Asonekene Mateu 27:1-66
27 Muze hikwacha, asasendote eswe a lutwe ni makulwana ja atu, yakunguluka hanga alitese, amone chize mashiha Yesu.
2 Muze hamukasa, yamutwala ni kumukunjika kuli nguvulu Pilatu.
3 Mba, Yundase yoze wakunjikile Yesu, muze hamona ngwenyi, hahisa Yesu, yevwa mwongo, chocho, yahilwisa 30 a mbongo ja prata kuli asasendote a lutwe ni makulwana.
4 Yamba ngwenyi: “Navulumuna ha kukunjika manyinga ja mutu yoze keshi chitela.” Ayo yamba ngwo: “Yino kuyatutalile. Mulonga ni we!”
5 Hohene, iye yambila mbongo jacho ja prata mu tembele, yaya, yalisukika.
6 Alioze, asasendote a lutwe yanda mbongo jacho ja prata, yamba ngwo: “Kuchalitele kujisa mu utulikilo wa milambu yisandu, mumu jili mbongo ja manyinga.”
7 Muze halitesa umwe ni mukwo, yanda mbongo jacho, yaya ni kulanda munda wa tengi hanga upwe chihela cha kufunda yilambala.
8 Kashika akuvuluka munda wacho ngwo, Munda wa Manyinga ndo musono.
9 Ha kulinga chino, maliji a profeta Jeremia yamanunuka, anambe ngwo: “Ayo yanda 30 a mbongo ja prata, ndando yize asele mumu lia mutu, yoze ana amwe a Izalele amusele ndando,
10 yajihana hanga alande munda wa tengi, kulita ni yize Yehova* ambile kuli yami.”
11 Yesu te kanamana kumeso ja nguvulu, mba nguvulu yamuhula ngwenyi: “Yena uli Mwanangana wa A-Yunda nyi?” Yesu yamukumbulula ngwenyi: “Yena mwene unachambe.”
12 Alioze, muze asasendote a lutwe ni makulwana te anamulamikiza, iye kakumbulwile nichimwe.
13 Kashika, Pilatu yamuhula ngwenyi: “Kuwevwile yuma yipwahaha anakulamikiza nyi?”
14 Alioze, iye kamukumbulwile liji nilimwe, kashika, nguvulu yakomoka chinji.
15 Ha mashimbu a chiwanyino, nguvulu kapwile ni chako cha kutusula funge umuwika, yoze mbunga mazanga.
16 Ayo kapwile ni umwe funge chingalwe wa lufuma munji, yoze te avuluka ngwo Mbarapa.
17 Kashika, muze te anakunguluka, Pilatu yaahula ngwenyi: “Iya nunazange hanga ngutusule, Mbarapa nyi Yesu, yoze avuluka ngwo Kristu?”
18 Mumu Pilatu te kananyingika ngwenyi, kamukunjikile mumu lia chipululu.*
19 Chikwo nawa, muze Pilatu te anatwama ha chitwamo cha upatwilo, mukwo-pwo yamutumina maliji ngwenyi: “Kanda ulinga chuma nichimwe hali lunga yono mukwa-ululi, musono napindanga mu chilota mumu lia iye.”
20 Alioze, asasendote a lutwe ni makulwana yashinjila mbunga hanga ete Mbarapa, ashihise Yesu.
21 Nguvulu yamba kuli ayo ngwenyi: “Kuli wano aali, iya nunazange hanga ngutusule?” Ayo yakumbulula ngwo: “Mbarapa!”
22 Pilatu yaahula ngwenyi: “Mba yika natamba kulinga ni Yesu, avuluka ngwo Kristu?” Eswe yakumbulula ngwo: “Muhatenu ha mutondo wa lamba!”
23 Iye yamba ngwenyi: “Mumu liaka? Upi uka alinga?” Alioze, ayo yakololoka chikolo ngwo: “Muhatenu ha mutondo wa lamba!”
24 Muze Pilatu amwene ngwenyi, kahashile kulinga nichimwe, alioze atu te kananeha wika mbwanja, yanda meya, yasana ku moko kumeso ja mbunga, yamba ngwenyi: “Ngunasambe ku manyinga ja lunga yono. Yino yinatale hali yenwene.”
25 Atu eswe yamukumbulula ngwo: “Manyinga jenyi apwe hali yetu ni hali ana jetu.”
26 Chocho iye yatusula Mbarapa. Alioze, yatuma kulamba Yesu ni shikote, mba yamuhana hanga amushihile ha mutondo wa lamba.
27 Hohene, maswalale ja nguvulu yatwala Yesu ku zuwo lia nguvulu, chizavu cheswe cha maswalale yichimujingilika.
28 Muze hamuzula mazalo, yamujika hina lichila,
29 yayinda chipangula cha mbimbo, yamujikacho ku mutwe, yasa lumbungu mu kwoko lienyi lia chindume, yafulamana kumeso jenyi ni kumukekuna ngwo: “Tunakumeneka,* Mwanangana wa A-Yunda!”
30 Hazehene, yamufwila mate, yanda lumbungu, yaputuka kumulamba ku mutwe.
31 Muze te haahwisa kumukekuna, yamuzula hina lichila, yamujika mazalo jenyi, mba yamutwala hanga amuhate ha mutondo wa lamba.
32 Ha kutuhuka, yalitakana ni umwe lunga wa ku Serene avuluka ngwo Semone. Yamushinjila hanga ambate mutondo wa lamba.
33 Muze ahetele ku chihela avuluka ngwo, Ngolongota, liji lize linalumbunuka ngwo, Chihela cha Kola,*
34 yamwaha vinyu yakuchinga ni meya asasu hanga anwe; alioze, muze hayipaka,* yalituna kuyinwa.
