Yilinga ya Apostolo 10:1-48
10 Kwapwile umwe lunga ku Sezarea, jina lienyi Koneliu, kapitau ka chizavu cha maswalale chize avuluka ngwo, chizavu cha Italia.
2 Iye ni akwa-zuwo lienyi eswe kapwile atu waze te akuvwila Zambi woma. Koneliu kapwile ni kuhana yawana yinji kuli atu ni kuliumba kuli Zambi matangwa eswe.
3 Ha ola yamuchilivwa ya mwalwa, yamona zwalala mu usolwelo mungelo wa Zambi kanakundama kuli iye ni kwamba ngwenyi: “Koneliu!”
4 Koneliu yamutala ni woma, mba yamuhula ngwenyi: “Mwene kuchi?” Mungelo yakumbulula ngwenyi: “Zambi hatayiza yilemba ye ni yawana yize wakuhana kuli yiswale. Hakwiwuluka.
5 Haliapwila, tuma malunga ku Yopa, akasake umwe lunga avuluka ngwo Semone, jina lienyi likwo Petulu.
6 Lunga wacho kali ku zuwo lia Semone mukwa-kukotongola malambu yoze ukwete zuwo ku sesa lia kalunga-lwiji.”
7 Muze mungelo yoze te anahanjika nenyi haya, Koneliu yasanyika aali a kuli tuvumbi twenyi ni swalale umuwika hakachi ka waze akumulingila yoze te wakuvwila Zambi woma.
8 Yaalweza yuma yeswe ni kwatuma ku Yopa.
9 Muze kwachile, shimbu o te achili mu wenyi hakamwihi ni mbonge yacho, Petulu yanyina helu lia zuwo hanga akalembe ha ola yamuchisambano.*
10 Chocho, yevwa zala yinji mba yazanga kulia. Shimbu te machiteleka yamona mu usolwelo,
11 lilu liakwazuluka ni chimwe chuma chinene chalifwa ngwe hina lia linyu, liakukasa ku mbango jiwana chinahulumuka ndo hashi.
12 Ha hina liacho hapwile tushitu eswe a yiliato yiwana, tushitu waze akulikoka* hashi, ni tujila a mwilu.
13 Limwe liji yilimwamba ngwo: “Petulu katuka, shiha ulie!”
14 Chocho Petulu yakumbulula ngwenyi: “Ka Mwene, mumu kanda nguchilia kama nichimwe chuma chipi hanji cha luchisa.”
15 Cheka nawa, liji yiliza kuli iye ha chisuho chamuchiali ngwo: “Kanda uvuluka chuma chize Zambi hanapemesa ngwe cha luchisa.”
16 Chino yichilingiwa ha chisuho chamuchitatu. Mba hazehene, hina liacho alitwalile mwilu.
17 Petulu yaputuka kukakajana ni kulihula yize usolwelo uze amwene te unalumbunuka. Ha shimbu lizeliene, malunga waze Koneliu atumine yahula kuze kwapwile zuwo lia Semone ni kumana ku chikolo.
18 O yasanyika umwe wa ku zuwo liacho ni kumuhula nyi Semone yoze avuluka ngwo Petulu kwali.
19 Shimbu Petulu te machinyonga hakutwala ku usolwelo, spiritu yiyimwamba ngwo: “Tala, kuli malunga atatu waze anakufupu.
20 Katuka upalumuke uye hamwe no. Kanda uyambashana mumu yami ngunakaatuma.”
21 Chocho Petulu yapalumuka yaliwana ni malunga jacho ni kwamba ngwenyi: “Yami uno, mutu nunafupu yami. Yika yanuneha kuno?”
22 O yamba ngwo: “Koneliu kapitau ka tujita, mukwa-ululi kanda mukwa-kuvwila Zambi woma, yoze nawa ukwete lufuma mupema ku vungu lieswe lia A-Yunda, katambula usongwelo wa kuli Zambi kupalikila muli umwe mungelo, anusanyike nuye ku zuwo lienyi hanga apanjike maliji waze munumulweza.”
23 Chocho, Petulu yaanjisa mu zuwo ni kwalweza homa ha kupomba.
Mba muze te hikwacha, Petulu yakatuka yaya hamwe no. Ni amwe a kuli mandumbu ku Yopa, yaya hamwe nenyi.
24 Ha kupalika cha tangwa limuwika, yaaheta mu Sezarea. Koneliu te kanaashimbwila. Iye te hakungulula asoko jenyi eswe ni masepa jenyi.
