Usolwelo wa Yesu Kristu Alwezele Kuli Yoano 13:1-18
13 Mba wamanyine ha masekeseke a ku kalunga-lwiji.
Namwene ngongo kanatuhuka mu kalunga-lwiji, kali ni kumi lia mbinga ni mitwe shimbiali, ni ha mbinga jenyi kumi lia yipangula, alioze ha mitwe yenyi hapwile majina a kushililika.
2 Ngongo yoze namwene te kanalifu ni changwi, alioze molu jenyi apwile ngwe molu a ursu, kanwa lienyi liapwile ngwe kanwa lia ndumba. Ndragau wahanyine kuli ngongo ndundo jenyi, ngunja yenyi ni chiyulo chinene.
3 Namwene mutwe umuwika wa ku mitwe ya ngongo wapwile ni chilonda cha kufwa, alioze chilonda chacho yachiuka, mba akwa-hashi eswe amukawile ni kulishimwoka.
4 Yaawayila ndragau mumu wahanyine chiyulo kuli ngongo, yawayila nawa ngongo ni maliji akwamba ngwo: “Iya unalifu ni ngongo yono, iya mahasa kwasa nenyi jita?”
5 Amuhele kanwa lize lia kuhanjika yuma yipi ni kushililika. Amuhele nawa ndundo ja kulinga yuma yize mazanga ha tukweji 42.
6 Iye wapakwile kanwa lienyi ashililike Zambi, ashililike jina lienyi, ni muma muze iye atwama. Ewa ni eswe waze atwama mwilu.
7 Amuhele chiyulo cha kwasa jita ni asandu ni kwakumba. Amuhele chiyulo cha kuyula mavungu eswe, yifuchi yeswe, malimi eswe ni minyachi yeswe.
8 Eswe waze atwama hano hashi makamuwayila. Chize ku fundamentu ya hashi, niumwe wa kuli ayo uli ni jina lienyi lia kusoneka mu chivungo cha mwono cha Mwana-panga yoze ashihile, wakuhi.
9 Yoze uli ni matwi, apanjike.
10 Nyi umwe katamba kuya mu undungo, makaya mu undungo. Nyi umwe mashiha umwe ni mukwale,* neye makamushiha ni mukwale. Chino chakufupiwa kunyongonona ni ufulielo wa asandu.
11 Mba namwene ngongo mukwo kanavumbuka hashi, iye wapwile ni mbinga jiali jalifwa ni ja Mwana-panga, alioze waputukile kuhanjika ngwe ndragau.
12 Iye kakusolola chiyulo cha ngongo mutangu kumeso jenyi. Yashinjila hashi ni waze atwamaho awayile ngongo mutangu, yoze chilonda chenyi cha kufwa achiukile.
13 Kakulinga yilayi yinene-yinene, chipwe lume kuhulumwisa kahia kukatuka mwilu ndo hashi kumeso ja atu eswe.
14 Iye kakupiangula akwa-hashi, mumu lia yilayi yize amutayijile kulinga kumeso ja ngongo, ni kwamba kuli akwa-hashi hanga alinge kaponya wa ngongo yoze alemekene ni mukwale, chipwe chocho kafwile.
15 Amutayijile kuhana mwiku* kuli kaponya wa ngongo, hanga kaponya wa ngongo ahanjike ni kushihisa eswe waze te malituna kuwayila kaponya wa ngongo.
16 Iye kakushinjila atu eswe—akehe ni anene, pichi ni yiswale, ndungo ni waze hi ndungo ko—hanga atambule mufunda wa chinyingi ha kwoko lia chindume hanji ha huma,
17 hanga niumwe kechi kuhasa kulanda hanji kulanjisa, shina wika yoze uli ni mufunda wa chinyingi, hanji ngwetu jina lia ngongo hanji chize analula jina lienyi.
18 Chikuma chino chakufupiwa mana: Yoze uli ni malinjekela, anyingike kwalula cha ngongo, mumu kwalula chacho chinalite ni cha mutu. Kwalula chenyi chili, 666.
