Kuli Titu 3:1-15
3 Nunga ni kwewulula hanga azeyele ni kwononokena manguvulu ni akwa-kuyula, ni kulilulieka hanga alinge milimo yeswe yipema.
2 Kanda ahanjika yuma yipi hali mutu niumwe, kanda apwa akwa-mbwanja, alioze apwe atu ashi, ni kusolola umbovu kuli atu eswe.
3 Mumu ni yetu nawa twapwile yihepuke, yihulia, akwa-kupianguka, twapwile ndungo a usolo upi, ni a uwahililo weka ni weka, twapwile akwa-shili ni akwa-chipululu, yizelwokeso, ni kulivwila kole umwe ni mukwo.
4 Alioze, muze utu ni zango lia Zambi, Chilamwina chetu yasolokele hali atu,
5 iye watulamwinyine (hi mumu lia yitanga ya ululi yize twalingile ko, alioze mumu lia keke yenyi), kupalikila mu kusanyisa chize chatunehene ku mwono ni kutupwisa aha kupalikila mu spiritu yisandu.
6 Iye wamwangine spiritu yacho ya kulumbama hali yetu kupalikila muli Yesu Kristu, Chilamwina chetu,
7 hanga muze makatupwisa akwa-ululi kupalikila mu chawana chenyi cha keke, tukapwe swana kulita ni kutalatala cha mwono wa mutolo.
8 Maliji wano kali amwenemwene, ngunazange hanga ununge ni kushindakenya ha yuma yino, hanga waze akufuliela kuli Zambi ahulikile manyonga jo ha kulinga yuma yipema. Yuma yino yili yipema, chikwo nawa, yakuyukisa atu.
9 Alioze, kanda nulinjisa mu chuma nichimwe chinatale ha kulihangujola cha uhepuke, hakutwala ku yisemuko, vunda ni kulitachika hakutwala ku Shimbi, mumu yuma yino kuyishi ulemu, chikwo nawa, yili yamokomoko.
10 Hakutwala kuli mutu yoze wakuneha kahandununo, lituneye muze hiwamukanyamisa* ha chisuho chitangu ni chamuchiali.
11 Mumu unanyingika ngwe iye hanapianguka mu jila, kanavulumuna ni kulihisa mwene.
12 Muze mungukutumina Aretema hanji Techiku, sako tachi hanga wize ni kungumeneka ku Nikopoli, mumu kwenako natesa kupalikila mashimbu a chishika.
13 Lulieka yuma yeswe yize Zena yoze wanyingika kanawa Shimbi ni Apolu mafupiwa mu wenyi wo, hanga kanda ahona chuma nichimwe.
14 Ni atu jetu nawa, alilongese kununga ni kulinga yuma yipema, ahase kukwasa ni kawashi waze anahono, hanga kanda akahona mihuko mu milimo yo.
15 Atu eswe ali hamwe ni yami kananumeneka. Ukameneke waze akutuzanga mu ufulielo.
Chawana cha keke chikapwe ni yenu eswe.
Footnotes
^ Hanji “hiwamutoweza.”