25 Muze Petulu ahetele, Koneliu yamupatwiza, yafulamana ku molu jenyi ngwe chilayi cha vumbi.
26 Alioze Petulu yamukatwisa ngwenyi: “Katuka; ni yami nguli wika mutu.”
27 Shimbu te machihanjika nenyi, yanjila mu zuwo, yawana atu anji te hakungama.
28 Petulu yamba kuli ayo ngwenyi: “Nunanyingika kanawa ngwenu, Ka-Yunda katambile kulikata hanji kuliendela ni umwe mutu wa ku vungu lieka. Alioze Zambi kangulweza ngwenyi, chatambile kuvuluka mutu niumwe ngwami mupi hanji wa luchisa.
29 Kashika muze nunakangusanyika, yingwiza chakuhona kuhamika. Haliapwila ngulwezenu chikuma chize nwangusanyikina.”
30 Koneliu yakumbulula ngwenyi: “Ha matangwa awana kunyima, ami te ngunalembe mu zuwo liami ha ola ngwe yino, ha ola yamuchilivwa. Muze kwasolokele umwe lunga kulutwe liami yoze te unazala mazalo apeyima,
31 iye yamba ngwenyi: ‘Koneliu, Zambi kevwa yilemba ye ni kwiwuluka yawana yize wakuhana kuli yiswale.
32 Kashika, tuma umwe ku Yopa hanga asanyike Semone, jina lienyi likwo Petulu. Lunga wacho kali ku zuwo lia Semone mukwa-kukotongola malambu yoze ukwete zuwo ku sesa lia kalunga-lwiji.’
33 Hazehene yingutuma kukusanyika, kashika walinga kanawa kwiza kuno. Haliapwila, eswe tuli kumeso ja Zambi hanga twivwe yuma yeswe yize Yehova* hakutuma kutwambulwila.”
34 Petulu yaputuka kuhanjika ni kwamba ngwenyi: “Haliapwila ngunanyingika pundu ngwami, Zambi keshi katonde.
35 Mumu ku mavungu eswe iye kakutayiza yoze wakumuvwila woma ni kulinga yuma yalita.
36 Iye watumine liji lienyi kuli ana a Izalele ni kwambulwila sango jipema ja sambukila kupalikila muli Yesu Kristu, mwe Mwene wa eswe.
37 Yenu nunanyingika yikuma yinene yize yafumanyine mu Yundeya mweswe, putu ku Ngalileya, muze Yoano te hahwisa kwambujola hakutwala ku upapachiso
38 wa Yesu Ka-Nazare yoze Zambi awayishile ni spiritu yisandu ni ndundo. Iye wendele ku yihela yeswe ni kulinga yipema ni kuuka waze eswe amwesene lamba kuli Ndiapu, mumu Zambi kapwile hamwe nenyi.
39 Yetu tuli yela ja yuma yeswe yize iye alingile mu chifuchi cha Yundeya, ni mu Yerusaleme. Chipwe chocho, o amushihile ni kumuhachila ha mutondo wa lamba.
40 Alioze Zambi wamuhindwishile ha tangwa liamuchitatu ni kumusolola,
41 hi kuli atu eswe ko, alioze kuli yela waze Zambi aliangile kutongola, kuli yetu, waze twalile ni kunwa hamwe nenyi muze te hamuhindwisa hakachi ka afu.
42 Iye katuhele nawa shimbi ya kwambujola kanawa kuli atu eswe ngwo, iye mwe Zambi asakwile hanga apwe ngaji wa waze ali ni mwono ni wa afu.
43 Aprofeta eswe kahanyine uchela hali iye ngwo, mweswawo yoze mamufuliela mamukonekena shili yenyi kupalikila mu jina lienyi.”
44 Shimbu Petulu te machihanjika maliji wano, spiritu yisandu yiyiza hali eswe waze evwile lie liji.
45 Akwa-kufuliela* a ku ungalami waze ejile hamuwika ni Petulu, yalishimwoka. Mumu chawana cha spiritu yisandu achihanyine nawa kuli atu a ku mavungu.
46 O evwile kanahanjika mu malimi eka-ni-eka ni kuchichimieka Zambi. Chocho Petulu yamba ngwenyi:
47 “Atu wano katambula spiritu yisandu ngwe yetu. Iya mahasa kwamba ngwenyi, o katambile kwapapachisa ni meya?”
48 Iye yamba hanga aapapachise mu jina lia Yesu Kristu. No yaliumba kuli Petulu atwame hamwe no amwe matangwa.
