Asonekene Mateu 5:1-48
-
LONGESO LIA HA MULUNDU (1-48)
-
Yesu kanaputuka kulongesa ha mulundu (1, 2)
-
Yuma livwa yize yakuneha uwahililo (3-12)
-
Mungwa ni pangu (13-16)
-
Yesu makamanununa Shimbi (17-20)
-
Malongeso hakutwala ku kwehuka ufwatulo (21-26), upangala (27-30), kulakula (31, 32), kulishinga (33-37), kufunyisa upi ha upi (38-42), ni chize mutuzanga akwa-kole (43-48)
-
5 Muze Yesu amwene mbunga, yakanduka ha mulundu, mba muze hatwama, tumbaji twenyi yakundama kuli iye.
2 Yaputuka kwalongesa ngwenyi:
3 “Kawaha waze ananyingika ngwo, kanafupu Zambi, mumu Wanangana wa mu malilu ni wo.
4 “Kawaha waze akulinyenga, mumu kumakaalembejeka.
5 “Kawaha akwa-kulikehesa,* mumu kumakahinga chifuchi.
6 “Kawaha waze ali ni zala ni pwila ya ululi, mumu kumakaakuchisa.
7 “Kawaha akwa-kwivwa keke, mumu no makeevwila keke.
8 “Kawaha akwa-mbunge yipema, mumu kumakamona Zambi.
9 “Kawaha akwa-kutwama kanawa ni akwo,* mumu kumakaavuluka ngwo, ana ja Zambi.
10 “Kawaha waze akuhungumiona mumu lia ululi, mumu Wanangana wa mu malilu ni wo.
11 “Nwawaha muze atu manwihia ni kunuhungumiona, ni muze manulamikiza yuma yeswe yipi mumu lia yami.
12 Wahililenu chinji, mumu fweto lienu lili linene mu malilu, chipwe aprofeta waze aliangile no kapwile ni kwahungumiona.
13 “Yenu nuli mungwa wa hashi, alioze nyi mungwa muusamuka, kuchi kuyema chawo machifunyisa? Kuushi nawa ni ulemu, shina wika kuumbila hanga auliate kuli atu.
14 “Yenu nuli pangu lia hashi, mbonge yize yili helu lia mulundu kuyishi kuswamana.
15 Atu keshi kukwachisa ndeya hanga ayise kushi lia chisoka, alioze kakuyisa helu lia mesa hanga yitemwine atu eswe ali mu zuwo.
16 Chizechene nawa, pangu lienu litemuke kumeso ja atu eswe hanga amone yitanga yenu yipema, akahalise Tatenu, yoze uli mu malilu.
17 “Kanda nunyonga ngwenu, yami neza ni kunongesa Shimbi hanji Aprofeta. Chejile ni kuyinongesa, alioze neza ni kuyimanununa.
18 Ngunambe pundu kuli yenu ngwami, chili chashi malilu ni hashi kupalika, alioze niumwe lusona mukepe hanji lutope wa lusona wa Shimbi mahasa kupalika chakuhona kumanunuka wakuhi.
19 Mweswawo mehuka chipwe kashimbi kakehe ha shimbi jino, ni kulongesa akwo achilinge, makamuvuluka ngwo, mukehe mu Wanangana wa mu malilu. Alioze, yoze majikaula ni kujilongesa akwo, makamuvuluka ngwo munene mu Wanangana wa mu malilu.
20 Kashika ngunanulweze ngwami, nyi ululi wenu kuwahianyine wa alongeshi a shimbi ni A-Fwariseu, pundu lume kunuchi kanjila mu Wanangana wa mu malilu.
21 “Hinunevu chize apwile ni kwamba ku mashimbu a kunyima ngwo: ‘Kanda ushiha mutu, mumu mweswawo mashiha mutu makamupatwila ku chota cha usopelo.
22 Alioze ngunambe kuli yenu ngwami, mweswawo manunga ni kuvwila ndumbwenyi ufwatulo, makamupatwila mu chota cha usopelo; yoze mahanjika maliji akaleleso kuli ndumbwenyi, makamupatwila ku Chota Chinene; ni yoze mambila ndumbwenyi ngwenyi, ‘Yena uli chihepuke!’ makamumbila mu Ngehena ya kahia.*
23 “Kashika, nyi unayi ni kulambula chawana che ku chilumbilo, mba kuzekwene mwiwuluka ngwe ndumbwe chimwe akulinacho,
24 hichika chawana che ku chilumbilo. Chitangu yako ulivwashane ni ndumbwe, mba uhiluke ukalambule chawana che.
