Asonekene Mateu 13:1-58
-
YISHIMA HAKUTWALA KU WANANGANA (1-52)
-
Mukwa-kukuwa mbuto (1-9)
-
Mumu liaka Yesu ahanjikile mu yishima? (10-17)
-
Ulumbunwiso wa chishima cha mukwa-kukuwa (18-23)
-
Tiliku ni mwambu wamokomoko (24-30)
-
Luchichi wa mosetate ni futunwiso (31-33)
-
Kuhanjika mu yishima chinamanununa uprofeto (34, 35)
-
Ulumbunwiso wa chishima cha tiliku ni mwambu wamokomoko (36-43)
-
Upite wa kusweka ni kakanga mulemu (44-46)
-
Wanda wa kuta nawo yishi (47-50)
-
Upite waha ni ukulu (51, 52)
-
-
Yalituna Yesu mu mbonge yo (53-58)
13 Ha tangwa lize, Yesu yatuhuka mu zuwo, yaya ni kutwama ku sesa lia kalunga-lwiji.
2 Mbunga ya atu te yinamujingilika yapwile yinene chinji, kashika iye yanjila mu wato yatwama, mbunga yiyisala ha tunda.
3 Yesu yaalweza yuma yinji kupalikila mu yishima, iye yamba ngwenyi: “Panjikenu: Umwe mutu yaya ni kukuwa mbuto.
4 Muze te anakuwa mbuto, jimwe yijiholokela ku sesa lia jila, tujila yeza yajilia.
5 Jikwo yijiholokela ha mawe haze te kuheshi mavu anji, yijisoka ni kawashi mumu te kuheshi mavu anji.
6 Alioze muze mwalwa watuhukile, mbuto jacho yijilekama yijuma chau, mumu te kujishi miji.
7 Jeka yijiholokela mukachi ka mingonga, mingonga yiyitatuka, mba yiyikeketesa mbuto.
8 Alioze jikwo yijiholokela ha mavu apema, yijiputuka kwima mihuko. Yimwe yiyima 100, yikwo 60, yeka 30.
9 Yoze uli ni matwi, evwe.”
10 Chocho, tumbaji twenyi yeza, yamuhula ngwo: “Mumu liaka unahanjika no mu yishima?”
11 Yesu yaakumbulula ngwenyi: “Yenu hananwehe uhashi wa kunyingika yijimbikilo yisandu ya Wanangana wa mu malilu, alioze ayo kakaahelewo.
12 Mumu yoze uli nacho, kumakamuwezela yinji mba makapwa ni yakulumbama, alioze yoze keshi nacho, makamutambula chipwe chize ali nacho.
13 Kashika ngunahanjika no mu yishima; mumu chipwe ngwe kakutala, alioze keshi kumona, chipwe ngwe kakwivwa, alioze keshi kupanjika, chipwe kwalumbunuka.
14 Uprofeto wa Izaia unamanunuka hali ayo, unambe ngwo: ‘Pundu lume, yenu, kwivwa munukevwa, alioze kuyichi kanulumbunuka chipwe hakehe, kutala munukatala, alioze kunuchi kamona chipwe hakehe.
15 Mumu mbunge ja atu wano hijinakale mbe, ayo hanajiki matwi ni kufuka meso jo, hanga ahone kumona ni meso jo, chipwe kwivwa ni matwi jo, chipwe kunyingika ni mbunge jo hanga alikonyeke, yami ngwauke.’
16 “Alioze, kawaha meso jenu mumu kanamono, ni matwi jenu, mumu kanevu.
17 Ngunanulweze pundu, ngwami: Aprofeta anji ni akwa-ululi kazangile kumona yuma yino yenu nunamono, alioze kayimwene, ni kwivwa yuma yino yenu nunevu, alioze kayivwile.
18 “Haliapwila panjikenu chishima cha mukwa-kukuwa.
