Asonekene Mateu 4:1-25
4 Spiritu yiyisongwela Yesu mu puya hanga amweseke kuli Ndiapu.
2 Muze te halitwamina kulia ha matangwa 40 a mwalwa ni 40 a ufuku, iye yevwa zala.
3 Hohene mukwa-kweseka yeza kuli iye yamwamba ngwenyi: “Nyi uli mwana wa Zambi, alumuna mawe wano apwe mbolo.”
4 Alioze, Yesu yamukumbulula ngwenyi: “Hichinasonewa ngwo: ‘Mutu katambile kutwama wika ni mwono mumu lia mbolo, alioze ha liji lieswe lia kutuhuka mu kanwa lia Yehova.’”*
5 Ndiapu yamutwala mu limbo lisandu, yamusa ha kasonga ka tembele,
6 ni kwamba kuli iye ngwenyi: “Nyi uli mwana wa Zambi, linyase hashi, mumu chinasonewa ngwo: ‘Iye makatuma angelo jenyi hali yena, mba ayo makakuzundula ni moko jo hanga uhone kuhukana ku liwe.’”
7 Yesu yamukumbulula ngwenyi: “Hichinasonewa nawa ngwo: ‘Kanda ukeseka Yehova* Zambi ye.’”
8 Mba Ndiapu yamutwala ha umwe mulundu usuku chinji, yamusolwela mawanangana eswe a hashi ni uhenya wo.
9 Yamwamba ngwenyi: “Mungukwaha yuma yeswe ayi, nyi mufulamana ni kunguwayila.”
10 Yesu yamukumbulula ngwenyi: “Katuka, Satana! Mumu chinasonewa ngwo: ‘Wayila Yehova* Zambi ye, iye wika watamba kulingila mulimo usandu.’”
11 Hohene Ndiapu yamuhichika, mba angelo yeza ni kumulingila.
12 Muze evwile ngwo, Yoano hamusa mu zuwo lia ususu, yaya ku Ngalileya.
13 Muze akatukile ku Nazare, yaya ni kutwama ku Kafwanaume, limbo lize te liatwama ku sesa lia kalunga-lwiji, mu njiza ya Zapulone ni Napatali,
14 hanga maliji a profeta Izaia amanunuke, anambe ngwo:
15 “Yena chifuchi cha Zapulone ni chifuchi cha Napatali, jila ya kalunga-lwiji, sali likwo lia Yordau, Ngalileya ya akwa-mavungu!
16 Atu waze te atwama mu milima, hamona pangu linene, ni waze eswe atwama mu chifuchi cha milima ya kufwa, pangu hilinasoloka hali ayo.”
17 Kukatuka ha tangwa lize, Yesu yaputuka kwambujola ni kwamba ngwenyi: “Likonyekenu mumu Wanangana wa mu malilu unakundama.”
18 Muze Yesu te anende ku sesa lia Kalunga-lwiji wa Ngalileya, yamona malunga aali, mwana-kwo ni yayo, Semone, jina likwo ngwo, Petulu, ni mwana-kwo Andeleu kanate wanda mu kalunga-lwiji, mumu ayo te akwa-kuta yishi.
19 Yamba kuli ayo ngwenyi: “Ngukaulenu, mungunupwisa akwa-kwoza atu.”
20 Hazehene yahichika manda jo, yamukaula.
21 Muze haya ndambu kulutwe, yamona malunga akwo aali, waze te mwana-kwo ni yayo, Tiangu ni mwana-kwo Yoano, ana ja Zebedeu. Te mu wato ali ni tato Zebedeu, kanalulieka manda jo, mba iye yaasanyika.
22 Hazehene yahichika wato ni tato, yamukaula.
23 Yesu yenda mu chifuchi cheswe cha Ngalileya, ni kulongesa mu masunangonga jo ni kwambujola sango jipema ja Wanangana ni kuuka misongo yeswe, ni weji weswe kuli atu.
24 Lusango wenyi wahetele mu Seria mweswe, atu yaneha kuli iye waze eswe te anayiji misongo yeka ni yeka, akwa-ndemoniu, akwa-chikonya ni akwa-kalepa, mba Yesu yaauka eswe.
25 Chocho mbunga yinene ya ku Ngalileya, Ndekapole, Yerusaleme, Yundeya ni ya mu sali lia Yordau, yamukaula.
