Usolwelo wa Yesu Kristu Alwezele Kuli Yoano 5:1-14
5 Namwene mu kwoko lia chindume lia Yoze te unatwama ha ngunja chivungo chakusoneka sali ni sali,* chakujika ni yijikilo shimbiali.
2 Namwene nawa mungelo wa tachi kanatambika ni liji linene ngwenyi: “Iya unatela kuvungulula chivungo ni kupatula yijikilo yacho?”
3 Alioze, niumwe mwilu, chipwe hashi, chipwe kushi lia hashi, wahashile kuvungulula chivungo hanji kutala yize yasonewenemo wakuhi.
4 Chocho, naputukile kulila chinji mumu niumwe yoze te watela kuvungulula chivungo hanji kutala yize yasonewenemo wakuhi.
5 Mba umwe wa kuli makulwana yamba kuli yami ngwenyi: “Kanda ulila. Tala! Mwe Ndumba yoze wa ku vungu lia Yunda, chikota cha Ndawichi, hakumba hanga avungulule chivungo ni yijikilo yacho shimbiali.”
6 Mba namwene mukachi ka ngunja ni mukachi ka yitangiwa yiwana ya mwono, ni mukachi ka makulwana, umwe Mwana-panga kanamana, kanasoloka ngwe hamushiha, iye wapwile ni mbinga shimbiali ni meso shimbiali. Meso kanalumbunuka spiritu shimbiali ya Zambi yize atumine hashi heswe.
7 Hazehene iye yakundama, yatambula chivungo chize chapwile ku kwoko lia chindume lia Yoze te unatwama ha ngunja.
8 Muze iye akwachile chivungo, yitangiwa yiwana ya mwono ni makulwana 24, yaafulamana kumeso ja Mwana-panga. Makulwana eswe apwile ni kalialia ni malonga a oru a too ni insensu. (Insensu yinalumbunuka yilemba ya asandu.)
9 O yemba mwaso waha ngwo: “Yena kuwatela kukwata chivungo ni kulamuna yijikilo yacho, mumu akushihile, mba ku manyinga je hiunalanjila Zambi atu a ku mavungu eswe, ni ku malimi eswe, ni ku yifuchi yeswe ni ku minyachi yeswe,
10 iye waapwishile mianangana ni asasendote a Zambi yetu. O makapwa mianangana ni kuyula hashi.”
11 Namwene ni kwivwa liji lia angelo anji waze ajingilikile ngunja, ni lia yitangiwa ya mwono ni lia makulwana, mba ha kwalula apwile yihuji ya yihuji* ni tununu a tununu,
12 o ambile ni liji linene ngwo: “Mwana-panga yoze ashihile, katela kutambula ndundo, ni upite, ni mana, ni tachi, ni ulemu, ni uhenya, ni yiwape.”
13 Mba nevwile yitangiwa yeswe ya mwilu, ni hashi, ni kushi lia hashi, ni mu kalunga-lwiji, ewa, yeswe yize yatwamamo yambile ngwo: “Yiwape, ni ulemu, ni uhenya, ni ndundo yikapwe kuli Yoze unatwama ha ngunja ni kuli Mwana-panga ndo ku miaka ya mutolo.”
14 Yitangiwa yiwana ya mwono yambile ngwo: “Amene!” mba makulwana afulamanyine ni kuwayila.
