Asonekene Mateu 14:1-36
14 Ha mashimbu jacho, nguvulu Heronde yevwa lufuma wa Yesu
2 yalweza tuvumbi twenyi ngwenyi: “Yono kali Yoano Chipapachisa. Kamuhindwisa hakachi ka afu, kashika analingi yikomokeso yino ya ndundo.”
3 Kunyima, Heronde kakwachile Yoano yamukasa ni kumusa mu zuwo lia ususu, hamukunda lia Herondeya pwo lia ndumbwenyi Fwilipe.
4 Mumu Yoano kapwile ni kulweza Heronde ngwenyi: “Kuchalitele ni shimbi kumumbata.”
5 Kashika, chipwe ngwe kazangile kumushiha, alioze kapwile ni kwivwa woma wa mbunga, mumu kapwile ni kumumona ngwo kali profeta.
6 Ha chiwanyino cha kusemuka cha Heronde, mwana wa pwo wa Herondeya yahangana kumeso ja mbunga, Heronde yevwa kuwaha chinji,
7 chocho yamulakenya ni shingo ngwenyi, mamwaha cheswacho mamwita.
8 Yeta yize naye amulwezele ngwenyi: “Ngwehe mutwe wa Yoano Chipapachisa ha longa.”
9 Chipwe ngwe mwanangana kevwile chinyengo, alioze mumu lia shingo lize alingile ni mumu lia atu waze te anali nenyi, yatuma hanga amwehe mutwe.
10 Kashika, yatuma kupatula mutwe wa Yoano mu zuwo lia ususu.
11 Yaneha mutwe ha longa, yauhana kuli mwana-pwo, mba mwana-pwo yautwala kuli naye.
12 Mba tumbaji twenyi yeza, yanda mujimba wenyi, yaya nikuufunda, mba yaya yalweza Yesu yuma yeswe yize yalingiwileko.
13 Yesu ha kuchivwa, yanjila mu wato, yaya ku chihela kwahola hanga atwame ukawenyi. Alioze muze mbunga achinyingikine, yakatuka mu mambonge, yamukaula hashi.
14 Muze hasunuka mu wato, yamona mbunga yinene yeevwila keke, mba yauka waze te anayiji.
15 Alioze muze te kunayi ni kutoka, tumbaji twenyi yakundama kuli iye, yamulweza ngwo: “Kuma kuno tuli kwahola chinji, ni lie tangwa hiliatoka. Lweza mbunga hanga aye kwo ku yihunda hanga alande kulia.”
16 Alioze Yesu yamba kuli tumbaji ngwenyi: “Ayo katambile kuya kwo, ehenu yimwe hanga alie.”
17 Ayo yamukumbulula ngwo: “Kutushi nichimwe hano, tuli wika ni mbolo jitano ni yishi aali.”
18 Iye yamba ngwenyi: “Yinehenu kuno.”
19 Yalweza mbunga hanga atwame ha yambu. Mba yanda je mbolo jitano ni yishi aali, yatala mwilu, yalemba. Muze hapalwola mbolo, yajihana kuli tumbaji twenyi, mba tumbaji yajitetela mbunga.
20 Kashika, atu eswe yalia, yakuta, yakunga yipalupalu yize yasalileho, yapwile mitonga 12 ya too ni yipalupalu.
21 Atu waze alile kapwile 5,000 a malunga, kuwezako mapwo ni ana.
22 Hazehene, Yesu yalweza tumbaji twenyi anjile mu wato hanga atetekele kulutwe lienyi, aye mu sali likwo lia kalunga-lwiji, shimbu iye machishika mbunga.
23 Muze hashika mbunga, yaya ku mulundu hanga alembe. Muze kwilu hikwatoka, Yesu te kali ukawenyi.
24 Wato te hiwapwa chinji kusuku ni ngenge, ayo te kanapinda ni mikanya, mumu fuji te yinaahungumuna.
25 Muze te kunayi ni kucha, Yesu yaya kuli ayo ni kwenda helu lia meya.
26 Muze tumbaji twenyi amumwene kanende helu lia meya, yatungumuka ni kwamba ngwo: “Chipupu!”* Kashika yaputuka kuteta ni woma.
27 Alioze, hazehene Yesu yamba kuli ayo ngwenyi: “Hamukenu! Kanda nwivwa woma, yami.”
28 Petulu yamukumbulula ngwenyi: “Mwene, nyi yenu lume, ngulweze ngwize kuli yenu helu lia meya.”
29 Iye yamba ngwenyi: “Tweya!” Petulu yatuhuka mu wato, yenda helu lia meya ni kuya kuli Yesu.
30 Alioze hakutala ku fuji ya tachi, yevwa woma. Muze haputuka kushimbama, yateta ngwenyi: “Mwene, ngulamwine kama!”
31 Hazehene Yesu yolola kwoko, yamukwata, mba yamwamba ngwenyi: “Yena mukwa ufulielo ukepe, mumu liaka te unayambashana?”
32 Muze ayo hanjila mu wato, mba fuji yiyihola.
33 Waze apwile mu wato yafulamana ku lutwe lienyi ni kwamba ngwo: “Pundu lume yena uli Mwana wa Zambi.”
34 Yazauka, yaheta ku chifuchi cha Ngenezare.
35 Muze amunyingikine, malunga a ku chihela chize yamwanga sango mu chifuchi cheswe, mba e atu yamutwalila eswe waze apwile ni misongo.
36 Mba e atu yaliumba kuli iye hanga aatayize akwate kama chipwe ku songo lia mazalo jenyi, eswe waze akwachileko, yahinduka ku misongo yo.
Footnotes
^ Hanji “mujimu.”
