Rute 4:1-22
4 Mboaze yakanduka ku chikolo cha mbonge, yatwamako. Muze mukwa-kukuula yoze iye ambile te anapalika, Mboaze yamba ngwenyi: “Nganji, tweya kuno, twama aha.” Iye yeza, yatwama.
2 Chocho Mboaze yasanyika makulwana kumi a mu mbonge, yamba ngwenyi: “Twamenu hano.” Ayo yatwama.
3 Mba Mboaze yamba kuli mukwa-kukuula ngwenyi: “Noemi yoze wakatukile mu chifuchi cha Moape kanalanjisa munda uze wapwile wa ndumbwetu Elimeleke.
4 Kashika namona ngwami, natamba kukwambulwila chikuma chino ni kukulweza ngwami: ‘Landa munda uno kulutwe lia atu waze ali hano ni lia makulwana ja atu. Nyi muzanga kuukuula, ukuule. Alioze nyi kuwazangile kuukuula ungulweze, mumu uli ni ulite wa kuukuula, yami mwe ngunakuhate.’” Iye yakumbulula ngwenyi: “Ngunazange kuukuula.”
5 Mba Mboaze yamba ngwenyi: “Tangwa lize mulanda munda wa Noemi, watamba kulanda nawa Rute Ka-Moape, pwo lia mutoki,* hanga uhilwise jina lia mutoki ha chihinga chenyi.”
6 Ha kuchivwa, mukwa-kukuula yamba ngwenyi: “Chichi kuukuula, hanga nguchine kupihisa chihinga chami. Ngunakwehe ulite wa kuukuula, mumu yami chichi kuhasa kuukula.”
7 Yino ye apwile ni kulinga ku mashimbu a kunyima mu Izalele, ha chako chinatale ha ulite wa kukuula ni kututulula chimwe chuma hanga achihane kuli mutu mweka, mba te akolese chikuma chino: Mutu te katamba kuzula sapato ni kujihana kuli mukwo, chenacho apwile ni kukolesa chikuma mu Izalele.
8 Kashika, muze hamba kuli Mboaze ngwenyi: “Ulande yena,” mukwa-kukuula yazula sapato.
9 Mboaze yamba kuli makulwana ni kuli atu eswe ngwenyi: “Musono, yenu nuli yela, mumu ngunalande kuli Noemi yeswe yize yapwile ya Elimeleke ni yeswe yize yapwile ya Chilione ni Malone.
10 Chikwo nawa, mungumbata Rute Ka-Moape yoze wapwile pwo lia Malone, hanga ngufunyise jina lia mutoki ha chihinga chenyi. Jina lienyi lichine kutoka hakachi ka mandumbu jenyi ni mu mbonge yenyi. Musono yenu nunapu yela.”
11 Chocho atu eswe waze apwile ku chikolo cha mbonge ni makulwana yamba ngwo: “Tuli yela! Yehova akwase pwo yono unanjila mu zuwo lie, apwe ngwe Rakele ni Liya, waze akolesele zuwo lia Izalele. Utatuke mu Efrata ni kupwa ni jina lipema mu Mbeteleme.
12 Ni ukwaso wa ana waze Yehova makwaha kupalikila muli mwana-pwo yono, zuwo lie lipwe ngwe lia Pereze yoze Tama anakasemena Yunda.”
13 Chocho Mboaze yambata Rute, mba yapwa mukwo-pwo. Yalimona nenyi, Yehova yamwaha uhashi wa kupwa kafumba, yasema mwana wa lunga.
14 Mba mapwo yamba kuli Noemi ngwo: “Yehova afumane, yoze musono wakwaha mukwa-kukuula. Jina lienyi lifumane mu Izalele!
15 Iye* kahuzulula mwono* we, chikwo nawa, makakukwasa ku ushinakaji we, mumu kamusema kuli tembwa-mwane yoze wakukuzanga, chikwo nawa, kuli yena kanahiane ana a malunga shimbiali.”
16 Noemi yanda mwana-kemba yamusa mu kondo, chocho yapwa ndeji wenyi.
17 Mba enyembo ja Noemi yaluka mwana jina. Ayo yamba ngwo: “Mwana asemena Noemi,” yamuluka jina ngwo Opete. Iye mwe tato ya Yese yoze wasemene Ndawichi.
18 Achi che chisemuko cha Pereze: Pereze yasema Hezerone;
19 Hezerone yasema Rame; Rame yasema Aminandambe;
20 Aminandambe yasema Nasone; Nasone yasema Salamone;
21 Salamone yasema Mboaze; Mboaze yasema Opete;
22 Opete yasema Yese; Yese yasema Ndawichi.