25 “Livwashane kawashi-washi ni mukwa-kole ye, shimbu kanda nuchiheta ku chota cha usopelo, hanga mukwa-kole ye ahone kukukunjika kuli sopi, mba sopi akuhane kuli kafunga, mba kafunga akumbile mu zuwo lia ususu.
26 Ngunakulweze pundu ngwami: Kuchi kutuhuka mu zuwo lia ususu ndo muze mufweta chipwe kalumbongo ke kakehe ka kasula.*
27 “Hinunevu chize apwile ni kwamba ku mashimbu a kunyima ngwo: ‘Kanda ulinga upangala.’
28 Alioze ngunanulweze ngwami, mweswawo manunga ni kutala umwe pwo ni nyonga lia kumuvwila usolo, halinga nenyi kulu upangala mu mbunge.
29 Kashika, nyi liso lie lia utata mulikuvulumwisa, lichize ulimbile kusuku. Mumu shinaho utokese chihanda chimuwika cha mujimba, kuhiana mujimba we weswe akaumbile mu Ngehena.
30 Chikwo nawa, nyi kwoko lie lia utata mulikuvulumwisa, lipatule ulimbile kusuku. Mumu shinaho utokese chihanda chimuwika cha mujimba, kuhiana mujimba we weswe akaumbile mu Ngehena.
31 “Hanambe nawa ngwo: ‘Mweswawo malakula mukwo-pwo, amwehe mukanda wa kulakula.’
32 Alioze, yami ngunanulweze ngwami, mweswawo malakula mukwo-pwo yoze kalingile upangala, mamusa mu cheseko cha kulinga upangala. Chikwo nawa, yoze malimbata ni pwo yoze hanamulakula, malinga upangala.
33 “Hinunevu chize apwile ni kwamba ku mashimbu a kunyima ngwo: ‘Kanda nulishinga chakuhona kumanununa, alioze manununenu yize hinunalakenya Yehova.”*
34 Alioze, yami ngunanulweze ngwami: Kanda nulishinga ha chuma nichimwe, chipwe ni lilu, mumu ye ngunja ya Zambi;
35 chipwe ni hashi, mumu che chitwamo cha yiliato yenyi; chipwe ni Yerusaleme, mumu lie limbo lia Mwanangana munene.
36 Kanda ulishinga ha mwono we, mumu kuchi kuhasa kwalumuna lukambu we hanga apwe mutoma chipwe mulaa.
37 Echenu hanga liji lienu ‘Ewa’ lilumbunuke ewa, ‘Ka,’ ka, mumu yeswe yize munuwezelako, yinakatuka kuli mwe Mupi.
38 “Hinunevu chize apwile ni kwamba ku mashimbu a kunyima ngwo: ‘Nyi mutu malokola mukwo liso, neye amulokole lio, nyi mutu mapukula mukwo lizo, neye amupukule lio.’
39 Alioze yami ngunanulweze ngwami: Kanda nulimika ni mutu yoze manulinga upi, mweswawo makulamba ku tafu lia chindume, mutewulwile tafu likwo nawa.
40 Nyi mutu mazanga kukutwala ku chota hanga akutambule chikuto, mwehe nawa kazaku.
41 Nyi mutu yoze uli ni chiyulo makushinjila hanga umulingile mulimo ha ola yimuwika, mulingile ha maola aali.
42 Hana kuli yoze makwita, kanda womba nyima yoze mafupa kukwita mukuli.
43 “Hinunevu chize apwile ni kwamba ku mashimbu a kunyima ngwo: ‘Zanga mwenyembo we, kanda uzanga mukwa-kole ye.’
44 Alioze, ngunambe kuli yenu ngwami: Nungenu ni kuzanga akwa-kole jenu, ni kulembela waze akunuhungumiona,
45 hanga nusolole ngwenu, nuli ana ja Tatenu yoze uli mu malilu, mumu iye kakuvumbula tangwa hali api ni apema, ni kunokesa vula hali akwa-ululi ni yihenge.
46 Fweto yika munuzuka nyi nwazanga waze akunuzanga? Ngwami akwa-kwita lijimu no che akulinga.
47 Nyi nwameneka wika mandumbu jenu, chuma chilemu chika nwalinga? Ngwami akwa-mavungu no che akulinga.
48 Kashika, pwenu angunu, ngwe chizechene Tatenu wa mu malilu neye ali mungunu.
Footnotes
^ Hanji “yimbovu.”
^ Hanji “akwa-kuneha sambukila.”
^ Hanji “mungulunga uze te akumbila yiswaswa hanga ayoche.”
^ Tala Apendice B14.
^ Tala Apendice A5.
