Uputukilo 2:1-25
2 Malilu ni hashi ni yuma yeswe yize yatwamamo, yahwisa kuyitanga.
2 Ha tangwa liamuchishimbiali, Zambi te hahwisa kulu milimo yize te analingi, mba yahwima ha tangwa liacho ku milimo yeswe yize alingile.
3 Chocho Zambi yawahisa tangwa liamuchishimbiali ni kulipwisa lisandu, mumu tangwa liacho lie Zambi ahwimine ku milimo yeswe yize alingile, ku milimo yeswe yize azangile kulinga.
4 Au mwe lusango wa malilu ni hashi ha tangwa lize ayitangile, ha tangwa lize Yehova Zambi atangile hashi ni lilu.
5 Ha mavu te kanda hachisoka nichimwe chiputa, chikwo nawa, niyimwe yambu te kanda yichiputuka kusoka, mumu Yehova Zambi te kanda achinokesa vula hashi, chikwo nawa, kwakapwile mutu niumwe hanga alime mavu.
6 Alioze, mbundu yapwile ni kukakumuka mu mavu, ni kukekemesa hashi heswe.
7 Mba Yehova Zambi yawumba mutu ku fufuta ya mavu, yafuza mwiku wa mwono mu mazulu jenyi, chocho yapwa mutu* wa mwono.
8 Mba Yehova Zambi yatumba munda ku chivumbuko mu Endene, chocho yasamo mutu yoze awumbile.
9 Mba Yehova Zambi yasokesa ha mavu mitondo yipema ya milali yeswe, yize yapwa nawa yipema ni kulia, yasokesa nawa mutondo wa mwono mukachi ka munda, ni mutondo wa chinyingi cha chipema ni chipi.
10 Kwapwile umwe lwiji te wakukatuka mu Endene, yoze te wakukekemesa munda wacho, mba kuze lwiji wacho ayile, yalipula mu ngiji jiwana.*
11 Lwiji mutangu jina lienyi Pishone, mwenawo wajingilika chifuchi cheswe cha Havila kuze kwatwama oru.
12 Oru ya mu chifuchi chacho yapwa yipema chinji. Kuli nawa ndeliume ni mawe a sardonika.*
13 Lwiji wamuchiali jina lienyi Ngehone, mwenawo wajingilika chifuchi cheswe cha Kushe.
14 Lwiji wamuchitatu jina lienyi Hidekele, mwenawo waya ku chivumbuko cha Asuria. Lwiji wamuchiwana jina lienyi Ufrateze.
15 Yehova Zambi yanda mwe mutu, yamusa mu munda wa Endene hanga aulime ni kuufunga.
16 Yehova Zambi yahana shimbi yino kuli mutu ngwenyi: “Muhasa kulia ku mitondo yeswe ya mu munda.
17 Alioze, hakutwala ku mutondo wa chinyingi cha chipema ni chipi, kanda uliako, mumu tangwa lize muoliako, mukafwa lume.”
18 Yehova Zambi yamba ngwenyi: “Hi chipema ko lunga atwame ukawenyi, mungumulingila umwe chikwashi yoze malita nenyi.”
19 Yehova Zambi katangile tushitu eswe a mu yambu* ku mavu ni yitangiwa yeswe yize ya kuhumuka mwilu, mba yaputuka kwatwala kuli mutu hanga amone chize maluka kashitu ni kashitu jina. Jina lieswalio mutu alukile chitangiwa* ni chitangiwa, yilipwa jina lienyi.
20 Chocho mutu yaluka majina yimuna eswe ni yitangiwa yeswe yize ya kuhumuka mwilu ni tushitu eswe a mu yambu, alioze mutu te keshi ni chikwashi niumwe yoze walita nenyi.
21 Yehova Zambi yahana tulo anji kuli mutu, mba muze te anapombo, yamuchiza lupachi umuwika, yasalakanyisa yifwo ha chihela chacho.
22 Mba lupachi yoze Yehova Zambi achijile kuli lunga, yamulinga pwo, chocho yamuneha kuli lunga.
23 Lunga yamba ngwenyi:
“Yono kali chifwaha cha ku yifwaha yami,musunya wa ku musunya wami.
Yono makamuvuluka ngwo Pwo,mumu amuchijile kuli lunga.”
24 Kashika, lunga makahichika tato ni naye makalinunga ni mukwo-pwo, mba ayo makapwa musunya umuwika.
25 O eswe aali, lunga ni pwo, apwile uselesele; alioze te keshi kwivwa sonyi.
Footnotes
^ Hanji “yimwe alma, umwe mutu”. Mu limi lia hepreu, kulita ni chize asonekene liji néfesh, linalumbunuka “Chitangiwa chize chakuhwima”. Tala Glossario, “Alma.”
^ Chize Alisonekene, “yapwa ni mitwe yiwana.”
^ Che kwamba, “umwe ulimbo uze ukwete vumba lipema, walifwa ni mira.”
^ Chize Alisonekene, “yitangiwa yeswe ya mwono yize yatwama mu yambu.”
^ Hanji “alma.”
