Asonekene Mateu 24:1-51
24 Muze Yesu te anatuhuka mu tembele, tumbaji twenyi yakundama kuli iye hanga amulweze mazuwo ja tembele.
2 Alioze yaalweza ngwenyi: “Nunamono yuma yino yeswe, nyi? Pundu ngunanulweze ngwami, kechi kahichika liwe nilimwe helu lia liwe likwo, lize kechi kapuzula.”
3 Muze Yesu te anatwama ha Mulundu wa Olevwe, tumbaji twenyi yakundama kuli iye ukawo, ni kumuhula ngwo: “Tulweze kama, shimbu lika yuma yino muyikalingiwa? Chikwo nawa, chilayi chika muchikasolola kwiza che, ni kumanunuka cha miaka yino?”
4 Yesu yaakumbulula ngwenyi: “Kanyamenu hanga niumwe achine kunupiangula,
5 mumu anji makeza mu jina liami ni kwamba ngwo: ‘Yami nguli Kristu,’ mba makapiangula atu anji.
6 Munukevwa zungo lia jita ni sango ja jita. Kanyamenu, kanda nwivwa woma, mumu yuma yino yatamba kulingiwa, alioze hi songo ko.
7 “Vungu limwe mulikasa jita ni vungu likwo, wanangana umwe muukalimika ni wanangana ukwo, kumukukapwa zala ni minyiko ku yihela yeka ni yeka.
8 Yuma yino yeswe kumuyikapwa uputukilo wa lamba.
9 “Kashika, atu makanuhungumiona ni kunushiha, makanuvwila kole kuli akwa-mavungu eswe mumu lia jina liami.
10 Chikwo nawa, atu anji makatalinga ni kulikunjika umwe ni mukwo, ni kulivwila kole umwe ni mukwo.
11 Aprofeta anji a mahuza makasoloka ni kupiangula atu anji;
12 mumu lia kwoka cha uhulia, zango lia atu anji mulikakekema.
13 Alioze, yoze manyongonona ndo ku songo, makamulamwina.
14 Sango jino jipema ja Wanangana kumakajambujola hashi heswe, jikapwe shindakenyo ku mavungu eswe, mba songo mulikeza.
15 “Kashika, muze munukamona chuma cha chizelwokeso chize cha kwenyeka, ambile kuli profeta Daniele, chinamana muma musandu (mukwa-kutanga akase chinyingi),
16 hohene, waze mapwa mu Yundeya, akachinyine ku milundu.
17 Mutu yoze makapwa ha fulumba kanda akasunuka hanga ande yikumba ya mu zuwo lienyi,
18 yoze makapwa ku munda, kanda akahiluka ku zuwo hanga akande mazalo jenyi.
19 Lamba kuli tufumba, ni kuli amama waze mamwisa ana ha matangwa waze!
20 Kashika nungenu ni kulemba hanga kuchina chenu chikahone kupwa ha mashimbu a chishika chipwe ha tangwa lia Sambata;
21 mumu kumukukapwa luyinda munene, yoze kanda alingiwa kama chize ku uputukilo wa hano hashi ndo musono, ka, kechi keza kalingiwa nawa nilimwe tangwa.
22 Kwamba pundu, nyi kachi katepulwile matangwa waze, kachi niumwe makalilamwina wakuhi. Alioze mumu lia waze hanaatongola, matangwa jacho makaatepulula.
23 “Kashika, nyi mutu manulweza ngwenyi: ‘Talenu, Kristu kali kuno,’ hanji ngwenyi: ‘Kali akuze!’ kanda nutayiza.
24 Mumu kumukukasoloka Kristu a mahuza ni aprofeta a mahuza, makalinga yilayi yinene ni yikomokeso hanga akapiangule chipwe lume waze hanaatongola, nyi muchilita.
25 Panjikenu kanawa! Hinalianga kunutoweza.
26 Kashika, nyi manulweza ngwo: ‘Talenu, kali mu puya!,’ kanda nuyako; hanji ngwo: ‘Talenu, kali mu chipatulo cha zuwo,’ kanda nutayiza.
