Rute 3:1-18
3 Mba naye-weno Noemi, yamba kuli iye ngwenyi: “Mwanami, shina chichi kulita ngukufupile lunga hanga utwame kanawa?
2 Mboaze yoze ukwete ngamba a mapwo waze wakalakalanga no, kali usoko wetu. Ufuku wa musono maya ku chizungwilo ni kuzungula sevada.
3 Kashika, sana, ulikwite maji a lupembo mupema, uzale mazalo je apema, uye ku chizungwilo. Kanda wecha akumone ndo muze mahwisa kulia ni kunwa.
4 Muze mapomba, utala kanawa haze mapombela. Uye, ufukule hina ku molu jenyi hanga upombeko. Mba iye makulweza yize watamba kulinga.”
5 Rute yamukumbulula ngwenyi: “Mungulinga yeswe yize wangulweza.”
6 Chocho, yapalumuka ku chizungwilo, yalinga yeswe yize naye-weno amulwezele.
7 Ha shimbu liacho, Mboaze te kanali ni kunwa, mbunge yenyi te yinawahilila. Mba yaya, yapomba sali lia mbuto yize te yili ya kulumbika. Chocho Rute yaya hakehe-hakehe, yafukula hina ku molu jenyi, yapombako.
8 Ha muchima ufuku, lunga yaputuka kuchikima, chocho yakasumuka, yatala ku molu jenyi yamona umwe mwana-pwo kanapombo.
9 Mboaze yahula ngwenyi: “Yena iya?” Pwo yamukumbulula ngwenyi: “Yami Rute ngamba yenu. Zazululenu kama hina nungufuke, mumu yenu nuli mukwa-kukuula.”
10 Mba Mboaze yamba ngwenyi: “Yehova akuwahise mwanami. Utu we wa zango wa kasula uze wasolola wahiana utangu, mumu kuwakawile akweze, apwe yiswale apwe pichi.
11 Haliapwila mwanami, kanda wivwa woma. Mungukulingila yeswe yize wamba, mumu atu eswe mu mbonge yino kananyingika ngwo, uli pwo wamwenemwene.
12 Chipwe ngwe yami nguli mukwa-kukuula, alioze kuli mukwa-kukuula mukwo yoze wanguhiana.
13 Pomba hano ufuku uno, nyi hamene chimene makukuula, muchiwaha! Akukuule. Alioze, nyi iye malituna kukukuula, ni mwono wa Yehova, yami mwene mungukukuula. Kashika pomba hano ndo muze mukucha.”
14 Chocho, Rute yapomba ku molu jenyi ndo chimene, yahinduka shimbu kwilu te kunachilaa hanga achine kumumona. Mba Mboaze yamulweza ngwenyi: “Niumwe katambile kunyingika ngwo umwe pwo wezanga ku chizungwilo.”
15 Yamba nawa ngwenyi: “Tweya ni hina lia helu lize unazala, lizazulule.” Rute yalizazulula, mba yamuselaho njongo jisambano ja sevada, chocho Mboaze yaya mu mbonge.
16 Iye yahiluka kuli naye-weno, naye-weno yamuhula ngwenyi: “Mwanami, aku wayanga kuchi?”* Rute yamulweza yuma yeswe yize lunga wacho amulingilanga.
17 Rute yamba nawa ngwenyi: “Iye kangwaha njongo jino jisambano ja sevada ni kwamba ngwenyi: ‘Kanda uya mokomoko kuli noko-weno.’”
18 Naye-weno yamba kuli iye ngwenyi: “Mwanami, shimbwila ndo haze munyingikina chize mulonga uno muuhwa, mumu lunga wacho kechi kuhwima ndo haze mahwishila mulonga uno musono.”
Footnotes
^ Chize Alisonekene, “Yena iya?”
