Uputukilo 5:1-32
5 Uno we mukanda wa sango ja Alama. Tangwa lize Zambi atangile Alama, yamutanga mu chifwa cha Zambi.
2 Yaatanga lunga ni pwo. Ha tangwa lize aatangile, yaawahisa, yaaluka jina ngwenyi Atu.*
3 Alama yatwama miaka 130, mba yasema mwana wa lunga mu chifwa chenyi, yamuluka jina ngwenyi, Sete.
4 Mba muze hapwa tato ya Sete, Alama yatwama miaka 800. Chocho yasema ana a malunga ni a mapwo.
5 Kashika, miaka yeswe ya mwono wa Alama yapwile 930, mba yafwa.
6 Sete yatwama miaka 105, mba yasema Enoshe.
7 Mba muze hapwa tato ya Enoshe, Sete yatwama miaka 807. Chocho yasema ana a malunga ni a mapwo.
8 Kashika, miaka yeswe ya mwono wa Sete yapwile 912, mba yafwa.
9 Enoshe yatwama miaka 90, mba yasema Kenane.
10 Mba muze hapwa tato ya Kenane, Enoshe yatwama miaka 815. Chocho yasema ana a malunga ni a mapwo.
11 Kashika, miaka yeswe ya mwono wa Enoshe yapwile 905, mba yafwa.
12 Kenane yatwama miaka 70, mba yasema Mahalale.
13 Mba muze hapwa tato ya Mahalale, Kenane yatwama miaka 840. Chocho yasema ana a malunga ni a mapwo.
14 Kashika, miaka yeswe ya mwono wa Kenane yapwile 910, mba yafwa.
15 Mahalale yatwama miaka 65, mba yasema Yara.
16 Mba muze hapwa tato ya Yara, Mahalale yatwama miaka 830. Chocho yasema ana a malunga ni a mapwo.
17 Kashika, miaka yeswe ya mwono wa Mahalale yapwile 895, mba yafwa.
18 Yara yatwama miaka 162, mba yasema Enoke.
19 Mba muze hapwa tato ya Enoke, Yara yatwama miaka 800. Chocho yasema ana a malunga ni a mapwo.
20 Kashika, miaka yeswe ya mwono wa Yara yapwile 962, mba yafwa.
21 Enoke yatwama miaka 65, mba yasema Metusela.
22 Mba muze hapwa tato ya Metusela, Enoke yanunga ni kwenda ni Zambi* wamwenemwene ha miaka 300. Chocho yasema ana a malunga ni a mapwo.
23 Kashika, miaka yeswe ya mwono wa Enoke yapwile 365.
24 Enoke yanunga ni kwenda ni Zambi wamwenemwene. Kulutwe, niumwe kamumwene* nawa, mumu Zambi wamuchijile.
25 Metusela yatwama miaka 187, mba yasema Lameke.
26 Mba muze hapwa tato ya Lameke, Metusela yatwama miaka 782. Chocho yasema ana a malunga ni a mapwo.
27 Kashika, miaka yeswe ya mwono wa Metusela yapwile 969, mba yafwa.
28 Lameke yatwama miaka 182, mba yasema mwana umuwika.
29 Yamuluka jina ngwenyi, Noa,* ni kwamba ngwenyi: “Iye matunehena uhwimino ku milimo yikalu yize twakulinga ni kuhwimisa moko jetu waze akukalakala chinji ha mavu waze Yehova hanashingi.”
30 Mba muze hapwa tato ya Noa, Lameke yatwama miaka 595. Chocho yasema ana a malunga ni a mapwo.
31 Kashika, miaka yeswe ya mwono wa Lameke yapwile 777, mba yafwa.
32 Muze Noa akumbanyishine miaka 500, yasema Sheme, Hame ni Yafwe.
Footnotes
^ Chize Alisonekene, “Alama, Mutu.”
^ Chize Alisonekene, “Zambi.” Tala Glossario, “Zambi Wamwenemwene.”
^ Hanji “te keshiko nawa.”
^ Lize kota linalumbunuka ngwo, “Uhwimino, Ulembejeko.”