27 Mumu ngwe chizechene muhenyo wakukatuka ku chivumbuko ni kuhenya ndo ku chitokelo, ni kuheta cha Mwana-mutu che muchikapwa.
28 Kweswako mujimba wa mufu uli, kwenako pupa makakungulukila.
29 “Hazehene muze luyinda wa matangwa jacho mahwa, tangwa mulikalaa, ni kakweji kechi katwa mieji, tutongonoshi a mwilu makaholoka, ni ndundo ja mwilu mujikanyika.
30 Hohene chilayi cha mwe Mwana-mutu muchikasoloka mwilu, mba mavungu eswe a hashi kumakalila mbimbi, makamona mwe Mwana-mutu kaneza mu malelwa a mwilu ni ndundo ni uhenya unene.
31 Iye makatuma angelo jenyi ni liji linene lia chitavwi, ayo makakungulula waze iye hanatongola ku mbango jeswe jiwana, chize ku songo limwe lia malilu ndo ku songo likwo.
32 “Lilongesenu ha chishima chino cha mukuyu: Muze mitango yawo muyovula ni kusokoloka mafwo, nwakunyingika ngwenu, kuma lwiza hapwa hakamwihi.
33 Chizechene nawa, muze munumona yuma yino yeswe muyilingiwa, nyingikenu ngwenu, iye* hakamwihi ali, kwe ku yikolo.
34 Ngunanulweze pundu ngwami, chisemuko chino kuchichi kahwa ndo muze yuma yino yeswe muyikalingiwa.
35 Lilu ni hashi muyipalika, alioze maliji jami kechi kapalika nilimwe tangwa.
36 “Hakutwala ku tangwa lize ni ola yize, niumwe kanyingikine, chipwe angelo a mwilu, chipwe mwe Mwana, shina Tata wika.
37 Mumu chizechene ngwe ha matangwa ja Noa, chocho muchikapwa ha kuheta cha mwe Mwana-mutu.
38 Mumu chizechene ngwe ha matangwa waze, shimbu te Sanga lia Meya kanda liza, atu apwile ni kulialia ni kunwanwa, malunga apwile ni kumbata, mapwo apwile ni kwahangisa ku malo, ndo tangwa lize Noa anjilile mu ulungu,
39 kapalileko, ndo muze Sanga Lia Meya liejile ni kwahungumuna eswe, ni kuheta cha mwe Mwana-mutu che muchikapwa.
40 Malunga aali makapwa mu munda; umwe makaya nenyi, mukwo makamuhichika.
41 Mapwo aali makatwa ku utwilo; umwe makaya nenyi, mukwo makamuhichika.
42 Kashika, nungenu ni kulawola, mumu kunwanyingikine ola yize Mwene wenu meza.
43 “Alioze, nyingikenu chino: Nyi te mwenya-zuwo kananyingika ola yize mwiji meza ufuku, kachi manunga ni kulawola hanga ahone kwecha zuwo lienyi alipupe.
44 Kashika, ni yenu nawa liluliekenu, mumu kunwanyingikine ola yize Mwana-mutu meza.
45 “Iya kevwe ndungo washishika, wakanyama, yoze mwata wenyi hamwaha chiyulo helu lia ndungo akwo hanga aahe kulia ha shimbu lialita?
46 Kawaha ndungo yono, muze mwata wenyi meza, mamuwana kanalingi milimo yenyi!
47 Ngunanulweze pundu ngwami, mwata wenyi makamutongola hanga afunge yikumba yenyi yeswe.
48 “Alioze nyi ndungo wacho mupi mamba mu mbunge yenyi ngwenyi: ‘Mwata wami kanashimbula,’
49 mba maputuka kulamba ndungo-ni-akwo, ni kulialia ni kunwanwa ni yizengi,
50 mwata wa ndungo yono makeza ha tangwa lize iye keshi ni kushimbwila ni ha ola yize iye kanyingikine.
51 Mba Mwata wenyi, makamumwesa lamba linji ni kumusa ku chihela chimuwika ni yilembekese. Kwenako makalilila mbimbi ni kulikeleketa ku mazo.
Footnotes
^ Hanji “Mwana-mutu.”
