Yilinga ya Apostolo 1:1-26
1 Teofwilu, ha mukanda utangu nasonekene hakutwala ku yuma yeswe yize Yesu aputukile kulinga ni kulongesa
2 ndo ha tangwa lize amutwalile mu malilu muze te hahana usongwelo kupalikila mu spiritu yisandu kuli apostolo jenyi waze asakwile.
3 Muze te hamona lamba linji ndo ku kufwa, Yesu yaasolwela yuma yinji yize yaahele shindakenyo ngwo, iye kali ni mwono. O kamumwene ha matangwa 40 mba iye yaalongesa hakutwala ku Wanangana wa Zambi.
4 Muze te analikungulula no, yamba kuli ayo ngwenyi: “Kanda nukatuka mu Yerusaleme, alioze nungenu ni kushimbwila chawana chize Tata alakenyene ngwe chize nanulwezele;
5 mumu kwamba pundu, Yoano kapapachishile ni meya, alioze kulutwe lia matangwa akehe yenu makanupapachisa ni spiritu yisandu.”
6 Chocho, muze alikungulwile, tumbaji yaahula Yesu ngwo: “Mwene, shina haliapwila muhilwisa wanangana kuli A-Izalele?”
7 Yesu yamba kuli ayo ngwenyi: “Kunwatambile kunyingika tungonde ni miaka yize Tata asele mu chiyulo chenyi.
8 Alioze, muze spiritu yisandu muyikeza hali yenu, munukatambula ndundo mba kumunukapwa yela jami mu Yerusaleme, ni mu Yundeya mweswe, ni mu Samaria, ndo ku masongo* a hashi.”
9 Muze te hamba maliji wano, shimbu o machimutala, yamupindumuna mwilu, mba lelwa yilimufuka. Chocho kamumwene nawa.
10 Shimbu te machihulikila meso jo mwilu, muze te Yesu anazezuka, susumuku kwasolokele malunga aali waze te anazala mazalo atoma amanyine hamwe no.
11 Malunga wano yamba kuli ayo ngwo: “Yenu malunga a ku Ngalileya, mumu liaka nunamana hano ni kuhulikila meso jenu mwilu? Yono Yesu achiza mukachi kenu ni kuzezuka mwilu, makeza chizechene ngwe nwamumona anayi mwilu.”
12 Hohene tumbaji yakatuka ku Mulundu wa Olevwe ni kuya ku Yerusaleme. Mulundu wacho wapwile hakamwihi ni mbonge ya Yerusaleme, wenyi wa kuhetako wapwile wa Sambata.
13 Muze te hanjila mu zuwo, o yakanduka ku chipatulo cha kwilu muze atulilile. Mu chipatulo chacho mwapwile Petulu, Yoano, Tiangu, Andeleu, Fwilipe, Tomase, Mbatolomeu, Mateu, Tiangu mwana wa Alefweu, Semone Zelote ni Yundase mwana wa Tiangu.
14 Wano eswe hamwe ni Maria naye ya Yesu ni mapwo akwo, ni ana-kwo a Yesu anungine ni kulemba ni mbunge yimuwika.
15 Ha matangwa waze, Petulu wakatukile mukachi ka mandumbu (unji wa atu* waze apwileho kapwile 120) mba yamba ngwenyi:
16 “Mandumbu, chisoneko te chatamba kumanunuka, chize spiritu yisandu yaprofetezele kupalikila muli Ndawichi hakutwala kuli Yundase yoze wapwile kasongo ka waze akwachile Yesu.
17 Amwalwile hamwe ni yetu, ni kumusakula hanga alinge* mulimo usandu.
18 (Lunga yono walanjile munda ni mbongo ja uhenge, mba muze aholokele hashi, mujimba wenyi yiupulika mukachi ni mijingwa yenyi yeswe yiyipusuka.
19 Mba waze eswe atwama mu Yerusaleme, yachinyingika. Chocho yaluka munda uze mu limi lio ene ngwo, Akelendama, liji lize linalumbunuka ngwo “Munda wa Manyinga.”)
20 Mumu chinasonewa mu mukanda wa Masamu ngwo: ‘Chihela chenyi chikapwe chahululu, niumwe mutu kanda akatwamamo’ ni ‘mulimo Wenyi akaulinge kuli mutu mweka.’
21 Kashika, chinalite umwe wa kuli malunga waze endele hamwe ni yetu ha mashimbu eswe waze Mwene Yesu alingile milimo yenyi* hakachi ketu,
22 chize muze amupapachishile kuli Yoano ndo ha tangwa lize azezukile mwilu, apwe chela hamwe ni yetu cha uhindukilo wenyi.”
23 Chocho yasakula aali, Yosefwe yoze te avuluka ngwo Mbarsavwa, jina lienyi likwo ngwo Justo, ni Mataya.
24 Mba yalemba ni kwamba ngwo: “Yehova,* Yenu nunanyingika mbunge ja atu eswe, tulwezenu kama yoze nwasakula hakachi ka malunga wano aali,
25 hanga atambule mulimo uno usandu ni chiteli chino cha kupwa apostolo, yuma yize Yundase ahichikile hanga akaule jila yenyi mwene.”
26 Mba yata chela hanga asakule umwe wa kuli malunga wano aali, chocho chela yichiholokela hali Mataya. O amwalwile* hamwe ni apostolo 11.
Footnotes
^ Hanji “ndo ku yihela ya kusuku.”
^ Hanji “mbunga.”
^ Hanji “chihanda mu.”
^ Chize Alisonekene, “anjiliele ni kufwambwoka.”
^ Tala Apendice A5.
^ Hanji “amumwene ngwe chize te akumona akwo 11.”
