Uputukilo 41:1-57
41 Muze te hikwapalika miaka yiali, Falau yalota te kanamana ku Lwiji Nilu.
2 Mu lwiji wacho te munatuhuka ngombe shimbiali, apema chinji, anene-anene, te kanali mwambu wa ku Lwiji Nilu.
3 Mba mu Lwiji Nilu yimutuhuka nawa ngombe akwo shimbiali, api, awangama, yamana sali lia ngombe anene-anene ku sesa lia Lwiji Nilu.
4 Chocho ngombe api, awangama yaputuka kulia ngombe shimbiali, apema, anene-anene. Mba Falau yakasumuka mu tulo.
5 Falau yapomba nawa, chocho yalota chilota chamuchiali, yamona mitwe ya tiliku shimbiali ya too ni tiliku, yipema, yinasoko ku chishachi chimuwika.
6 Mba yikusoka nawa mitwe yikwo ya tiliku shimbiali yawangama, yize te hiyoma ni fuji ya ku chivumbuko.
7 Mba mitwe ya tiliku yawangama yiyiputuka kulia mitwe ya tiliku shimbiali yize te yinazale too ni tiliku yipema. Chocho Falau yalaula mba yanyingika ngwenyi te kanaloto.
8 Alioze muze hikwacha, Falau yalipikala, yaputuka kusanyika tahi eswe ni akwa-mana eswe a mu Engitu. Falau yaalweza yilota, alioze niumwe kahashile kumulumbunwina yilota yacho.
9 Chocho, mwata wa akwa-kuhana musenge yamba kuli Falau Ngwenyi: “Musono, mungwambulula shili yami.
10 Tangwa limwe, yenu nwapihililile ni yetu tuvumbi twenu, kashika yinutuma kutukwata ni kutusa mu zuwo lia ususu lia mwata wa tufunga, yami ni mwata wa akwa-kulinga mbolo.
11 Mba ha ufuku umwe yetu eswe aali yitulota, mutu ni mutu yalota chilota chenyi. Mba chilota ni chilota chapwile ni ulumbunwiso wacho.
12 Mu zuwo lia ususu twapwilemo ni umwe mukweze Ka-Hepreu, kavumbi ka mwata wa tufunga. Muze twamulwezele yilota yacho, yayilumbununa ni kutwaha ulumbunwiso wa chilota ni chilota.
13 Yuma yeswe yiyilingiwa kulita ni chize ayilumbunwine. Yami yanguhilwisa ha mulimo wami, alioze mukwetu mukwo yamusukika ha mutondo.”
14 Kashika, Falau yatuma atu akasake Yosefwe mu zuwo lia ususu,* yamuneha kawashi-washi. Iye yateula* wevu, yazala mazalo eka, mba yaya kuli Falau.
15 Chocho Falau yamba kuli Yosefwe ngwenyi: “Nalotanga chimwe chilota, alioze niumwe wahasa kuchilumbununa wakuhi. Nevwa ngwo yena nyi makulweza chimwe chilota muhasa kuchilumbununa.”
16 Yosefwe yakumbulula Falau ngwenyi: “Yami iya? Zambi mwe mahana ulumbunwiso upema kuli Falau.”
17 Falau yamba kuli Yosefwe ngwenyi: “Mu chilota chami, yami te ngunamana ku sesa lia Lwiji Nilu.
18 Yingumona ngombe shimbiali apema, anene-anene, kanatuhuka mu Lwiji Nilu, chocho yaputuka kulia mwambu ku sesa lia lwiji wacho.
19 Mba kulutwe, yimutuhuka nawa ngombe akwo shimbiali, hanahongo, api chinji, awangama. Mu chifuchi cheswe cha Engitu, kanda ngumona kama ngombe api chichize.
20 Mba ngombe api, awangama, yaputuka kulia ngombe atangu shimbiali anene-anene.
21 Alioze muze te halia, niumwe wamwene ngwe kalia ngombe akwo wakuhi, mumu te achili api ngwe chize apwile ku uputukilo. Chocho yingulaula.
