Asonekene Mateu 20:1-34
20 “Mumu Wanangana wa mu malilu unapu ngwe mwenya-zuwo yoze wakatukile ha chimene, aye ni kufupa akwa-milimo hanga amulimine munda wa vinyu.
2 Muze halitesa ni akwa-milimo hanga aafwete ndenariu* yimuwika ha tangwa, yaatuma mu munda.
3 Ha ola yamuchitatu muze atuhukile cheka, yamona atu akwo ha chitanda waze te keshi milimo;
4 yaalweza ngwenyi: ‘Ni yenu nawa, yeenu nukalakale mu munda wami wa vinyu, mungunwaha fweto yalita.’
5 Chocho ayo yaya. Mwenya-milimo yaya nawa ha ola yamuchisambano ni yamuchilivwa, yalinga chizechene.
6 Cheka nawa, ha ola 11, yatuhuka yawana atu akwo kanamana hazehene, iye yahula ngwenyi: ‘Mumu liaka nuli hano tangwa lia muundu chakuhona kukalakala?’
7 Ayo yakumbulula ngwo: ‘Mumu niumwe mutu katusanyikine hanga tukalakale.’ Yaalweza ngwenyi: ‘Ni yenu, yeenu mu munda wa vinyu.’
8 “Muze hikwapwa chingoloshi, mwenya-munda yalweza kafufuchi kenyi ngwenyi: ‘Sanyika akwa-milimo wehe fweto lio, putuka ni akasula mba uhwise ni atangu.’
9 Muze akwa-milimo a ola 11 ahetele, mutu ni mutu yamwaha ndenariu* yimuwika.
10 Kashika muze akwa-milimo atangu ahetele, yanyonga ngwo maaha fweto linene kuhiana akwo, alioze ni ayo yafweta ndenariu* yimuwika mutu ni mutu.
11 Muze hatambula fweto, yaputuka kulinyenyeta kuli mwenya-milimo
12 ni kwamba ngwo: ‘Wano eza kasula kakalakala ola yimuwika, chipwe chocho waaha fweto limuwika ni yetu twakalakala tangwa lia muundu ni kuwema ni mwalwa!’
13 Alioze, mwenya-milimo yakumbulula kuli umwe wa kuli ayo ngwenyi: ‘Mukwetu, chakulingile upi niumwe. Ngwami twalitesanga ngwetu, mungukufweta ndenariu* yimuwika?
14 Tambula fweto lie, yako. Yami ngunazange kufweta yono wakasula fweto limuwika ni yena.
15 Shina chishi ni ulite wakulinga yize ngunazange ni yuma yami? Nyi hanji wevwa chipululu mumu lia yuma yipema yize nalinga hali ayo?’
16 Chocho, akasula makapwa atangu, atangu makapwa akasula.”
17 Muze te anakanduka ku Yerusaleme, Yesu yasanyika tumbaji twenyi 12 ku tenga ukawo, yaalweza mu jila ngwenyi:
18 “Panjikenu! Tunakanduka ku Yerusaleme, mba mwe Mwana-mutu makamuhana kuli asasendote a lutwe ni alongeshi a shimbi. Ayo makamuhisa hanga akamushihe,
19 ni kumukunjika kuli akwa-mavungu akamukekune, akamulambe ni shikote ni kumushihila ha mutondo; mba ha tangwa liamuchitatu, kumakamuhindwisa.
20 Hohene, naye ya ana ja Zebedeu hamuwika ni ana jenyi, yakundama kuli Yesu, mba mwe naye yafulamana kumeso jenyi, yamwita chimwe.
21 Yesu yamuhula ngwenyi: “Yika unazange?” Iye yakumbulula ngwenyi: “Amba kama hanga ana jami wano aali, akatwame umwe ku kwoko lie lia utata, mukwo ku kwoko lie lia umama, mu Wanangana we.”
22 Yesu yakumbulula ngwenyi: “Yenu kunwanyingikine yize nunechi. Shina munuhasa kunwa musenge uze yami ngunambe kunwa?” Ayo yamukumbulula ngwo: “Ewa, mutuhasa.”
23 Iye yamba kuli ayo ngwenyi: “Chochene munukanwa musenge wami, alioze kutwama ku kwoko liami lia utata ni ku kwoko liami lia umama hi ulite wami ko. Yihela yino yili ya waze Tata hanaaluliekelayo.”
24 Muze tumbaji akwo kumi achivwile, yevwila kupiha wano aali, mwana-kwo ni yayo.
25 Alioze, Yesu yaasanyika, yamba kuli ayo ngwenyi: “Nunanyingika ngwenu, manguvulu ja akwa-mavungu kakulipwisa miata hali ayo, ni atu alemu kakuyula hali ayo.
26 Kuchatambile kupwa chocho hakachi kenu, alioze yoze mazanga kupwa munene hakachi kenu, mwenawo watamba kunulingila,
27 ni yoze mazanga kupwa mutangu hakachi kenu, mwe watamba kupwa ndungo yenu.
28 Chizechene ngwe Mwana-mutu kakejile hanga amulingile, alioze hanga alingile akwo ni kuhana mwono wenyi ngwe ukuule hali anji.”
29 Ha kutuhuka mu Yeriku, mbunga yinene yiyimukaula.
30 Amwe tupuputa aali te kanatwama ku sesa lia jila, muze hevwa ngwo Yesu kanapalika, yakololoka ngwo: “Mwene, Mwana wa Ndawichi, tuvwile kama keke!”
31 Alioze, mbunga yaatenukina ni kwaholesa. Nihindu ayo yakololoka chikolo ni kwamba ngwo: “Mwene, Mwana wa Ndawichi, tuvwile kama keke!”
32 Mba Yesu yamana, yaasanyika ni kwamba ngwenyi: “Yika nunazange hanga ngulinge hali yenu?”
33 Tupuputa yamukumbulula ngwo: “Mwene, tunazange kama hanga meso jetu alaule.”
34 Yesu yeevwila keke, yakwata mu meso jo, hazehene yaputuka kumona, yamukaula.