19 Muze mutu mevwa sango ja Wanangana, alioze kujichi kumulumbunuka, mupi meza, matukula yize atumbile mu mbunge yenyi; yono kanalumbunuka mbuto jize akuwile ku sesa lia jila.
20 Jize akuwile ha mawe haze te kuheshi mavu anji, jinalumbunuka mutu yoze wakwivwa sango, hazehene majitayiza ni chiseke.
21 Alioze, keshi miji muli iye, manunga ha shimbu likehe, muze kapinda ni yihungumiona muyiza mumu lia sango, hazehene matalinga.
22 Mbuto jize akuwile hakachi ka mingonga, jinalumbunuka mutu yoze wakwivwa liji, alioze yipikalo ya hano hashi ni ndundo ja kwonga cha upite, muyikeketesa lie liji, kashika kechi kwima mihuko.
23 Jize akuwile ha mavu apema, jinalumbunuka mutu yoze wakwivwa sango ni kunyingika ulumbunwiso wajo, mba mema mihuko, yimwe 100, yikwo 60, yeka 30.”
24 Yaatela nawa chishima chikwo ngwenyi: “Wanangana wa mu malilu, mahasa kuutesa ni umwe lunga wakuwile mbuto jipema mu munda wenyi.
25 Muze atu te anapombo, mukwa-kole wenyi yeza, yatumba mwambu wamokomoko mukachi ka tiliku, mba yaya.
26 Muze mafwo hasoka ni kwima mihuko, mwambu wamokomoko newo yiusoloka.
27 Mba ndungo ja mwenya-zuwo, yeza ni kumuhula ngwo: ‘Mwene, kuwakuwile mbuto jipema mu munda we? Mba mwambu wamokomoko kulihi wakatuka?’
28 Iye yaakumbulula ngwenyi: ‘Umwe mutu, mukwa-kole mwe wachilinga.’ Mba ndungo yamulweza ngwo: ‘Nyi chocho, shina nunazange tutukule mwambu wamokomoko?’
29 Iye yamba ngwenyi: ‘Ka, mumu, kuchina hanji muze munutukula mwambu wamokomoko, munutukula nawa ni tiliku.
30 Echenu yeswe yikole hamuwika ndo ha tangwa lia kucha, mba ha tangwa lia kucha, mungukalweza akwa-kucha ngwami: Chitangu tukulenu mwambu wamokomoko, nuukase mu yichita hanga ukapwe kwocha, mba kulutwe, nukunge tiliku mu machila jami.’”
31 Yaatela nawa chishima chikwo ngwenyi: “Wanangana wa mu malilu uli ngwe luchichi wa mosetate, yoze mutu anjile ni kumutumba mu munda wenyi.
32 Pundu, yono kali luchichi mukehe chinji hakachi ka chichi jeswe, alioze muze akukola, chiputa chenyi chakupwa chinene kuhiana yiputa* yeswe, ni kupwa mutondo, chocho tujila a mwilu meza, mawana uchinyino ku mitango yawo.”
33 Yesu yaatela chishima chikwo ngwenyi: “Wanangana wa mu malilu uli ngwe futunwiso yize umwe pwo achingile mu njongo jinene jitatu ja unga wa mbolo, ndo haze unga weswe wafutunukine.”
34 Yuma yino yeswe, Yesu yayilweza mbunga mu yishima. Kwamba pundu, te keshi kulweza atu chuma nichimwe chakuhona kwatela chishima,
35 hanga maliji a profeta amanunuke, anambe ngwo: “Munguhanjika mu yishima; mungwambulula yuma yize aswekele chize ku uputukilo.”
36 Muze Yesu hashika mbunga, yanjila mu zuwo, tumbaji twenyi yakundama kuli iye ni kwamba ngwo: “Tulumbunwine chishima cha mwambu wamokomoko wa mu munda.”