35 Muze ayo hamuhata ha mutondo wa lamba, yata chela, yalitetela mazalo jenyi hakachi ko,
36 ayo yatwama kuzekwene ni kumufunga.
37 Helu lia mutwe wenyi, yasaho chisoneko cha chitela chize amusumine ngwo: “Yono mwe Yesu, Mwanangana wa A-Yunda.”
38 Mba yahata eji aali ha mitondo ya lamba hamuwika ni Yesu, umuwika sali lienyi lia utata mukwo sali lienyi lia umama.
39 Atu waze apwile ni kupalika yaputuka kuhunga mitwe, ni kumuchoka,
40 ni kwamba ngwo: “Yena wazangile kupuzula tembele ni kuyitunga nawa ha matangwa atatu, lilamwine yena mwene. Nyi uli lume mwana wa Zambi, sunuka ha mutondo wa lamba!”
41 Chizechene nawa, asasendote a lutwe hamwe ni alongeshi a shimbi ni makulwana, yaputuka kumukekuna ngwo:
42 “Walamwinyine akwo; alioze mwene kahashile kulilamwina! Iye mwe Mwanangana wa Izalele; asunuke haliapwila ha mutondo wa lamba, mba mutumufuliela.
43 Kakujikijila muli Zambi, amulamwine haliapwila, nyi kakumuzanga, mumu kambile ngwenyi: ‘Nguli Mwana wa Zambi.’”
44 Chipwe eji waze ahachile ha mitondo ya lamba sali lienyi no amuchokele.
45 Kukatuka ha ola yamuchisambano, mu chifuchi cheswe yimupwa milima pwi, ndo ha ola yamuchilivwa.
46 Ha ola ngwe yamuchilivwa, Yesu yakololoka chikolo ni liji mwilu ngwenyi: “Eli, Eli, lama sambatani?” Chino chinalumbunuka ngwo: “Zambi yami, Zambi yami, mumu liaka wangwehuka?”
47 Atu amwe waze apwileho, ha kuchivwa yamba ngwo: “Lunga yono kanasanyika Eliya.”
48 Hazehene, umwe wa kuli ayo yazomboka, yanda shiponja, yayichupika mu vinyu yapangaminya,* yayipachika ku songo lia mutondo, yamwaha hanga anwe.
49 Alioze, akwo yamba ngwo: “Mwechenu! Tutale nyi Eliya meza ni kumulamwina.”
50 Cheka nawa, Yesu yakololoka chikolo ni liji mwilu, mba yafwa.*
51 Hazehene, hina lia muma musandu, yilipulika hakachi yihanda yiali, chize kwilu ndo kwishi, hashi yihanyika, mawe yapalwoka.
52 Mafuka yazuluka, mijimba ya asandu anji waze te hanapombo mu ufwe, yiyitutuka,
53 yiyisoloka kuli atu anji, (ni atu waze te anakatuka ku mafuka muze iye te hamuhindwisa, yanjila mu limbo lisandu.)
54 Alioze, muze kapitau wa maswalale ni atu waze apwile nenyi ni kufunga Yesu amwene munyiko ni yuma yize te yinalingiwako, yevwa woma unji, yamba ngwo: “Chamwenemwene, kumana yono te Mwana wa Zambi.”
55 Kwapwile mapwo anji waze te anamanyina kusuku ni kutala. Mapwo jacho kapwile ni kwenda ni Yesu putu ku Ngalileya ni kumulingila.
56 Hakachi ko, hapwile Maria Ka-Mandala, Maria naye ya Tiangu ni Yosefwe, ni naye ya ana a Zebedeu.
57 Amu te kunayi ni kutoka, umwe lunga pichi wa ku Arimatea, te avuluka ngwo Yosefwe, yaheta, iye nawa te kambaji ka Yesu.
58 Lunga yono, yaya kuli Pilatu ni kumwita mujimba wa Yesu. Pilatu yatayiza hanga amwehewo.
59 Yosefwe yanda mujimba, yauvunga ha hina lipema lia linyu,
60 yausa mu fuka lienyi liaha lize atotele mu liwe, muze halangumuna liwe linene ndo ku chikolo cha fuka, mba yaya kwenyi.
61 Alioze, Maria Ka-Mandala ni Maria mukwo, yanunga kuzekwene, te kanatwama kulutwe lia fuka.
62 Tangwa liasulileho, muze tangwa lia Kululieka te hiliapalika, asasendote a lutwe ni A-Fwariseu, yalikungulwila kuli Pilatu,
63 yamba ngwo: “Mwata, tunewuluka muze lunga yono mukwa-mahuza te uchili ni mwono, kapwile ni kwamba ngwenyi: ‘Ha kupalika cha matangwa atatu, manguhindwisa.’
64 Kashika, tuma hanga afunge fuka ndo ha tangwa liamuchitatu, hanga tumbaji twenyi ahone kumwiya ni kulweza atu ngwo: ‘Hamuhindwisa hakachi ka afu!’ Mumu mahuza wano akasula, mahasa kupwa api chinji kuhiana atangu.”
65 Pilatu yaalweza ngwenyi: “Munuhasa kuya ni tufunga. Yeenu nufunge fuka kulita ni chize nunanyingika.”
66 Chocho, yaya ni kufunga fuka, yasa chilayi ku chikolo cha fuka kuze te kuli kwakuyika ni liwe linene, ni kusako tufunga.
Footnotes
^ Tala Apendice A5.
^ Hanji “ukwa.”
^ Hanji “vulie.”
^ Hanji “pangala.”
^ Hanji “kupanjika.”
^ Hanji “vinagre.”
^ Hanji “yahana spiritu yenyi.”
