Uputukilo 11:1-32
11 Hashi heswe atu te kakuhanjika limi limuwika ni liji limuwika.
2 Muze te anayi ku chivumbuko, atu yawana chimwe chana* mu chifuchi cha Shinare, chocho yatwamamo.
3 Mba yamba kuli umwe ni mukwo ngwo: “Tweyenu tuumbe tijolu ni kujocha ha kahia.” Chocho, ha chihela cha mawe yakalakala ni tijolu, ha chihela cha mavu yakalakala ni usososhi.
4 Yamba ngwo: “Tweyenu tulitungile yimwe mbonge ni umwe kaposhi yoze kasonga kenyi maheta mwilu, hanga tufumanyise jina lietu, tuchine kulimwanga hashi heswe.”
5 Yehova yahulumuka hanga amone mbonge ni kaposhi yoze ana ja atu atungile.
6 Mba Yehova yamba ngwenyi: “Talenu! Ayo kali atu amuwika, kakuhanjika limi limuwika, kashika talenu yize analingi. Haliapwila, chuma cheswacho chize matesa kulinga, o mahasa kuchimanununa.
7 Tuyenu! Tuhulumukenu, tulumbanganyise limi lio hanga mutu ni mutu ahone kwivwa limi lia mukwo.”
8 Chocho, kukatuka haze, Yehova yaamwanga hashi heswe, mba hakehe-hakehe yalitwamina kutunga mbonge yacho.
9 Kashika mbonge yacho ayilukile jina ngwo, Mbapele.* Mumu kwenako Yehova alumbanganyishine limi lia akwa-hashi heswe, Yehova yaamwanga hashi heswe kukatuka kuze.
10 Yono mwe lusango wa Sheme.
Sheme kapwile ni miaka 100 muze asemene Apakasha, ha kupalika cha miaka yaali muze sanga lia meya te hiliapalika.
11 Mba muze hapwa tato ya Apakasha, Sheme yatwama nawa miaka 500. Chocho yasema ana a malunga ni a mapwo.
12 Apakasha yatwama miaka 35, mba yasema Shela.
13 Mba muze hapwa tato ya Shela, Apakasha yatwama nawa miaka 403. Chocho yasema ana a malunga ni a mapwo.
14 Shela yatwama miaka 30, mba yasema Epere.
15 Mba muze hapwa tato ya Epere, Shela yatwama nawa miaka 403. Chocho yasema ana a malunga ni a mapwo.
16 Epere yatwama miaka 34, mba yasema Pelege.
17 Mba muze hapwa tato ya Pelege, Epere yatwama nawa miaka 430. Chocho yasema ana a malunga ni a mapwo.
18 Pelege yatwama miaka 30, mba yasema Reu.
19 Mba muze hapwa tato ya Reu, Pelege yatwama nawa miaka 209. Chocho yasema ana a malunga ni a mapwo.
20 Reu yatwama miaka 32, mba yasema Selugu.
21 Mba muze hapwa tato ya Selugu, Reu yatwama nawa miaka 207. Chocho yasema ana a malunga ni a mapwo.
22 Selugu yatwama miaka 30, mba yasema Nehore.
23 Mba muze hapwa tato ya Nehore, Selugu yatwama nawa miaka 200. Chocho yasema ana a malunga ni a mapwo.
24 Nehore yatwama miaka 29, mba yasema Tera.
25 Mba muze hapwa tato ya Tera, Nehore yatwama nawa miaka 119. Chocho yasema ana a malunga ni a mapwo.
26 Tera yatwama miaka 70, mba yasema Apalama, Nehore ni Harane.
27 Yono mwe lusango wa Tera.
Tera yasema Apalama, Nehore ni Harane; mba Harane yasema Lote.
28 Harane yafwila ku Ure ya A-Kaletea chifuchi chize asemukinyine, shimbu tato Tera te uchili ni mwono.
29 Apalama ni Nehore yambata mapwo. Jina lia pwo lia Apalama liapwile Serai, jina lia pwo lia Nehore liapwile Milika, mwana wa Harane, tato ya Milika ni Iseka.
30 Serai kapwile mumba; te keshi ni ana.
31 Tera yaya ni Apalama, ni mujikulu wenyi Lote, mwana wa Harane ni tembwa-mwanenyi Serai, pwo lia mwanenyi Apalama. Ayo yakatuka hamwe nenyi ku chifuchi cha Ure cha A-Kaletea ni kuya ku chifuchi cha Kanana. Ha kupalika cha mashimbu, yaheta ku Harane, yatwamako.
32 Matangwa ja Tera kapwile miaka 205. Chocho yafwila ku Harane.
Footnotes
^ Chize Alisonekene, “chana cha umwe mungulunga.”
^ Lize linalumbunuka ngwo, “Chizungo-zungo.”
