Mukanda wa Tiangu 1:1-27
1 Yami Tiangu, ndungo wa Zambi ni wa Mwene Yesu Kristu, kuli yenu minyachi 12 yize yili ku yihela yeka ni yeka:
Ngunanumeneka!
2 Mandumbu jami, wahililenu muze munupalika mu yeseko yeka ni yeka,
3 mumu nunanyingika ngwenu, ufulielo wenu uze aneseka muuneha kunyongonona.
4 Kashika echenu hanga kunyongonona chenu chilinge milimo yacho ndo ku songo, hanga nupwe angunu, kunushi chitela mu yuma yeswe, nuchine kuhona chuma nichimwe.
5 Kashika, nyi mutu umwe hakachi kenu keshi ni mana, anunge ni kwita kuli Zambi, mumu iye kakuhana kuli eswe ni mbunge yeswe, keshi kukumika,* mamwahawo.
6 Alioze, anunge ni kwita ni ufulielo, kanda ayambashana, mumu yoze wakuyambashana kanalifu ni mikanya ya kalunga-lwiji, yize akuhungumuna ni fuji sali ni sali.
7 Kwamba pundu, mutu wacho katambile kushimbwila ngwenyi matambula chimwe chuma kuli Yehova;*
8 iye kali mukwa-mbunge jiali, kakuyambashana mu majila jenyi eswe.
9 Ndumbu yoze uli chiswale awahilile ha kumunangamisa,
10 ni ndumbu pichi awahilile ha kumulelesa, mumu pichi makakuwa ngwe chitemo cha mu yambu.
11 Mumu ngwe chizechene tangwa liakuvumbuka ni chivukuminya chalio ni kumisa chiputa, mba chitemo muchiholoka ni upeme wacho muutoka, ni pichi neye che makatoka mu milimo yenyi.
12 Kawaha mutu yoze manunga ni kunyongonona mu cheseko, mumu muze mamutayiza, makatambula chipangula cha mwono chize Yehova* alakenyene kuli atu waze manunga ni kumuzanga.
13 Muze mutu ali mu cheseko, kanda amba ngwenyi: “Kanangweseka kuli Zambi, mumu Zambi keshi kumweseka ni yuma yipi, chipwe iye keshi kweseka mutu niumwe.”
14 Alioze, mutu ni mutu kakumweseka muze mecha hanga usolo wenyi umukoke ni kumupiangula.
15 Mba muze usolo muwoka, muusema shili, ni shili muze mayilinga, muyisema kufwa.
16 Mandumbu jami a zango, kanda nwecha manyonga jenu anupiangule.
17 Chawana cheswe chipema ni chawana cheswe chingunu chakwiza kwilu, chakukatuka kuli Tata ya pangu lia mwilu, yoze keshi kwalumuka ngwe chize chizulie chakututuluka mashimbu eswe.
18 Ku upale wenyi yatusema kupalikila ku liji lia umwenemwene, hanga tupwe mihuko yitangu yize asakwile hakachi ka yitangiwa yenyi.
19 Mandumbu jami a zango, nyingikenu ngwenu: Mutu mweswe katamba kwivwa kawashi-washi, alioze, katambile kulipupula ha kuhanjika, chipwe kwivwa uli ni kawashi;
20 mumu mutu nyi kali ni ufwatulo keshi kuhasa kulinga yize Zambi akuzanga.
21 Kashika, mbilenu yuma yeswe ya luchisa ni yitanga yeswe yipi, tayizenu ni kulikehesa cheswe liji lia Zambi atumba mu mbunge jenu, lize mulihasa kunulamwina.
22 Alioze, pwenu akwa-kulinga yize liji lia Zambi linambe, kanda nupwa wika akwa-kwivwa, ni kulionga yenu ene ni manyonga a mahuza.
23 Mumu nyi mutu mapwa wika mukwa-kwivwa liji, alioze kechi kulinga yize liji linambe, kanalifu ni mutu yoze malitala ha katalilo.*
24 Muze malitala, maya kwenyi, hazehene mavulama chize ali ku meso.
25 Alioze, yoze wakuhengwola kanawa shimbi yingunu yize yakuneha utuswilo ni kununga ni kuyikaula, kechi kupwa mukwa-kwivwa yoze wa kuvulama ni kawashi, alioze mukwa-kulinga milimo; mba iye makawahilila ha yize akulinga.
26 Nyi mutu manyonga ngwenyi kakuwayila Zambi, alioze keshi kufunga kanawa limi lienyi, kakwonga mbunge yenyi mwene, uwayilo wenyi uli wamokomoko.
27 Uwayilo walinanga,* kuushi chipeka kumeso ja Zambi yetu mwe Tata, uli uno: Kukwasa ana-ashiwa ni tuliwa mu lamba lio, ni kulifunga hanga tuhone kupwa ni chipeka cha yuma ya hano hashi.
Footnotes
^ Hanji “keshi kuchokana.”
^ Tala Apendice A5.
^ Tala Apendice A5.
^ Hanji “ngaza.”
^ Hanji “upema.”
