Asonekene Mateu 15:1-39
15 Hohene amwe alongeshi a shimbi ni A-Fwariseu akatukile ku Yerusaleme, yakundama kuli Yesu ni kwamba ngwo:
2 “Mumu liaka tumbaji twe keshi kukaula mianda ya tulamba twetu? Chakutalilaho, ayo keshi kusana ku moko mba alie.”
3 Yesu yaakumbulula ngwenyi: “Mba mumu liaka yenu kunushi kwononokena shimbi ja Zambi mumu lia ndako jenu?
4 Chakutalilaho, Zambi kambile ngwenyi, ‘Lemesa tatenu ni noko;’ chikwo nawa, ‘Yoze matuka tato hanji naye, akamushihe.’
5 Alioze yenu nwakwamba ngwenu, ‘Mweswawo mamba kuli tato hanji kuli naye ngwenyi: “Yuma yeswe nguli nayo yize te natamba kukwaha, yili mulambu kuli Zambi,”
6 mutu wacho katelele kulemesa tato.’ Ha chikuma chino, yenu nwakulelesa liji lia Zambi mumu lia mianda yenu.
7 Yilembekese, Izaia kaprofetezele kanawa hakutwala kuli yenu, muze ambile ngwenyi:
8 “Atu wano kakungulemesa wika ni kanwa, alioze mbunge jo jili kusuku chinji ni yami.
9 Kananungu ni kunguwayila chamokomoko, mumu kakulongesa mianda ya atu ngwe shimbi ja Zambi.”
10 Chocho yasanyika mbunga hanga akundame kuli iye, mba yaalweza ngwenyi: “Panjikenu, nunyingike ulumbunwiso wa maliji wano:
11 Chuma chize chakunjila mu kanwa lia mutu, kuchishi kumupihisa, alioze chize chakutuhuka mu kanwa, che chakumupihisa.”
12 Hohene, tumbaji yeza yamulweza ngwo: “Unanyingika ngwe A-Fwariseu katalinga ha kwivwa yize wamba?”
13 Iye yakumbulula ngwenyi: “Mutondo weswe uze Tata uli mu malilu katumbile, makautukula.
14 Kanda nwapala. Ayo kali tupuputa, alioze kanazange kusongwela akwo. Nyi ngwe kapuputa masongwela kapuputa ni mukwo, eswe maholokela mu wina.”
15 Petulu yakumbulula ngwenyi: “Tulumbunwine chishima chino.”
16 Mba iye yamba ngwenyi: “Shina ni yenu nawa kanda nuchipwa ni ulumbunwiso?
17 Shina kunwanyingikine ngwenu, yeswe yize mutu akulia yakupalika mu jimo, mba mayituhwisa ni kuyimbila mu kumba?
18 Kashika, yeswe yize yakutuhuka mu kanwa yakukatuka ku mbunge, yuma yino ye yakupihisa mutu.
19 Chakutalilaho, ku mbunge kwe kwakukatuka manyonga api ngwe: kushiha atu, upangala, utanji, wiji, kuhanjika mahuza ni kutukana.
20 Yuma yino ye yakupihisa mutu, alioze kulia chakuhona kusana ku moko, kuchishi kupihisa mutu.”
21 Muze Yesu hakatukako, yaya mu chifuchi cha Teru ni Sendone.
22 Kuzekwene, umwe pwo Ka-Fwinisha* yoze te watwama mu chifuchi chacho, yakundama kuli iye ni kukololoka ngwenyi: “Mwene, Mwana wa Ndawichi, nguvwile kama keke. Mwanami wa pwo kali ni ndemoniu yoze wakumupinjisa chinji.”
23 Alioze, Yesu kamukumbulwile liji ni limwe. Kashika, tumbaji twenyi yeza ni kumwita ngwo: “Muhume aye, mumu kanatukaujola chinji ni kukololoka.”
24 Iye yakumbulula ngwenyi: “Kanakangutuma wika kuli mapanga waze hanatoko a mu zuwo lia Izalele.”
25 Alioze, pwo yakundama, yaliumba kuli iye ni kwamba ngwenyi: “Mwene, ngukwase kama!”
26 Yesu yamukumbulula ngwenyi: “Kuchalitele kwanda kulia cha ana hanga achihane kuli ana-a-tuwa.”
27 Pwo yakumbulula ngwenyi: “Chochene, Mwene, alioze kwamba umwenemwene, chipwe ana-a-tuwa kakulia yifwenyu-fwenyu yize yakuholoka mushi lia mesa ya akako.”
28 Yesu yamukumbulula ngwenyi: “Yena pwo, ufulielo we unene. Chilingiwe kuli yena kulita ni chize unazange. Kukatuka hazehene, mwanenyi wa pwo yahinduka.
29 Mba Yesu yakatukako, yaya hakamwihi ni Kalunga-lwiji wa Ngalileya, yakanduka ku mulundu, yatwamako.
30 Chocho mbunga yiyikundama kuli iye, yamunehena yitonji, yilema, tupuputa, tumama ni akwa-misongo yikwo, yaatumbika ku molu jenyi, iye yaauka.
31 Chocho, mbunga yakomoka ha kumona tunaye kanahanjika, yitonji kanahinduka, yilema kanende ni tupuputa kanamono, mba yahalisa Zambi wa Izalele.
32 Yesu yasanyika tumbaji twenyi, yaalweza ngwenyi: “Keke ngunevwila mbunga yino, mumu kali ni yami ha matangwa atatu, chikwo nawa keshi ni yize malia. Chazangile kwecha hanga aye ni zala, mumu mahasa kulezumuka mu jila.”
33 Alioze, tumbaji yamuhula ngwo: “Ku chihela chino kwahola chize, kulihi mutuwana mbolo jize jinakumbana hanga mbunga yipwahaha alie akute?”
34 Chocho, Yesu yaahula ngwenyi: “Mbolo jingahi nuli najo?” Ayo yakumbulula ngwo: “Shimbiali ni tumwe tuyishi.”
35 Kashika muze halweza mbunga hanga atwame hashi,
36 mba yanda je mbolo shimbiali ni yishi, muze halemba, yajipalwola yajihana kuli tumbaji twenyi, mba tumbaji yajihana kuli mbunga.
37 Eswe yalia yakuta, mba tumbaji yazalisa mitonga* shimbiali yinene-yinene ya too ni yipalupalu yize yasalileho.
38 Waze alile kapwile 4,000, a malunga kuwezako mapwo ni ana.
39 Muze hashika mbunga, yanjila mu wato, yaya mu chifuchi cha Mandala.
