Asonekene Mateu 28:1-20
28 Muze tangwa lia Sambata te hiliapalika, chimenemene, ha tangwa litangu lia poso, Maria Ka-Mandala ni Maria mukwo yaya ni kutala lie fuka.
2 Talenu! Kwalingiwile munyiko unene, mumu mungelo wa Yehova* kahulumukine mwilu, yaheta ku fuka, yalangumuna liwe, mba yatwamaho.
3 Chifwa chenyi chapwile ngwe muhenyo, mazalo jenyi kapwile atoma ngwe mbundu.
4 Mumu lia woma uze evwilile mungelo, tufunga yachikima, yakala mbe, yapwa ngwe hafwa.
5 Alioze, mungelo yalweza mapwo ngwenyi: “Kanda nwivwa woma, mumu ngunanyingika ngwami, nunafupu Yesu, yoze ashihile ha mutondo wa lamba.
6 Iye keshimo, mumu hamuhindwisa, ngwe chizechene iye mwene anulwezele. Tweyenu nutale homa haze te anapombo.
7 Kashika, zombokenu, yenu nulweze tumbaji twenyi ngwenu: ‘Hamuhindwisa hakachi ka afu, haliapwila, hatetekela ku Ngalileya. Kwenako munukamuwana.’ Ye neza ni kunulweza.”
8 Hohene, ayo yakatuka ku fuka kawashi-washi, ni woma ni uwahililo unji, yazomboka hanga ambulule yuma yeswe kuli tumbaji twenyi.
9 Chocho Yesu yaya ni kulitakana ni mapwo jacho, yamba ngwenyi: “Mwoyo wenu!” Ayo yakundama kuli iye, yakakaminya ku molu jenyi, yamuhalisa.
10 Yesu yaalweza ngwenyi: “Kanda nwivwa woma! Yeenu hanga nulweze mandumbu jami aye ku Ngalileya, kwenako makangumwena.”
11 Muze mapwo te achili mu jila, amwe tufunga yaya mu mbonge ni kwambulula kuli asasendote a lutwe yuma yeswe yize yalingiwa.
12 Muze halikungulula ni makulwana hanga alitese yize malinga, yahana kuli maswalale mbongo jinji ja prata,
13 yaalweza ngwo: “Ambenu ngwenu: ‘Shimbu te tunapombo, tumbaji twenyi kezanga ufuku ni kwiya mujimba wenyi.’
14 Nyi nguvulu machivwa, yetu mutumulumbunwina, kashika, yenu kunwatambile kulipikala.”
15 Chocho, yanda mbongo ja prata, yalinga chizechene aalwezele, lusango yono yalimwanga kuli A-Yunda ndo ni musono.
16 Alioze, e tumbaji 11 yaya ku Ngalileya, ku mulundu uze Yesu aashikile.
17 Muze amumwene, yafulamana kulutwe lienyi, alioze amwe yakakajana.
18 Yesu yakundama kuli ayo, yaalweza ngwenyi: “Tata hanangwehe wata weswe mwilu ni hashi.
19 Kashika, yeenu nukapwise* atu a ku mavungu eswe tumbaji, ni kwapapachisa mu jina lia Tata, ni lia Mwana, ni lia spiritu yisandu,
20 ni kwalongesa hanga ononokene yuma yeswe yize nanutumine. Nyingikenu ngwenu nguli hamuwika ni yenu matangwa eswe, ndo ku songo lia miaka yino.”