37 Yesu yakumbulula ngwenyi: “Mukwa-kukuwa mbuto jipema, mwe Mwana-mutu;
38 munda unalumbunuka hano hashi. Mbuto jipema e ana ja Wanangana, alioze mwambu wamokomoko e ana ja mwe mupi,
39 mukwa-kole yoze wautumbile mwe Ndiapu. Kucha chinalumbunuka kusula cha matangwa, akwa-kucha kali angelo.
40 Kashika, ngwe chizechene akukunga mwambu wamokomoko ni kuwocha mu kahia, che muchikapwa ha matangwa a kusula.
41 Mwe Mwana-mutu makatuma angelo jenyi, mba ayo makakunga mu Wanangana wenyi yuma yeswe yakutalingisa ni waze keshi kwononokena shimbi,
42 ni kwambila mu jiko lia kahia. Mwenamo makalila mbimbi ni kulikeleketa ku mazo.
43 Ha shimbu liacho, akwa-ululi makahenya ngwe tangwa mu Wanangana wa Tato. Yoze uli ni matwi, evwe.
44 “Wanangana wa mu malilu walifwa ni umwe upite wakusweka mu munda, uze umwe lunga awanyine mba yausweka nawa; mba ha uwahililo wenyi, yaya, yalanjisa yuma yeswe yize apwile nayo, yalanda munda wacho.
45 “Chikwo nawa, Wanangana wa mu malilu unalifu ni umwe mukwa-kulanjisa yoze wayile mu wenyi ni kufupa tukanga* alemu.
46 Muze hawana umwe kakanga mulemu, yaya, yalanjisa kawashi-washi yuma yeswe yize apwile nayo, yamulanda.
47 “Cheka nawa, Wanangana wa mu malilu unalifu ni wanda wa kuta nawo yishi, uze akongele mu kalunga-lwiji mba yiwoza mutapu weswe wa yishi.
48 Muze wanda wazalile too ni yishi, yaukoka ndo kusesa lia kalunga-lwiji, yatwama, yakunga yishi apema, yaasa mu chikashi, alioze yishi api, yaambila.
49 Yino ye muyikalingiwa ha matangwa a kusula. Angelo makatuhuka ni kuhandununa atu api hakachi ka akwa-ululi,
50 ni kwambila mu jiko lia kahia. Mwenamo makalilila mbimbi ni kulikeleketa ku mazo.
51 “Shina nwevwa ulumbunwiso wa yino yuma yeswe?” Ayo yakumbulula ngwo: “Ewa.”
52 Mba yamba kuli ayo ngwenyi: “Nyi chocho, longeshi mweswe wa ha mbunga yoze akulongesa hakutwala ku Wanangana wa mu malilu, kalifwa ni umwe lunga, mwenya-zuwo, yoze wakwanda mu upite wenyi yuma yaha ni yuma yikulu.”
53 Muze Yesu hahwisa kuta yishima yino, yaya kwenyi.
54 Muze haheta mu mbonge yo, yaputuka kulongesa atu mu sunangonga yo, atu yakomoka chinji ni kwamba ngwo: “Kulihi lunga yono awana mana apwahaha ni ndundo ja kulinga yikomokeso yinene-yinene?
55 Yono hi mwana wa mukwa-kusonga mapaya ko? Naye hi Maria ko? Ana-kwo hi Tiangu, Yosefwe, Semone ni Yunda ko?
56 Ngwami mandumbu jenyi eswe a mapwo tuli no hano. Mba kulihi awana mana apwahaha ni ndundo ja kulinga yikomokeso?”
57 Ayo yaputuka kutalinga hamukunda wa iye, alioze Yesu yamba kuli ayo ngwenyi: “Profeta mweswe kakumulemesa ku yihela yeswe, alioze atu a mu limbo lienyi ni mu jiko lienyi e keshi kumulemesa.”
58 Kashika, yecha kulinga yikomokeso yinji ya ndundo mu chihela chacho, mumu ayo kakapwile ni ufulielo.
