Uputukilo 44:1-34
44 Kulutwe, Yosefwe yalweza mukwa-kusongwela zuwo lienyi ngwenyi: “Zalisa tuku ja atu wano ni kulia, kulita ni yize mahasa kumbata, mba use mbongo ja mutu ni mutu mu tuku yenyi.
2 Alioze sako musenge wami wa prata mu tuku ya kasula-songo wo hamuwika ni mbongo jenyi ja kulanda kulia.” Chocho yalinga yize Yosefwe amutumine.
3 Chimenemene, muze te hikwacha, yecha malunga hanga aye hamwe ni yimbulu jo.
4 Shimbu te kanda achipwa kusuku ni mbonge, Yosefwe yalweza mukwa-kusongwela zuwo lienyi ngwenyi: “Kaula malunga waze ni kawashi! Muze mwawana, mwamba kuli ayo ngwe: ‘Mumu liaka nwalinga yuma yipi se yenu kanulingila yuma yipema?
5 Mumu liaka nweya musenge wa mwene wami? Shina te kunwanyingikine ngwenu musenge wacho we mwata wami akunwina hanga alumbunune yuma ya kulutwe lia matangwa? Nwalinga chuma chipi chinji.’”
6 Chocho yaawana, yaalweza maliji jacho.
7 Ayo yamba kuli iye ngwo: “Mumu liaka nunambe yuma yino mwene wetu? Yetu kutuchi kuhasa kulinga chuma cha mutapu au.
8 Mbongo jize twawanyine mu tuku jetu, tunakajihilwisa kukatuka ku chifuchi cha Kanana. Mba kuchi te mutwiya prata hanji oru mu zuwo lia mwene wenu?
9 Mweswawo ndungo yenu munuwana ni musenge katamba kufwa, chikwo nawa, yetu mutupwa ndungo ja mwene wenu.”
10 Chocho, iye yamba ngwenyi: “Chilingiwe ngwe chize hinwamba: Mutu mweswawo munguwana ni musenge mapwa ndungo yami, alioze atu akwo masamba.”
11 Hazehene, mutu ni mutu yatula tuku yenyi, yayikasulula.
12 Iye yaputuka kufupa kanawa mu tuku jo, kuputukila kuli mukulwana ndo kuli kanuke. Mba yawana musenge mu tuku ya Mbenjamine.
13 Chocho, ayo yasuwa mazalo jo, mba mutu ni mutu yatwika yuma yize te anambata ha chimbulu, yahiluka mu mbonge.
14 Muze Yunda ni mandumbu jenyi anjilile mu zuwo lia Yosefwe, iye te uchilimo, mba ayo yafulamana hashi kumeso jenyi.
15 Yosefwe yamba kuli ayo ngwenyi: “Mumu liaka nwalinga chuma cha mutapu au? Shina kunwanyingikine ngwenu, mutu ngwe yami mahasa kumona yuma yize muyilingiwa kulutwe?”
16 Chocho, Yunda yamba ngwenyi: “Yika mutwamba kuli mwene wetu? Kuchi mutulumbununa? Kuchi mutuhasa kulisambisa ngwetu tuli akwa-ululi? Zambi wamwenemwene hasolola uhenge wa ndungo jenu. Haliapwila, yetu ni mutu yoze awana ni musenge hitwapwa ndungo jenu mwene wetu!”
17 Alioze, Yosefwe yamba ngwenyi: “Yami chichi kuhasa kulinga chuma cha mutapu au! Mutu yoze awana ni musenge mwe mapwa ndungo yami. Hakutwala kuli yenu akwo, yeenu kwenu ni sambukila kuli tatenu.”
18 Yunda yakundama kuli iye, yamba ngwenyi: “Lisesa mwene wami, ngunaliumbu, ngutayize kama kuhanjika ni yenu, kanda nutenuka kama ni yami ndungo yenu, mumu yenu nuli ngwe Falau.
19 Yenu nwatuhulile ngwenu: ‘Tatenu uchili ni mwono? Nukwete nawa ndumbwenu mukwo?’
20 Kashika twambile kuli yenu ngwetu: ‘Tuli ni tata kashinakaji ni ndumbwetu wa kanuke yoze tata asemene mu ushinakaji wenyi. Alioze yayo hanafu, mba mu jimo lia naye, iye wika mwe uli ni mwono, tato kakumuzanga chinji.’
21 Mba yenu yinwamba kuli yetu ngwenu: ‘Ngunehenenuye hanga ngumumone.’
22 Mba yetu yitwamba kuli yenu ngwetu: ‘Mukweze katambile kuhichika tato. Nyi mamuhichika, pundu lume tato kumafwa.’
23 Chocho yenu yinwamba kuli ndungo jenu ngwenu: ‘Kanda nuhiluka kuli yami nyi kunwejile ni mwana-kwenu.’
24 “Chocho, yituya kuli ndungo yenu tata, yitumulweza maliji jenu.
25 Kulutwe, tata yamba ngwenyi: ‘Hilukenu nukalande kulia.’
26 Alioze yetu yitwamba ngwetu: ‘Kutuchi kuhiluka. Nyi mwana-kwetu maya ni yetu, mutuhiluka, mumu kutwatambile kuhiluka kuli lunga wacho nyi mwana-kwetu wa kanuke kayile hamwe ni yetu.’
27 Chocho ndungo yenu tata yamba kuli yetu ngwenyi: ‘Yenu nunanyingika ngwenu pwo liami kangusemenene wika ana aali.
28 Alioze umwe wa kuli ayo yanguhichika, yingwamba ngwami: “Kota kamusasujola kuli umwe kashitu!” Mba chize haze chishi kumumona nawa.
29 Nyi munuya nawa ni yono kusuku ni yami, mba chimwe chuma chipi muchimuwana, pundu lume, munungulilisa ndo muze makangutwala mu Fuka.’*
30 “Haliapwila, nyi ngwe yami munguhiluka kuli ndungo yenu tata, chakuhona mukweze yono yoze tata azanga chinji,
31 muze mamona ngwenyi kanuke keshi ni yetu, iye kumafwa, ndungo jenu mapalumwisa kambu jitoma ja ndungo yenu tata ni chinyengo mu Fuka.*
32 Yami ndungo yenu nalingile chilakenyo chino kuli tata hakutwala kuli mukweze yono ngwami: ‘Nyi chahilukile nenyi kuli yenu, mungupwa ni mulonga kuli yenu ku mwono wami weswe.’
33 Haliapwila, lisesa, tayizenu kama yami ndungo yenu ngusale mu chihela cha kanuke ngwe ndungo wa mwene wami, hanga kanuke ahiluke ni mandumbu jenyi.
34 Kuchi munguhasa kuhiluka kuli tata chakuhona kanuke? Yami chazangile kumona tata mamona lamba!”
Footnotes
^ Hanji “ndo tangwa lize mungupalumuka mu fuka.” Hanji Sheole, kuma kwa afu eswe.
^ Hanji “ Sheole, hanji ngwetu kuma kwa afu eswe.” Tala Glossario.
