Asonekene Mateu 2:1-23
2 Muze Yesu hasemuka mu Mbeteleme ya Yundeya ha matangwa ja mwanangana Heronde, akwa-kuhengwola tutongonoshi waze akatukile ku Chivumbuko yaheta mu Yerusaleme,
2 yahula ngwo: “Kulihi ali yoze wasemuka hanga apwe mwanangana wa A-Yunda? Muze te tuchili ku Chivumbuko, twamonanga katongonoshi wenyi, kashika tweza hanga tumuhalise.”*
3 Muze Mwanangana Heronde hachivwa, yalipikala chinji hamwe ni atu eswe mu Yerusaleme.
4 Chocho yakungulula asasendote eswe a lutwe ni alongeshi a shimbi* ni kwahula kuze Kristu te masemukina.
5 Ayo yamukumbulula ngwo: “Mu Mbeteleme ya Yundeya, mumu che asonekene kupalikila muli umwe profeta ngwenyi:
6 ‘Yena Mbeteleme wa mu Yunda, hi uli mukepe ko hakachi ka akwa-kuyula ja A-Yunda, mumu mukwa-kuyula yoze makafunga atu jami A-Izalele makatuhuka muli yena.’”
7 Hohene, Heronde yasanyika ku tenga akwa-kuhengwola tutongonoshi hanga amulweze tangwa lize katongonoshi asolokele.
8 Muze haatuma ku Mbeteleme, yaalweza ngwenyi: “Yeenu nufupe kanawa mwe mwana, muze munumuwana, tweyenu nungutoweze hanga ni yami nguye ni kumuhalisa.”
9 Muze ayo hevwa maliji a mwanangana, yaya, mba yamona katongonoshi yoze amwene ku Chivumbuko, kanatetekela kulutwe lio, mba katongonoshi wacho yamana ha chihela haze hapwile mwe mwana.
10 Muze amwene katongonoshi, yawahilila chinji.
11 Ha kunjila mu zuwo, ayo yamona mwana hamwe ni naye Maria, yafulamana ni kuhalisa mwe mwana. Yanda upite wo, yamwaha yawana: Oru, libanu ni mira.
12 Alioze, Zambi yaatoweza mu chilota hanga achine kuhiluka kuli Heronde, chocho ayo yapalikila mu jila yeka hanga aye kumahio.
13 Muze o haya, mungelo wa Yehova* yasoloka kuli Yosefwe mu chilota ni kumulweza ngwenyi: “Katuka, anda mwana ni naye, uchinyine ku Engitu, ukatwameko ndo muze mungukakutoweza. Mumu Heronde kanafupu kushiha mwe mwana.”
14 Hazehene Yosefwe yakatuka, yanda mwana ni naye ha ufuku, yaya ku Engitu.
15 Yatwamako ndo ha kufwa cha Heronde. Chino yichimanununa maliji a Yehova* waze ambile kupalikila muli profeta wenyi, ngwenyi: “Hingunatambika mwanami akatuke ku Engitu.”
16 Muze Heronde hanyingika ngwenyi kamwonga kuli akwa-kuhengwola tutongonoshi, yevwa uli unji, yatuma kushiha ana a malunga eswe a miaka yiali ndo mushi, a mu Mbeteleme ni yihunda yikwo yalisulangana nayo, kulita ni mashimbu waze amulwezele kuli akwa-kuhengwola tutongonoshi.
17 Chocho maliji a profeta Jeremia yamanunuka, anambe ngwo:
18 “Evwile mbimbi mu Rama, kulila ni kunenganyana. Te Rakele unalilila ana jenyi, katayijile amulembejeke, mumu ana jenyi akuhi.
19 Muze Heronde hafwa, mungelo wa Yehova* yasoloka kuli Yosefwe mu chilota, mu Engitu,
20 ngwenyi: “Katuka, anda mwana ni naye, uhiluke mu chifuchi cha Izalele, mumu waze afupile kushiha mwana hanafu.”
21 Hohene, iye yakatuka, yanda mwana ni naye, yahiluka ku chifuchi cha Izalele.
22 Alioze, muze Yosefwe evwile ngwo, Arkelau kanayulu mu chihela cha tato Heronde, yevwa woma wa kuhilukako. Chikwo nawa, Zambi yatoweza Yosefwe mu chilota, mba yaya mu mbonge ya Ngalileya.
23 Yaya ni kutwama mu chihunda chize avuluka ngwo, Nazare, hanga maliji ja aprofeta amanunuke, anambe ngwo: “Kumakamuvuluka ngwo, Ka-Nazare.”
Footnotes
^ Hanji “tufulamane kumeso jenyi.”
^ Hanji “akwa-kusoneka shimbi.”
^ Tala Apendice A5.
^ Tala Apendice A5.
^ Tala Apendice A5.
