Asonekene Mateu 8:1-34
8 Muze Yesu hapalumuka ha mulundu, mbunga yinene ya atu yiyimukaula.
2 Umwe mukwa-mbumba yakundama kuli iye ni kuliumba ngwenyi: “Mwene nyi muzanga, nguuke kama.”
3 Chocho Yesu yolola kwoko lienyi yamukwata, yamba ngwenyi: “Ngunazange! Hinduka ku musongo we.” Hazehene, mbumba yenyi yiyimuhwa.
4 Yesu yamulweza ngwenyi: “Tala, kanda ukalweza mutu niumwe, alioze, yako ulisolole kuli sasendote ni kuhana mulambu uze Mose ambile, hanga ukapwe uchela kuli ayo.”
5 Muze Yesu anjilile mu Kafwanaume, umwe kapitau ka maswalale yeza kuli iye ni kuliumba
6 ngwenyi: “Mwene, kavumbi kami kanayiji, ku zuwo ali, musongo wa kalepa ali nawo, kakupinda chinji.”
7 Yesu yamulweza ngwenyi: “Muze munguhetako, mungumuuka.”
8 Kapitau yamukumbulula ngwenyi: “Mwene, kuchangutelele kunutambula ku zuwo liami, alioze ambenu wika liji, kavumbi kami kumahinduka.
9 Mumu ni yami nguli ni chiyulo hali atu, nguli ni maswalale waze nakuyula, nakwamba kuli umwe ngwami: ‘Yako!’ iye maya, kuli mukwo ngwami, ‘Tweya!’ iye meza, kuli ngamba wami, ngwami: ‘Linga chino’! iye malinga.”
10 Muze Yesu evwile maliji wano, yakomoka chinji, yamba kuli waze te anamukaula ngwenyi: “Pundu, ngunanulweze ngwami: “Kanda nguchiwana mutu niumwe mu Izalele yoze uli ni ufulielo upwahaha.
11 Alioze ngunanulweze ngwami, anji kumakeza ku chivumbuko ni ku chitokelo hanga akatwame ku mesa ni Apalahama, Izake ni Yakomba mu Wanangana wa mu malilu;
12 alioze ana ja Wanangana kumakaambila haze mu milima. Henaho makalilila mbimbi ni kulikeleketa ku mazo.”
13 Yesu yamba kuli kapitau ka maswalale ngwenyi: “Yako, chilingiwe kulita ni ufulielo uze wasolola.” Mba kavumbi kenyi yahinduka ha shimbu lizeliene.
14 Muze Yesu anjilile mu zuwo lia Petulu, yawana naye-weno ya Petulu ha muhela, kanayiji kachiki.
15 Yamukwata ku kwoko, mba hazehene kachiki yamuhwa, mama wacho yakatuka, yaputuka kumululiekela kulia.
16 Ha chingoloshi, yamunehena atu anji waze apwile ni kupinjisa kuli andemoniu, mba iye yahuma maspiritu a luchisa ni liji limuwika, ni kuuka waze eswe apwile ni kuyiza,
17 hanga maliji a profeta Izaia amanunuke, anambe ngwo: “Iye mwe wambachile weji wetu ni misongo yetu.”
18 Muze Yesu hamona mbunga kanamujingilika, yalweza tumbaji twenyi hanga azauke aye mu sali likwo.
19 Umwe longeshi ya shimbi yakundama kuli Yesu yamba kuli iye ngwenyi: “Longeshi, mungukukaula kweswako muoya.”
20 Alioze Yesu yamulweza ngwenyi: “Mikuza mena akwete, ni tujila a mwilu kakwete yaswa, alioze Mwana-mutu keshi ni haze mashachila mutwe.”
21 Mba kambaji mukwo yamulweza ngwenyi: “Mwene, ngutayize kama chitangu nguye ni kufunda tata.”
22 Yesu yamwamba ngwenyi: “Nunga ni kungukaula, echa afu afunde afu jo ene.”
23 Iye yanjila mu wato, tumbaji twenyi no yanjila.
24 Susumuku, yikwiza fuji yinji ha kalunga-lwiji, chocho mikanya ya meya yiyifuka wato; alioze Yesu te kanapombo.
25 Ayo yaya ni kumulawisa ni kwamba ngwo: “Mwene, tulamwine kama, mumu tunambe kufwa!”
26 Alioze iye yaahula ngwenyi: “Mumu liaka nunevu woma, yenu akwa-ufulielo ukehe?” Hazehene, Yesu yakatuka, yatenukina fuji ni Kalunga-lwiji, mba yikuhola kuluu!
27 Atu yakomoka chinji ni kwamba ngwo: “Mutu muka au mwene? Chipwe fuji ni Kalunga-lwiji yinamwononokena.”
28 Muze ahetele mu sali likwo, yanjila mu chifuchi cha A-Ngandara, yamona malunga aali waze apwile ni andemoniu, kanakatuka ku mafuka, yeza, yakundama kuli iye. Ayo te yilianyi, asasu chinji, niumwe te wakupalikila mu tapalo yacho wakuhi.
29 Yaputuka kukololoka ngwo: “Mwana wa Zambi, yika unafupu kuli yetu? Weza ni kutupinjisa shimbu mwaka kanda uchiheta?”
30 Kusuku ni ayo, kwapwile chendo chinene cha ngulu waze te anali.
31 Chocho andemoniu yaputuka kuliumba kuli iye ni kwamba ngwo: “Nyi watuhuma, tutume kama mu chendo cha ngulu.”
32 Iye yamba kuli ayo ngwenyi: “Yeenu!” Ayo yatuhuka, yanjila muli ngulu, chendo cheswe cha ngulu yichilundumukina mu chimbongo, yanjila mu kalunga-lwiji eswe yafwa mu meya.
33 Tufunga ngulu yachina, yanjila mu mbonge, mba yambulula yuma yeswe, ni yize yalingiwile kuli malunga waze apwile ni andemoniu.
34 Hazehene, atu eswe mu mbonge yatuhuka, yaya ni kulitakana ni Yesu, muze amumwene, yaliumba kuli iye hanga akatuke mu chifuchi cho.
