Rute 1:1-22
1 Ha matangwa aze muze ngaji te anayulu, mu chifuchi yimupwa kapunga. Mba umwe lunga yakatuka ku Mbeteleme, mu Yunda, hanga aye ni kutwama mu chifuchi cha Moape ngwe chilambala. Yaya ni mukwo-pwo ni ana jenyi aali a malunga.
2 Lunga wacho jina lienyi te Elimeleke,* jina lia mukwo-pwo Noemi,* ana jenyi aali a malunga majina jo kapwile Malone* ni Chilione.* Ayo kapwile A-Efrata a ku Mbeteleme ya Yunda. Yaheta mu chifuchi cha Moape, yatwamamo.
3 Alioze, ha kupalika cha amwe mashimbu, Elimeleke lunga lia Noemi yafwa, chocho yasala iye ni ana jenyi aali a malunga.
4 Kulutwe, e ana-malunga yambata mapwo A-Moape: Umwe jina lienyi te Orpa, mukwo Rute. Ayo yatwamako miaka kumi.
5 Mba ana-malunga no yafwa, Malone ni Chilione. Chocho, Noemi yasala ukawenyi keshi ana chipwe lunga.
6 Kashika, iye ni atembwa-anenyi yakatuka ku chifuchi cha Moape, mumu muze te achili ku Moape kevwile ngwo, Yehova hawahisa atu jenyi ha kwaha kulia.*
7 Iye yakatuka kuze te atwama hamwe ni atembwa-anenyi aali. Muze te ali mu jila anahiluka ku chifuchi cha Yunda,
8 Noemi yamba kuli atembwa-anenyi ngwenyi: “Hilukenu, mutu ni mutu maha naye. Yehova anusolwele utu wa zango ngwe chizechene nwalingile kuli malunga jenu waze afwile ni kuli yami.
9 Yehova anukwase* kuwana malunga hanga nukapwe ni uhwimino.”* Kashika yaaha mbeju, mba ayo yaputuka kulila ni kukololoka.
10 Chocho, o yamba kuli iye ngwo: “Ka, yetu mutuya ni yenu kuli atu jenu.”
11 Alioze, Noemi yamba kuli ayo ngwenyi: “Hilukenu ana jami. Mumu liaka nunazange kuya ni yami? Shina munguhasa nawa kusema ana a malunga waze manumbata nyi?
12 Hilukenu ana jami. Hilukenu, mumu hinapwa chinji kashinakaji, chichi kuhasa nawa kuya ulo. Chipwe te nguli ni kutalatala ngwami, musono ufuku munguwana lunga yoze mangumbata ni kusema nawa ana a malunga,
13 shina munuhasa kwashimbwila ndo muze makola? Munutwama chakuhona kuya malo hanga nwashimbwile? Ka, ana jami, chinyengo chinji ngunevu ha kunumona chize, mumu kwoko lia Yehova hilialimika ni yami.”
14 Ayo yalila cheka ni kukololoka, mba Orpa yahana mbeju kuli naye-weno yahiluka. Alioze, Rute yalalaminya kuli naye-weno.
15 Chocho, Noemi yamba ngwenyi: “Tala, mukwenu hahiluka kuli atu jenyi ni kuli tuzambi twenyi, ni yena hiluka hamwe nenyi.”
16 Alioze, Rute yamba kuli iye ngwenyi: “Kanda nungushinjila hanga ngunuhichike, ngweche kunukaula; mumu kweswako munuya, ni yami kwe munguya, kweswako munupombela, ni yami kwe mungupombela. Atu jenu makapwa atu jami, Zambi yenu makapwa Zambi yami.
17 Kweswako munukafwila, ni yami kwe mungukafwila, kwenako makangufunjila. Yehova akangumwese lamba linji nyi ngwe necha chuma cheswacho chinguhandunune kuli yenu shina kufwa wika.”
18 Muze Noemi amwene ngwenyi Rute kananungu ni kumulalaminya hanga amukaule, yecha kumushinjila hanga ahiluke.
19 Mba eswe aali yanunga ni wenyi ndo ku Mbeteleme. Muze aheteleko, atu eswe a mu mbonge yalishimwoka hali ayo, mba mapwo yalihula ngwo: “Au Noemi?”
20 Iye yamba kuli mapwo ngwenyi: “Kanda nunguvuluka ngwenu Noemi.* Nguvulukenu ngwenu Mara,* mumu Mukwa-Ndundo-Jeswe hakalisa chinji mwono wami.
21 Napwile ni yuma yinji muze nayile, alioze Yehova hangufunyisa mokomoko. Mumu liaka nunanguvuluka ngwenu Noemi, se Yehova halimika ni yami, Mukwa-Ndundo-Jeswe hangumwesa lamba?”
22 Chenacho Noemi akatukile mu chifuchi cha Moape hamuwika ni Rute tembwa-mwanenyi Ka-Moape. Ayo yaheta ku Mbeteleme hakuputuka cha kucha* cha sevada.
Footnotes
^ Lize linalumbunuka ngwo, “Zambi Yami Kali Mwanangana.”
^ Lize linalumbunuka ngwo, “Uwahililo Wami.”
^ Lize kota linakatuka mu limi lia Hepreu, linalumbunuka ngwo, “kuzeya, kuyiza.”
^ Lize linalumbunuka ngwo, “Yoze Kahashile, Yoze Wakuheta ndo ku Songo.”
^ Chize Alisonekene, “mbolo.”
^ Hanji “Yehova anwehe chawana cha.”
^ Chize Alisonekene, “chihela cha uhwimino.”
^ Lize linalumbunuka ngwo, “Uwahililo Wami.”
^ Lize linalumbunuka ngwo, “Kusasa.”
^ Hanji “kumakuna.”
