Kuli Titu 2:1-15
2 Alioze yena, nunga ni kuhanjika yize yinalite ni malongeso apema.*
2 Makulwana a malunga katamba kupwa ni yitanga yipema, keshi lwelia, akwa-mana, angunu mu ufulielo, mu zango, ni mu kunyongonona.
3 Chizechene nawa, makulwana a mapwo katamba kupwa ni yitanga yipema, hi akwa-mahuza ko, hi akwa-kunwa vinyu yinji ko, akapwe alongeshi a yuma yipema,
4 hanga alongese* ana-mapwo kuzanga malunga jo ni ana jo,
5 apwe akwa-mana, alinanga, akwa-kufunga kanawa mazuwo jo, akwa-mbunge jipema, akwa-kuzeyela malunga jo, hanga mutu niumwe kechi kashililika liji lia Zambi.
6 Chizechene nawa, nunga ni kutoweza ana-malunga, apwe akwa-mana.
7 Ni yena mwene, mu yuma yeswe chakutamba kupwa chilweza ha yitanga yipema. Longesa yize yalinanga, chakuhona lwelia,
8 hanjika maliji apema, hanga atu akwo achine kukukumika. Nyi walinga chino, mukavwisa sonyi waze akulimika ni yetu, mumu kechi kapwa ni chimwe chuma chipi chakwamba hali yetu.
9 Ndungo akazeyele kuli miata jo mu yuma yeswe, ni kwavwisa kuwaha, chakuhona kwakumbulula chipi,
10 chipwe kweya. Alioze akasolole ngwo katela ujikijilo, hanga mu yuma yeswe akapemese longeso lia Zambi, Chilamwina chetu.
11 Mumu Zambi hanasolola chawana chenyi cha keke ha kulamwina atu eswe.
12 Chawana chacho chakutufumba twehuke yuma yipi ni usolo wa hano hashi, hanga tutwame ni mana, ni ululi, ni kuwayila Zambi mu chifuchi* chino,
13 muze tunashimbwila kutalatala cha uwahililo ni kusoloka cha uhenya cha Zambi yetu munene ni cha Chilamwina chetu, Yesu Kristu.
14 Iye wahanyine mwono wenyi hali yetu ni kututusula ku yuma yeswe yipi, watupemesene tupwe atu jenyi alipwila hanga tuhase kulinga yuma yeswe yipema ni mbunge yeswe.
15 Nunga ni kuhanjika yuma yino, ni kutoweza,* ni kukumika ni chiyulo cheswe. Kanda wecha niumwe akulelese.
