Uputukilo 40:1-23
40 Kulutwe lia yuma yino, mwata wa akwa-kuhana musenge wa mwanangana wa mu Engitu ni mwata wa akwa-kulinga mbolo, yavulumuna kuli mwene wo, mwanangana wa mu Engitu.
2 Chocho, Falau yevwila uli mwata wa akwa-kuhana musenge ni mwata wa akwa-kulinga mbolo,
3 yatuma aase mu zuwo lia ususu lia mwata wa tufunga, muze Yosefwe apwile.
4 Mba mwata wa tufunga yalweza Yosefwe hanga apwe hamwe no ni kwafunga, kashika ayo yatwama mu zuwo lia ususu ha mashimbu amwe.*
5 Ha ufuku umwe, mukwa-kuhana musenge kuli mwanangana wa Engitu ni mukwa-kulinga mbolo, waze te ali mu zuwo lia ususu, yalota. Mba chilota ni chilota chapwile ni ulumbunwiso wacho.
6 Mukwachako, muze Yosefwe ayile ni kwatala, yamona ngwenyi ayo te kananenganyana.
7 Chocho, Yosefwe yahula ngamba jacho waze te ali no mu zuwo lia ususu ngwenyi: “Mumu liaka nunanenganyana musono?”
8 Ayo yamukumbulula ngwo: “Yetu eswe twalotanga, alioze, kukushi yoze matulumbunwina yilota yetu.” Yosefwe yamba kuli ayo ngwenyi: “Ngwami Zambi mwe mukwa-kulumbununa yilota? Lisesa, ngulwezenu yilota yenu.”
9 Kashika, mwata wa akwa-kuhana musenge yalweza Yosefwe chilota chenyi, yamba ngwenyi: “Mu chilota chami, namonanga mutondo wa vinyu.*
10 Ku mutondo wacho kwapwile mitango yitatu. Muze yaputukile kusokoloka, yikupwa yitemo, mba yikwima yichakata ya uva yize te hiyahia.
11 Musenge wa Falau wapwile mu kwoko liami, chocho yingwanda uva yinguyikamina mu musenge wa Falau, mba yingumwaha musenge wacho.”
12 Kashika, Yosefwe yamba kuli iye ngwenyi: “Uno we ulumbunwiso wa chilota: Mitango yitatu yinalumbunuka matangwa atatu.
13 Kwasala matangwa atatu, Falau makuchiza* mu zuwo lia ususu ni kukuhilwisa ha mulimo we, mba mukahana musenge kuli Falau ngwe chize wapwile ni kulinga muze wapwile mukwa-kumwaha musenge.
14 Alioze, muze yuma muyipema ku mwono we, ukangwiwuluka kama. Lisesa, ukangusolwele kama utu wa zango, ha kuhanjika ni Falau hakutwala kuli yami hanga ngukatuke muma muno.
15 Kwamba umwenemwene, kangwiyile mu chifuchi cha A-Hepreu, chipwe kuno, chalingile nichimwe chize angusela mu zuwo lia ususu.”*
16 Kashika, muze mwata wa akwa-kulinga mbolo amwene ngwenyi ulumbunwiso wa chilota uli upema, yamba kuli Yosefwe ngwenyi: “Ni yami nalotanga chilota chino: Ha mutwe wami te hali mitonga yitatu ya mbolo jitoma,
17 mu mutonga wacho mwapwile kulia cha milali yeswe yize akwa-kulinga mbolo akulingila Falau, mba kwapwile tujila waze te anali mbolo jize japwile mu mutonga uze te uli ha mutwe wami.”
18 Yosefwe yakumbulula ngwenyi: “Uno we ulumbunwiso wa chilota: Mitonga yitatu, yinalumbunuka matangwa atatu.
19 Kwasala matangwa atatu Falau makuteta mutwe, ni kukuzezeleka ha mutondo, mba tujila makalia musunya we.”
20 Tangwa liamuchitatu liapwile tangwa lia kwiwuluka kusemuka cha Falau, mba iye yalingila tuvumbi twenyi eswe chiteleka. Yatuhwisa mwata wa akwa-kuhana musenge ni mwata wa akwa-kulinga mbolo, yaaneha kumeso ja tuvumbi twenyi.
21 Mba yahilwisa mwata wa akwa-kuhana musenge ha mulimo wenyi, chocho iye yanunga ni kuhana musenge kuli Falau.
22 Alioze, Falau yasukika mwata wa akwa-kulinga mbolo ha mutondo ngwe chize Yosefwe alumbunwine.
23 Alioze, mwata wa akwa-kuhana musenge yavulama Yosefwe.
Footnotes
^ Chize Alisonekene, “ha matangwa amwe.”
^ Hanji “mutondo wa uva.”
^ Chize Alisonekene, “mahetula mutwe we.”
^ Chize Alisonekene, “mu wina.”
