Uputukilo 45:1-28
45 Chocho, Yosefwe kahashile nawa kulihumikiza kumeso ja ngamba jenyi. Yamba kuli ayo ngwenyi: “Yenu eswe tuhukenu haze.” Muze Yosefwe alisolwele kuli mandumbu jenyi, niumwe ngamba te keshi mu zuwo.
2 Mba yaputuka kulila ni kukololoka, chocho A-Engitu yamwivwa ni akwa-zuwo lia Falau no yamwivwa.
3 Kusulaho, Yosefwe yamba kuli mandumbu jenyi ngwenyi: “Yami Yosefwe. Shina tata uchili ni mwono?” Alioze mandumbu jenyi kahashile kumukumbulula, mumu te kanalishimwoka.
4 Mba Yosefwe yamba kuli mandumbu jenyi ngwenyi: “Lisesa kundamenu.” Mba ayo yakundama kuli iye.
Iye yamba ngwenyi: “Yami ndumbwenu Yosefwe, yoze nwalanjishile kuli A-Engitu.
5 Alioze, kanda nunenganyana chipwe kulilamikiza umwe ni mukwo hakungulanjisa kuli A-Engitu, mumu Zambi kangutumine kulutwe lienu hanga ngulamwine miono.
6 Uno uli mwaka wamuchiali wa zala mu chifuchi, kwasala nawa miaka yitano yize atu kechi kalima chipwe kucha.
7 Alioze, Zambi kangutumine kulutwe lienu hanga ngufunge vungu lienu hashi,* ni kunulamwina mu jila ya kukomwesa.
8 Kashika, hi yenu ko nwangutumine kuno, alioze Zambi wamwenemwene, hanga ngupwe mwata wa akwa-kuhana* chiyulo kuli Falau, mukwa-kusongwela zuwo lienyi lieswe, ngupwe nawa nguvulu wa chifuchi cheswe cha Engitu.
9 “Hilukenu kuli tata ni kawashi nukamulweze ngwenu: ‘Mwane Yosefwe kamba ngwenyi: “Zambi hangutongola ngwe mwene wa chifuchi cheswe cha Engitu. Tweya kuno kuli yami. Kanda ushimbula.
10 Mukatwama mu chifuchi cha Ngoshone hakamwihi ni yami, yena, ana je, ajikulu je, ngombe je, mapanga je ni yuma yeswe yize uli nayo.
11 Mungupwa ni kunwaha kulia, mumu kuchili miaka yitano ya zala. Hanga yena ni akwa-zuwo lie nuchine kutokesa yuma yeswe nuli nayo ni kumona lamba mumu lia zala.’”
12 Haliapwila yenu ni mwana-kwetu Mbenjamine, nunalimwena ni meso jenu ngwenu yami lume ngunahanjika ni yenu.
13 Lwezenu tata uhenya weswe nguli nawo mu chifuchi cheswe cha Engitu ni yuma yeswe yize nwamona. Yeenu ni kawashi nunehe tata kuno.”
14 Chocho, iye yakangayika mwana-kwo Mbenjamine yaputuka kulila. Mba Mbenjamine neye yalilila ha kota* ya Yosefwe.
15 Iye yambejala mandumbu jenyi eswe, yalila ni kwakangayika. Mba mandumbu jenyi yahanjika nenyi.
16 Falau yatambula lusango yono ngwo: “Mandumbu ja Yosefwe keza!” Falau ni tuvumbi twenyi yawahilila ha kuchivwa.
17 Chocho, Falau yamba kuli Yosefwe ngwenyi: “Lweza mandumbu je ngwe, lingenu chino: ‘Twikenu yimbulu jenu kulia, nuye ku chifuchi cha Kanana,
18 hanga nukanehe tatenu ni asoko jenu eswe kuno. Mungukanwaha yuma yipema ya mu chifuchi cha Engitu, mba munukalia* kulia cha ku mavu apema* a mu chifuchi chino.’
19 Alweze ngwe, lingenu chino: ‘Andenu matemba mu chifuchi cha Engitu hanga nukambachilemo ana jenu ni mapwo jenu, nukambachilemo nawa tatenu, nwize kuno.
20 Kanda nulipikala ni yikumba yenu, mumu yuma yipema ya mu chifuchi cheswe cha Engitu muyipwa ya yenu.”’”
21 Ana ja Izalele yalinga chocho, mba Yosefwe yaaha matemba kulita ni shimbi ya Falau, yaaha nawa kulia chize te malia mu jila.
22 Mutu ni mutu yamwaha hina, alioze Mbenjamine yamwaha 300 ja mbongo ja prata ni mahina atano.
23 Kuli tato yatuma yuma yino: Yimbulu kumi waze te anambata yuma yipema ya mu Engitu, ni yimbulu akwo kumi waze te anambata kulia, mbolo ni kulia chikwo chize te tato malia mu wenyi.
24 Chocho, yecha mandumbu jenyi hanga aye kwo. Alioze muze te himaya, yamba kuli ayo ngwenyi: “Kanda nulizwelesa mu jila.”
25 Ayo yakatuka mu chifuchi cha Engitu, yaheta mu chifuchi cha Kanana, kuli tato Yakomba.
26 Chocho, yamulweza ngwo: “Yosefwe uchili ni mwono, iye mwe unayulu chifuchi cheswe cha Engitu!” Alioze Yakomba yevwa mu moko ni mu molu kekee, mumu te kanamono ngwenyi kanamwongo.
27 Muze amulwezele maliji eswe waze Yosefwe ambile, ni muze hamona matemba waze Yosefwe atumine hanga amumbachilemo, Yakomba yevwa tachi.
28 Izalele yamba ngwenyi: “Haliapwila natayiza yize nunambe. Mwanami Yosefwe uchili ni mwono! Natamba kuya hanga ngumumone shimbu kanda nguchifwa!”
Footnotes
^ Hanji “mu chifuchi.”
^ Chize Alisonekene, “ngwe tato.”
^ Chize Alisonekene, “yahetamina ha kota yenyi.”
^ Hanji “munukatwama.”
^ Hanji “ya maji.”
