Usolwelo wa Yesu Kristu Alwezele Kuli Yoano 8:1-13
8 Muze iye alamwine chijikilo chamuchishimbiali, mwilu mwaholele kuluu ha minutu makumi atatu.
2 Mba namwene angelo shimbiali waze anamana kumeso ja Zambi ni kwaha yitavwi shimbiali.
3 Kwahetele mungelo mukwo yoze te unakwata chikwachilo cha insensu cha oru ni kumana ku chilumbilo. Amuhele insensu yinji hanga ayilambule hamwe ni yilemba yeswe ya asandu ha chilumbilo cha oru chize chapwile kulutwe lia ngunja.
4 Ni mwishi wa insensu hamwe ni yilemba ya asandu, yakandukile kumeso ja Zambi ku kwoko lia mungelo.
5 Hazehene mungelo wanjile chikwachilo, wachizalishile ni kahia ka ha chilumbilo ni kuchinyasa hashi. Mba kwapwile kukulunguza, ni maliji, ni mihenyo, ni minyiko.
6 Mba angelo shimbiali waze apwile ni yitavwi shimbiali, aliluliekele hanga embe ni yitavwi yo.
7 Mutangu wembile chitavwi chenyi. Mba kwapwile chiwe ni kahia yakuchinga ni manyinga, ayinyashine hashi; chihanda chimuwika cha ku yihanda yitatu ya hashi chawemene, ni chihanda chimuwika cha ku yihanda yitatu ya mitondo chawemene, ni mwambu wa wisu weswe wawemene wupu.
8 Mungelo wamuchiali wembile chitavwi chenyi. Mba chimwe chuma chalifwa ngwe mulundu unene unafwindangana ni kahia, achinyashine mu kalunga-lwiji. Chocho chihanda chimuwika cha ku yihanda yitatu cha ku kalunga-lwiji chalumukine manyinga;
9 chihanda chimuwika cha ku yihanda yitatu ya yitangiwa* ya mwono ya mu kalunga-lwiji yafwile, ni chihanda chimuwika cha ku yihanda yitatu ya maulungu awonwene.
10 Mungelo wamuchitatu wembile chitavwi chenyi. Mba mwilu mwaholokele katongonoshi munene yoze te unaweme ngwe chichita cha mwambu,* waholokelele ha chihanda chimuwika cha ku yihanda yitatu ya ngiji ni ha mafuji a meya.
11 Jina lia katongonoshi wacho, Musase. Chocho chihanda chimuwika cha ku yihanda yitatu ya meya chalumukine asasu, mba atu anji afwile mumu lia meya jacho, mumu alumukine asasu.
12 Mungelo wamuchiwana wembile chitavwi chenyi. Mba chihanda chimuwika cha ku yihanda yitatu ya tangwa ni chihanda chimuwika cha ku yihanda yitatu ya kakweji, ni chihanda chimuwika cha ku yihanda yitatu ya tutongonoshi yalambiwile, hanga chihanda chimuwika cha ku yihanda yayo yitatu yikapwe milima hanga kanda kukapwa pangu ku chihanda chimuwika cha ku yihanda yitatu ya tangwa ni ufuku.
13 Mba namwene, ni kwivwa pupa kanahumuka mukachi ka lilu, yakololoka ni liji linene ngwenyi: “Lamba, lamba, lamba kuli akwa-hashi mumu lia yize kwasala hakehe hanga yilingiwe muze angelo atatu waze asalako memba yitavwi yo!”
