Usolwelo wa Yesu Kristu Alwezele Kuli Yoano 9:1-21
9 Mungelo wamuchitano wembile chitavwi chenyi. Mba namwene katongonoshi yoze wahulumukine mwilu ni kuholokela hashi, amuhele sapi ya jondo.
2 Katongonoshi* wacho wazulwile jondo, mu jondo yimukakumuka mwishi ngwe mwishi uze wakutuhuka mu lutengo munene wa kahia, tangwa ni fuji yiyilaa pwi ni mwishi uze te unakakumuka mu jondo.
3 Mu mwishi mwatuhukile mapasu waze alimwangine hashi, aahele chiyulo ngwe chiyulo chize akwete tuvwanda a hashi.
4 Aalwezele hanga achine kupihisa mwambu wa hashi, chipwe chiputa, chipwe mutondo niumwe, alioze apinjise wika atu waze keshi ni chijikilo cha Zambi ha mahuma jo.
5 Mapasu kahele chiyulo cha kushiha atu, alioze cha kwamwesa wika lamba ha tukweji atano. Lamba lize amwesene liapwile ngwe yikola yize mutu akwivwa nyi mamusuma kuli kavwanda.
6 Ha matangwa waze, atu makafupa kufwa, alioze kechi kachiwana, makazanga kufwa, alioze kufwa muchikachina.
7 Mapasu te kakusoloka ngwe tuvwalu waze analulieka hanga aye ku jita; ha mitwe yo hapwile yuma ngwe yipangula ya oru, chifwa cho chapwile ngwe cha atu,
8 alioze apwile ni kambu ngwe kambu ja mapwo. Mazo jo apwile ngwe mazo a ndumba,
9 o apwile ni yipwiko ngwe yipwiko ya utale. Lundunjila wa mapulwa jo, wapwile ngwe lundunjila wa matemba anji waze anakoko kuli tuvwalu muze anazombokela ku jita.
10 Chikwo nawa, ku michila yo kwapwile munyi ngwe a tuvwanda, chiyulo cho chakupinjisa atu ha tukweji atano chili ku muchila.
11 Kakwete mwanangana, mungelo wa mu jondo. Jina lienyi mu Hepreu ngwo, Apandone,* alioze mu limi lia Ngresia jina lienyi ngwo, Apoleyo.*
12 Lamba litangu hiliapalika! Alioze kanyamenu! Mumu lamba liali muliza kulutwe lia yino.
13 Mungelo wamuchisambano wembile chitavwi chenyi. Mba nevwile liji lize liakatukile mukachi ka mbinga jize japwile ku chilumbilo cha oru, chize chapwile kumeso ja Zambi
14 liambile kuli mungelo wamuchisambano yoze wapwile ni chitavwi ngwenyi: “Tusula angelo awana, waze ali akukasa ku lwiji munene Ufrateze.”
15 Chocho angelo awana waze aluliekele kulu ha ola, ni ha tangwa, ni ha kakweji ni ha mwaka, aatuswile hanga akashihe chihanda chimuwika cha ku yihanda yitatu ya atu.
16 Chize alwile tujita akwa-tuvwalu ngwo, kulakaji aali a tununu a tununu;* nevwile chize aalwile.
17 Mu usolwelo wami, tuvwalu ni waze atwamineho apwile ni yipwiko yichila ngwe kahia, yilawuluka ni yichiwuluka ngwe fundanga, mitwe ya tuvwalu yapwile ngwe mitwe ya ndumba, mu kanwa lio mwatuhukile kahia, mwishi ni fundanga.
18 Chihanda chimuwika cha ku yihanda yitatu ya atu, chafwile ni yilungo yino yitatu, kahia, mwishi ni fundanga yize yatuhukile mu kanwa lio.
19 Tachi ja tuvwalu wano jili ku kanwa ni ku michila yo, mumu michila yo yapwa ngwe kapela, yikwete mitwe. Michila yacho ye akupinjisa nayo atu.
20 Alioze atu akwo waze kafwile ku yilungo yino, kakalikonyekene ku yitanga ya moko jo; o kakechele kuwayila andemoniu, ni tuponya a oru, a prata, a unengu, a liwe ni a mutondo, waze keshi kumona, chipwe kwivwa, chipwe kwenda.
21 Ayo kakalikonyekene ha kushiha atu, chipwe ku yitanga yo ya yipanda-panda,* chipwe ku utanji* wo ni ku wiji wo.
Footnotes
^ Hanji “Iye.”
^ Linalumbunuka “Kwonwona.”
^ Linalumbunuka “Mukwa-kwonwona.”
^ Hanji “kapwile 20,000 x 10,000,” kulumbunuka, 200,000,000.
