Asonekene Mateu 17:1-27
17 Muze matangwa asambano hapalika, Yesu yasanyika Petulu, Tiangu ni mwana-kwo Yoano, yakanduka no ukawo ku umwe mulundu usuku.
2 Kokwene iye yalumuka kumeso jo, mba ku meso jenyi yikuputuka kuhenya ngwe tangwa, ni mazalo jenyi yapeyima ngwe pangu.
3 Hohene, Mose ni Eliya, yasoloka kuli ayo, kanahanjika ni Yesu.
4 Chocho, Petulu yalweza Yesu ngwenyi: “Mwene, chili chipema kupwa hano. Nyi muzanga, mungutunga mbalaka jitatu hano, yimwe ya yena, yikwo ya Mose, yeka ya Eliya.”
5 Muze Petulu te machihanjika, limwe lelwa lia peyima yiliazulamina, susumuku, liji limwe yiliza mu lelwa ngwo: “Yono mwe Mwanami, nakumuzanga chinji, muli iye nakuwahilila. Mupanjikenu.”
6 Ha kwivwa maliji jacho, tumbaji yafulamana hashi, yevwa woma unji.
7 Yesu yakundama kuli ayo, yaakwata, yamba ngwenyi: “Katukenu. Kanda nwivwa woma.”
8 Muze ayo hahetula meso, kamwene nawa mutu niumwe, alioze Yesu wika.
9 Shimbu te ayo machipalumuka ha mulundu, Yesu yaakanjisa ngwenyi: “Kanda nulweza niumwe mutu usolwelo uno, ndo haze mwe Mwana-mutu makamuhindwisa hakachi ka afu.”
10 Alioze, tumbaji twenyi yamuhula ngwo: “Mba mumu liaka alongeshi a shimbi akwamba ngwo, Eliya katamba kwiza chitangu?”
11 Iye yaakumbulula ngwenyi: “Chochene, Eliya kumeza, makalulieka yuma yeswe.
12 Pundu ngunambe kuli yenu ngwami, Eliya haneza, alioze atu kamunyingikine, yalinga kuli iye cheswacho azangile. Chizechene nawa, Mwana-mutu makamona lamba ku moko jo.”
13 Mba tumbaji yanyingika ngwo, te kanaalweza hakutwala kuli Yoano Chipapachisa.
14 Muze ahetele kuze te kuli mbunga, umwe lunga yakundama kuli Yesu, yaliumba ni kwamba ngwenyi:
15 “Mwene, ivwila kama keke mwanami wa lunga, mumu iye mukwa-chikonya, kanayiza. Kanji-kanji kakulimbukila ha kahia ni mu meya.
16 Namunehanga kuli tumbaji twe, alioze ayo kahashile kumuuka.”
17 Yesu yakumbulula ngwenyi: “Yenu chisemuko chipi, kuchishi ufulielo, ndo ha mwaka uka mungununga hamwe ni yenu? Ndo ha mwaka uka mungulihumikiza ni yenu? Munehenu kuli yami.”
18 Hazehene, Yesu yatenukina ndemoniu, mba ndemoniu yatuhuka, kukatuka ha tangwa lize, mwana yahinduka.
19 Ha shimbu lizeliene, tumbaji yakundama kuli Yesu ku tenga ni kumuhula ngwo: “Mumu liaka yetu kutwahashile kutuhwisa spiritu yino ya luchisa?”
20 Iye yaakumbulula ngwenyi: “Mumu nuli ni ufulielo ukehe. Pundu ngunanulweze ngwami: Nyi munupwa ni ufulielo ngwe luchichi wa mosetate, munwamba ku mulundu uno ngwenu: ‘Tutuluka kuno yako akuze’ newo muututuluka, kukushi chuma nichimwe chize muchipwa chikalu kuli yenu.”
21 * ——
22 Muze te analikungulula ku Ngalileya, Yesu yaalweza ngwenyi: “Mwana-mutu kumakamukunjika ku moko ja atu,
23 ayo makamushiha, mba ha tangwa liamuchitatu, kumakamuhindwisa.” Ha kuchivwa, tumbaji yevwa yinyengo yinji.
24 Muze ahetele ku Kafwanaume, akwa-kufwetesa lijimu lia drakma jaali,* yakundama kuli Petulu ni kumuhula ngwo: “Shina longeshi ye keshi kufweta lijimu lia drakma jaali?”
25 Petulu yakumbulula ngwenyi: “Ewa, kakufweta.” Alioze, muze hanjila mu zuwo, Yesu yalianga kumuhula ngwenyi: “Kuchi wanyonga Semone? Mianangana ja hashi kuli aya akutambula milambu hanji lijimu lia mutu ni mutu? Kuli ana jo nyi kuli yilambala?”
26 Muze Petulu hakumbulula ngwenyi: “Kuli yilambala,” Yesu yamulweza ngwenyi: “Nyi chocho, ana keshi kufweta.
27 Alioze, yako ku kalunga-lwiji, ukonge kazambu mu meya, yishi mutangu yoze mukwata, muze mumwazulula mu kanwa, muwanamo lumbongo wa prata.* Mwande umufwete kuli ayo, hali yami ni yena, hanga tuchine kwatalingisa.”