22 “Mba yingumona nawa mu chilota chikwo ngwami, ku chishachi chimuwika, te kunasoko mitwe shimbiali ya tiliku, yipema, ya too ni tiliku.
23 Mba yikusoka nawa mitwe yikwo ya tiliku shimbiali yawangama, yize te hiyoma ni fuji ya ku chivumbuko.
24 Mba mitwe ya tiliku yawangama, yiyiputuka kulia mitwe ya tiliku shimbiali yize te yinazale too ni tiliku, yipema. Mba yingulweza akwa-kutaha, alioze niumwe kahashile kungulumbunwina yilota yacho.”
25 Chocho Yosefwe yamba kuli Falau ngwenyi: “Yilota yenu yiali, yinalumbunuka wika chuma chimuwika. Zambi wamwenemwene hanulweza yize makalinga.
26 Ngombe apema shimbiali kanalumbunuka miaka shimbiali. Mitwe ya tiliku yipema shimbiali yinalumbunuka miaka shimbiali. Yilota yeswe yili wika ni ulumbunwiso umuwika.
27 Ngombe shimbiali awangama, api waze atuhukile kasula, kanalumbunuka miaka shimbiali. Mba mitwe ya tiliku shimbiali yamokomoko yize yomine ni fuji ya ku chivumbuko, yinalumbunuka miaka shimbiali ya zala.
28 Ngwe chize nanulweza, Zambi wamwenemwene kanukwasa yenu Falau kumona yize Iye makalinga.
29 “Mukukapwa kulia chinji mu chifuchi cha Engitu ha miaka shimbiali.
30 Muze miaka yino muyikapalika, pundu lume, mukukeza miaka yikwo shimbiali ya zala yinji. Kulia cheswe chize chapwile mu Engitu atu makachivulama, mumu mu chifuchi mumukapwa zala yinji.
31 Mumu lia zala yinji yize muyikeza, atu kechi kewuluka ngwo, kunyima mu chifuchi mwapwile kulia chinji.
32 Chilota chasoloka yisuho yiali kuli Falau mumu chikuma chino hanachitese liakulu kuli Zambi wamwenemwene, kashika, kwasala hakehe Zambi wamwenemwene machimanununa.
33 “Kashika, fupenu haliapwila mutu wakanyama ukwete mana, numwehe wata wa kufunga chifuchi cha Engitu.
34 Fupenu tusongo mu chifuchi hanga akunge chihanda chamuchitano cha kulia cheswe cha mu Engitu, ha miaka shimbiali ya kulia chinji.
35 Kupalikila mu chiyulo chenu, akunge kulia cheswe chize macha ha miaka yipema shimbiali yize muyizaho, akafunge mbuto ni kujitulikila mu mambonge.
36 Kulia chacho, muchikakwasa ha miaka shimbiali ya zala yize muyikeza mu chifuchi cha Engitu, hanga atu ni yimuna akachine kunonga mumu lia zala.”
37 Nyonga lino yilipemena kuli Falau ni kuli tuvumbi twenyi eswe.
38 Chocho Falau yamba kuli tuvumbi twenyi ngwenyi: “Shina mutuwana mutu mukwo yoze uli ni spiritu ya Zambi ngwe yono?”
39 Falau yamba kuli Yosefwe ngwenyi: “Amu Zambi hakulweza yuma yino yeswe, kukushi mutu mukwo wakanyama yoze ukwete mana ngwe yena.
40 Yena lume mupwa kasongo ka zuwo liami. Atu jami eswe makwononokena mu yuma yeswe, alioze yami wika mungukuhiana, mumu nguli mwanangana.”
41 Falau yamba nawa kuli Yosefwe ngwenyi: “Haliapwila nakwaha wata hanga ufunge chifuchi cheswe cha Engitu.”
42 Mba Falau yachiza kazeya wa chijikilo ku munwe wenyi, yamusa ku munwe wa Yosefwe, yamujika mazalo a linyu yipema, yamusa mukosa wa oru mu kota.
