Asonekene Mateu 22:1-46
22 Yesu yahanjika no nawa mu yishima, ngwenyi:
2 “Wanangana wa mu malilu uli ngwe umwe mwanangana yoze waluliekele chiwanyino cha umbachiso wa mwanenyi wa lunga.
3 Yatuma ndungo jenyi asanyike atu hanga eze ha chiwanyino cha umbachiso, alioze atu jacho yalituna kwiza.
4 Cheka nawa, yatuma ndungo akwo ngwenyi: ‘Lwezenu atu waze tunasanyika ngwenu: “Hinalulieka kulia, hinashiha ngombe ni yimuna jami a maji, yuma yeswe hiyaswa. Tweyenu ha umbachiso.”’
5 Alioze atu waze asanyikine, yalengulula, yaya kwo, umwe ku munda wenyi, mukwo yaya ni kulanjisa yuma yenyi.
6 Mba akwo, yakwata ndungo jenyi, yaalamba ni kwashiha.
7 “Mwanangana yevwa uli, yatuma maswalale jenyi, yashiha atu jacho ni kwocha mbonge yo.
8 Mba yalweza ndungo jenyi ngwenyi: ‘Chiwanyino cha umbachiso hitwachilulieka, alioze atu waze twasanyikanga katelele.
9 Kashika, yeenu mu matapalo anatuhuka haze lia mbonge, nusanyike mutu mweswawo munuwana eze ha chiwanyino cha umbachiso.’
10 Chocho, ndungo yaya mu matapalo yakunga atu eswe waze awanyine, apema ni api, mba zuwo lia umbachiso yilizala too ni ngeji.
11 “Muze mwanangana hanjila hanga atale atu waze asanyikanga, yamona umwe mutu yoze kazalile mazalo a umbachiso.
12 Yamwamba ngwenyi: ‘Mukwetu, kuchi wanjila muno kuwazalile mazalo a umbachiso?’ Mutu wacho yahola kuluu.
13 Hohene, mwanangana yalweza ndungo jenyi ngwenyi: ‘Mukasenu ku moko ni ku molu, mumbilenu haze mu milima. Henaho makalilila mbimbi ni kulikeleketa ku mazo.’
14 “Mumu atu waze hanasanyika anji, alioze akusakula akehe.”
15 Chocho A-Fwariseu yaya yamutwama punga hanga amukwate ha yize mamba.
16 Mba yamutumina tumbaji two, hamwe ni atu ja Heronde, hanga amulweze ngwo: “Longeshi, tunanyingika ngwetu yena wakuhanjika umwenemwene ni kulongesa jila ya Zambi kulita ni umwenemwene, kushi kuvwila atu woma, mumu kuwatwamine ni katonde.
17 Kashika, tulweze kama, kuchi unanyongo? Shina chinalite kufweta lijimu kuli Sesare, nyi ka?”
18 Alioze, Yesu ha kunyingika manyonga jo api, yamba ngwenyi: “Yilembekese, mumu liaka nunangweseka?
19 Ngulwezenu lumbongo wa lijimu.” Yamunehena lumbongo* umuwika.
20 Iye yaahula ngwenyi: “Chizulie chino chiliho ni chisoneko yaya?”
21 Yamukumbulula ngwo: “Ya Sesare.” Mba iye yaalweza ngwenyi: “Kashika, fwetenu kuli Sesare yuma ya Sesare, alioze kuli Zambi, yuma ya Zambi.”
22 Muze achivwile, yakomoka, yamuhichika yaya kwo.
23 Ha tangwa lizeliene, A-Satuseu waze akwamba ngwo, uhindukilo wa afu watwamineko, yeze kuli Yesu, yamuhula ngwo:
24 “Longeshi, Mose kambile ngwenyi: ‘Nyi lunga umwe mafwa kahichikile ana, mwana-kwo hanji yayo katamba kumbata tuliwa hanga amusemene ana.’
25 Kwapwile malunga shimbiali a mu jimo limuwika. Mutangu yambata pwo, alioze yafwa, amu kakasemene nenyi, yahichika pwo kuli mwana-kwo.
26 Chino che chalingiwile nawa kuli wamuchiali, wamuchitatu ndo kuli eswe shimbiali.
27 Kusulaho, ni mwe pwo neye yafwa.
28 Ha tangwa lia uhindukilo, pwo wacho makapwa waya, hakachi ka malunga wano shimbiali? Mumu eswe kalimbachile nenyi.”
29 Yesu yaakumbulula ngwenyi: “Yenu nunatoko, mumu kunwanyingikine nichimwe chipwe Yisoneko, chipwe ndundo ja Zambi;
30 mumu ha uhindukilo wa afu, malunga kechi kambata, chipwe mapwo kechi kaahangisa ku malo, alioze ayo makapwa ngwe angelo mwilu.
31 Ha chikuma cha uhindukilo wa afu, shina kunwatangile yize Zambi ambile ngwenyi:
32 ‘Yami nguli Zambi ya Apalahama, Zambi ya Izake ni Zambi ya Yakomba’? Iye kali Zambi, hi wa afu ko, alioze wa waze ali ni mwono.”
33 Muze mbunga evwile chocho, yakomoka chinji ni malongeso jenyi.
34 Muze A-Fwariseu hevwa ngwo, Yesu haholesa A-Satuseu, yalikungulula mu chizavu chimuwika.
35 Mba umwe wa kuli ayo, yoze wanyingika kanawa Shimbi, yeseka Yesu ha kumuhula ngwenyi:
36 “Longeshi, Shimbi yika yilemu yahiana jeswe?”
37 Iye yamukumbulula ngwenyi: ‘“Zanga Yehova* Zambi ye, ni mbunge ye yeswe, ni mwono we weswe, ni kunyonga che cheswe.’
38 Yino ye shimbi yitangu, yilemu.
39 Yamuchiali yalifwa ni yino, yili ngwo: ‘Zanga mwenyembo we ngwe chize wakulizanga yena mwene.’
40 Ha shimbi jino jaali, henaho hanakatuka Shimbi ni Yisoneko ya Aprofeta.”
41 Muze A-Fwariseu te anakunguluka, Yesu yaahula ngwenyi:
42 “Yika nwakunyonga hali Kristu? Kali mwana waya?” Ayo yamukumbulula ngwo: “Mwana wa Ndawichi.”
43 Iye yaahula ngwenyi: “Mba mumu liaka Ndawichi, kupalikila mu spiritu yisandu, amuvulukile ngwenyi Mwene, ha kwamba ngwenyi:
44 ‘Yehova* hanambe kuli Mwene wami ngwenyi: “Twama ku kwoko liami lia utata, ndo muze mungukasa akwa-kole je kushi lia yiliato ye’”?
45 Kashika, nyi Ndawichi kakumusanyika ngwenyi, Mwene, mba kuchi mapwa nawa mwanenyi?”
46 Niumwe mutu kakahashile kumukumbulula, kukatuka ha tangwa lize, niumwe kahashile kumuhula nawa.
