa yize yakumukwika kuhanjika.
18 Kweswako kuze spiritu yacho yakumukwachila, yakumulimbula hashi, mba maputuka kututumuna fulufulu ku kanwa, kulikeleketa ku mazo ni kumuhongesa chinji. Netanga kuli tumbaji twe hanga atuhwise spiritu yacho, alioze ayo kahashile.”
19 Yesu yamba kuli ayo ngwenyi: “Yenu chisemuko kuchishi ufulielo, ndo ha mwaka uka mungununga hamwe ni yenu? Ndo ha mwaka uka mungulihumikiza ni yenu? Munehenu kuli yami.”
20 Chocho, yamutwala kuli iye. Alioze, muze spiritu ya luchisa yamwene Yesu, yiyitunyisa mwe mwana. Muze te hamulimbula hashi, mwe mwana yalangumuka, ni kututumuna fulufulu ku kanwa.
21 Mba Yesu yahula tato ya mwana ngwenyi: “Ha miaka yingahi chino chakulingiwa kuli iye?” Iye yakumbulula ngwenyi: “Chize mu wanuke wenyi.
22 Ha yisuho yinji, spiritu ya luchisa yakumulimbwila ha kahia ni mu meya hanga yimushihe. Kashika, nyi munuhasa kama kulinga chimwe chuma, tuvwilenu kama keke nutukwase.”
23 Yesu yamba kuli iye ngwenyi: “Amu wamba ngwe, ‘Nyi muhasa!’ Nyingika ngwe yuma yeswe muyihasa kulingiwa kuli yoze mafuliela.”
24 Hazehene, tato ya mwana yakololoka ngwenyi: “Ngunafuliela! Ngukwase kama haze ngunafupiwa ufulielo!”
25 Muze Yesu amwene ngwenyi, mbunga yinakundama ni kawashi kuze ayo apwile, yakanjisa spiritu ya luchisa ngwenyi: “Yena spiritu ya kamama kanda ya kafwa-matwi, ngunakwambe ngwami, tuhuka muli iye, kanda unjila nawa muli iye!”
26 Muze spiritu ya luchisa te hiyakololoka ni kutunyisa mwana, yiyituhuka muli iye. Mwana yasoloka ngwe kafwa, chocho atu anji yamba ngwo: “Iye hafwa!”
27 Alioze, Yesu yamukwata ku kwoko, yamukatwisa mba iye yamana.
28 Kashika, muze anjilile mu limwe zuwo, tumbaji twenyi yamuhula kwa ukawo ngwo: “Mumu liaka yetu kutwahashile kutuhwisa spiritu yino ya luchisa?”
29 Iye yaakumbulula ngwenyi: “Spiritu ngwe yino, yakutuhuka wika ni yilemba.”
30 Yakatuka kuze apwile, yapalika ndusu mu Ngalileya. Alioze iye te kazangile hanga atu achinyingike,
31 mumu te kanazange kulongesa tumbaji twenyi. Iye yamba kuli ayo ngwenyi: “Mwana-mutu kumakamukunjika ku moko ja atu, ayo makamushiha. Alioze, chipwe ngwe makamushiha, nihindu kulutwe lia matangwa atatu makamuhindwisa.”
32 Yuma yize te anaalweze kuyaalumbunukine, alioze tumbaji yevwa woma wa kumuhula.
33 Chocho, yaaheta mu Kafwanaume. Mba muze te ali mu zuwo, iye yaahula ngwenyi: “Yika nwapwanga ni kulihangujola mu jila?”
34 O yahola kuluu, mumu mu jila kapwile ni kulihangujola hakutwala kuli yoze wapwile munene hakachi ko.
35 Kashika, Yesu yatwama, yasanyika e Kumi ni Aali yamba kuli ayo ngwenyi: “Nyi umwe mazanga kupwa mutangu, akapwe kasula-songo ka eswe ni kavumbi ko.”
36 Chocho, yaneha umwe kanuke, yamusa mukachi ko; yamukwata ni kwamba kuli ayo ngwenyi:
37 “Yoze matambula umwe wa kuli twanuke wano akepe mu jina liami, yami nawa anatambula; mba yoze matambula yami, kechi kutambula wika yami, alioze katambula nawa Yoze wangutumine.”
38 Yoano yamba kuli iye ngwenyi: “Longeshi, twamonanga umwe mutu kanatuhwisa andemoniu mu jina lie, alioze yitweseka kumukanjisa mumu keshi kutukaula.”
39 Kashika, Yesu yamba ngwenyi: “Kanda nweseka kumukanjisa, mumu niumwe yoze malinga chikomokeso mu jina liami, mba hanyima mangwamba yuma yipi wakuhi.
40 Mumu yoze keshi kulimika ni yetu, kali sali lietu.
41 Yoze manwaha musenge wa meya a kunwa mumu lia kupwa Akwa-Kristu, ngunanwambulwila ngwami, mutu wacho makatambula chawana chenyi.
42 Mweswawo matalingisa umwe wa kuli wano akepe waze akungufuliela, muchilita kumukasa liwe linene lia kutwa nalio ha kota yenyi, ngwe lize chimbulu akujingisa, ni kumumbila mu kalunga-lwiji.
43 “Nyi kwoko lie liakukuvulumwisa,* lipatule. Shinaho ukanjile mu mwono wamwenemwene chitonji, kuhiana kufunga moko je eswe aali akakumbile mu Ngehena,* mu kahia kaze keshi kujima.
44 * ——
45 Nyi kulu lie liakukuvulumwisa, lipatule. Shinaho ukanjile mu mwono wamwenemwene chitonji, kuhiana kukumbila mu Ngehena ni molu eswe aali.
46 * ——
47 Nyi liso lie liakukuvulumwisa, limbile. Shinaho unjile mu Wanangana wa Zambi ni liso limuwika, kuhiana kukumbila ni meso eswe aali mu Ngehena,
48 muze mavuno keshi kufwa ni kahia keshi kujima.
49 “Mumu Zambi makasa atu ngwe wano mu kahia ngwe chize mutu akusa mungwa ku kulia.
50 Mungwa chuma chipema, alioze nyi mungwa hiwasamuka, ni neka mauyemesa? Pwenu ni mungwa muli yenu ene, chikwo nawa, pwenu ni sambukila umwe ni mukwo.”
Footnotes
^ Hanji “Rabi.”
^ Hanji “o yafunga chikuma chacho mu mambunge jo.”
^ Hanji “liakukutalingisa.”
^ Tala Apendice A3.
^ Tala Apendice A3.