43 Chikwo nawa, yamwendesa mu temba lienyi liamuchiali lia wanangana, atu yakololoka kulutwe lienyi ngwo: “Avreke!”* Chocho Yosefwe yamupwisa kasongo mu chifuchi cheswe cha Engitu.
44 Falau yamba nawa kuli Yosefwe ngwenyi: “Yami nguli Falau, alioze mu chifuchi cheswe cha Engitu, niumwe mahasa kulinga* chuma chimwe wakuhi nyi yena kuwatayijile.”
45 Mba Falau yaluka Yosefwe jina ngwenyi, Zafwena-penenya, yamwaha Asena, mwana wa Potifera sasendote ya One hanga apwe mukwo-pwo. Mba Yosefwe yaputuka kusongwela* chifuchi cha Engitu.
46 Yosefwe kapwile ni miaka 30 muze asolokele kumeso ja Falau, mwanangana wa Engitu.
Kashika, Yosefwe yakatuka kumeso ja Falau, chocho yendangana mu chifuchi cheswe cha Engitu.
47 Ha miaka shimbiali ya kulia cha kulumbama, mavu yema kulia chinji.
48 Yosefwe yanunga ni kukunga kulia cheswe chize chemine mu chifuchi cha Engitu ha miaka shimbiali, te kakuchifungila mu mambonge. Mu mbonge ni mbonge, iye kapwile ni kutulikilamo kulia chize chapwile ni kwima mu minda yamo.
49 Iye yanunga ni kutulika mbuto jinji ngwe masekeseke a ku kalunga-lwiji, mba ku songo, yecha kwalula mbuto jacho mumu te hijoka chinji.
50 Shimbu mwaka wa zala te kanda uchiputuka, Asena mwana wa pwo wa Potifera, sasendote ya One,* yasemena Yosefwe ana aali a malunga.
51 Yosefwe yaluka mwanenyi mutangu jina ngwenyi, Manase,* mumu yamba ngwenyi: “Zambi kanguvulamisa lamba liami lieswe ni usona wa ku zuwo lia tata.”
52 Wamuchiali yamuluka jina ngwenyi, Eframe,* mumu yamba ngwenyi: “Zambi kangwaha ana mu chifuchi cha lamba liami.”
53 Chocho miaka shimbiali ya kulia chinji yiyihwa.
54 Mba miaka shimbiali ya zala yiyiputuka ngwe chize ambile Yosefwe. Mu yifuchi yeswe ya hashi mwapwile zala, alioze mu chifuchi cha Engitu mwapwile kulia.
55 Mba kulutwe, zala yiyinjila mu chifuchi cheswe cha Engitu, chocho atu yaputuka kulilila Falau hanga aehe kulia. Falau yamba kuli A-Engitu eswe ngwenyi: “Yeenu kuli Yosefwe nulinge yeswe yize manulweza.”
56 Zala yiyinunga hashi heswe. Chocho Yosefwe yaputuka kutuhwisa kulia cheswe chize atulikile ni kuchilanjisa kuli A-Engitu, mumu zala yinji yanjilile mu chifuchi cha Engitu.
57 Atu a hashi heswe kapwile ni kuya mu Engitu hanga alande kulia kuli Yosefwe, mumu hashi heswe hapwile zala yinji.
Footnotes
^ Chize Alisonekene, “wina.”
^ Mu limi lia Hepreu liji lino mulihasa kulumbunuka kuteula wevu ni kambu.
^ Chinasoloka ngwe liji lino kapwile ni kuliamba hanga asanyike atu akwo eze alemese umwe mutu ni kumuvumbika.
^ Chize Alisonekene, “niumwe mahasa kuzundula kwoko hanji kulu wakuhi.”
^ Hanji “kwendangana mu.”
^ Che kwamba, Heliopolishe.
^ Lize linalumbunuka ngwo, “yoze wakuvulamisa.”
^ Linalumbunuka ngwo, “kusema yisuho yaali.”
