Asonekene Mateu 18:1-35
18 Ha ola yacho, tumbaji yakundama kuli Yesu, yamuhula ngwo: “Mu Wanangana wa mu malilu iya munene wahiana akwo?”
2 Chocho yasanyika kanuke, yamusa mukachi ko,
3 yamba ngwenyi: “Ngunanulweze pundu ngwami: Nyi kunwalumukine nupwe ngwe twanuke kunuchi kanjila mu Wanangana wa mu malilu.
4 Kashika, mweswawo malikehesa ngwe kanuke yono, mwe munene mu Wanangana wa mu malilu;
5 ni yoze matambula kanuke ngwe yono mu jina liami, yami nawa anatambula.
6 Alioze mweswawo matalingisa umwe wa kuli wano akepe waze akufuliela muli yami, muchilita kumukasa liwe linene lia kutwa nalio ha kota yenyi, ngwe lize chimbulu akujingisa ni kumushimbamisa ha jinga lia kalunga-lwiji.
7 “Lamba kuli akwa-hashi mumu lia yuma yize yakwatalingisa! Kwamba pundu, yitalingiso kumuyipwako lume, alioze lamba kuli mutu yoze maneha chitalingiso!
8 Kashika, nyi kwoko hanji kulu lie liakukuvulumwisa,* lipatule ulimbile kusuku. Shinaho ukanjile mu mwono wamwenemwene chitonji hanji chilema, kuhiana akakumbile ni moko je eswe aali hanji ni molu eswe aali mu kahia ka mutolo.
9 Chikwo nawa, nyi liso lie liakukuvulumwisa,* lichize ulimbile kusuku. Shinaho kuzuka mwono ni liso limuwika, kuhiana kukumbila ni meso eswe aali mu Ngehena ya kahia.
10 Kanyamenu hanga nuhone kulelesa umwe wa kuli wano akepe, pundu ngunanulweze ngwami, angelo jo waze ali mu malilu, kakumona ku meso ja Tata matangwa eswe.
11 * ——
12 “Kuchi nunanyongo? Nyi mutu kali ni mapanga 100 mba umwe wa kuli ayo matoka, shina kechi kuhichika 99 ku milundu, aye ni kufupa panga yoze watoka?
13 Nyi mamuwana, ngunanulweze pundu ngwami, mawahilila chinji ni panga wacho kuhiana 99 waze katokele.
14 Chizechene nawa, Tata uli mu malilu, kazangile niumwe wa kuli wano akepe atoke.
15 “Chikwo nawa, nyi ndumbwe makuvulumuna, yako umulweze upi uze alinga alioze ukawenu. Nyi makupanjika wazuka ndumbwe.
16 Alioze nyi kakupanjikile, yako ni mutu umuwika chipwe aali hanga mu kanwa lia yela aali hanji atatu, yuma yeswe yize nunambe yipwe ni shindakenyo.
17 Nyi iye kanupanjikile lweza chikungulwila, nyi kapanjikile chikungulwila, akapwe kuli yena ngwe mukwa-mavungu ni mukwa-kufwetesa lijimu.
18 “Ngunanulweze pundu ngwami: Cheswacho munukasa hano hashi, hanachikase kulu mu malilu, cheswacho munukasulula hano hashi, hanachikasulula kulu mu malilu.
19 Cheka nawa ngunanulweze pundu ngwami: Nyi aali a kuli yenu hano hashi, malivwashana hanga ete chuma cheswacho chilemu, makanwahacho kuli Tata yoze uli mu malilu.
20 Mumu kuze kuli atu aali hanji atatu analikungulula mu jina liami, ni yami nguli mukachi ko.”
21 Petulu yakundama kuli Yesu ni kumuhula ngwenyi: “Mwene, yisuho yingahi natamba kukonekena ndumbwami nyi manguvulumuna? Ndo yisuho shimbiali nyi?”
22 Yesu yamukumbulula ngwenyi: “Ngunakulweze ngwami, hi wika ko yisuho shimbiali, alioze ndo yisuho 77.
23 “Kashika, Wanangana wa mu malilu uli ngwe mwanangana yoze wazangile kwalula upite wenyi ni tuvumbi twenyi.
24 Muze aputukile kuwalula, yamunehena umwe mutu yoze te umuli ni kongo lia 10,000 lia talentu.*
25 Alioze amu te keshi ni uhashi wa kufweta kongo liacho, mwata wenyi yatuma hanga amulanjise hamuwika ni mukwo-pwo ni ana jenyi ni yuma yeswe yize apwile nayo mba afwete kongo liacho.
26 Chocho ndungo wacho yafulamana hashi ni kuliumba ngwenyi: ‘Mwata shimbwila kama, mba mungufweta yuma yeswe.’
27 Mumu lia keke, mwata wenyi yamutusula ni kumukonekena kongo lienyi.
28 Alioze muze ndungo yoze atuhukile, yaliwana ni ndungo-ni-mukwo yoze te uli ni kongo lienyi lia 100 wa ndenariu.* Yamukwata, yamwoka ha muliwu ni kumwamba ngwenyi: ‘Ngufwete kongo liami.’
29 Ndungo-ni-mukwo yafulamana hashi ni kuliumba ngwenyi: ‘Shimbwila kama mba mungufweta.’
30 Alioze, iye katayijile. Yatuma kumusa mu zuwo lia ususu ndo ni haze mamufweta kongo.
31 Muze ndungo-ni-akwo amwene yize yalingiwile, yevwa chinyengo chinji, yaya ni kulweza mwata wo yuma yacho.
32 Mba mwata wenyi yamusanyika, yamwamba ngwenyi: ‘Yena ndungo mupi, muze waliumbile kuli yami ngunakakukonekena kongo lie lieswe.
33 Kuma te kuwatambile kuvwila ndungo-ni-mukwenu keke, ngwe chize yami ngunakakuvwila keke?’
34 Chocho mwata wenyi yamuvwila wuli, yamuhana kuli tufunga hanga amuse mu zuwo lia ususu ndo muze mafweta kongo lieswe.
35 Tata uli mu malilu che makalinga kuli yenu, nyi mweswe wa kuli yenu mahona kukonekena ndumbwenyi ni mbunge yenyi yeswe.”
Footnotes
^ Hanji “liakukutalingisa.”
^ Hanji “liakukutalingisa.”
^ Tala Apendice A3.
^ Tala Apendice B14.
^ Tala Apendice B14.
