Yilinga ya Apostolo 11:1-30
11 Apostolo ni mandumbu waze te atwama mu Yundeya, yevwa ngwo akwa-mavungu no hatayiza liji lia Zambi.
2 Chocho muze Petulu akandukile ku Yerusaleme, atu waze apwile ni kukalila chikuma cha ungalami yaputuka kumusopesa,*
3 ngwo: “Wanjilanga mu zuwo lia yilima ni kulia hamwe no.”
4 Alioze Petulu yaputuka kwalumbunwina mu yimako-yimako yuma yeswe yize yalingiwile ngwo:
5 “Napwile mu mbonge ya Yopa ni kulemba, chocho mu umwe usolwelo yingumona chimwe chuma chinene chalifwa ngwe hina lia linyu liakukasa ku mbango jiwana chinahulumuka ndo hashi, mba yichikundama kuli yami.
6 Ha kuhulikilaho meso jami, yingumona tushitu eswe a yiliato yiwana, ngongo, tushitu akulikoka hashi,* ni tujila a mwilu.
7 Chikwo nawa, nevwile limwe liji lize liangwambile ngwo: ‘Petulu, katuka, shiha ulie!’
8 Alioze yami yingukumbulula ngwami: ‘Ka Mwene, mumu kanda nguchilia kama nichimwe chuma chipi hanji cha luchisa.’
9 Mba liji yiliza ha chisuho chamuchiali ngwo: ‘Kanda uvuluka chuma chize Zambi hanapemesa ngwe cha luchisa.’
10 Chino yichilingiwa nawa ha chisuho chamuchitatu, mba hazehene hina liacho alitwalile mwilu.
11 Ha shimbu lizeliene, malunga atatu waze angutuminyine ku Sezarea yaheta ku zuwo lize te natwama.
12 Chocho spiritu yiyingulweza hanga nguye no chakuhona kuyambashana. Mandumbu wano asambano, kayile hamwe ni yami, mba yitunjila mu zuwo lia lunga wacho.
13 “Lunga wacho yatwambulwila ngwenyi, kamwene umwe mungelo yoze wamusolokelele ku zuwo lienyi ni kumulweza ngwenyi: ‘Tuma malunga ku Yopa hanga asanyike Semone jina lienyi likwo Petulu,
14 maliji waze iye makakwambulwila, makalamwina yena ni akwa-zuwo lie eswe.’
15 Muze naputukile kuhanjika, spiritu yisandu yiyiza hali ayo chizechene ngwe yejile hali yetu ku uputukilo.
16 Chocho yingwiwuluka maliji a Mwene waze ambile ngwenyi: ‘Yoano kapapachishile ni meya, alioze yenu makanupapachisa ni spiritu yisandu.’
17 Kashika nyi Zambi kahele chawana chimuwika ngwe chize atuhele yetu nawa twakufuliela muli Mwene Yesu Kristu, yami iya mba te ngukinde Zambi?”*
18 Muze evwile yuma yino, kahamikine nawa, mba yaachichimieka Zambi ni kwamba ngwo: “Chamwenemwene chipwe akwa-mavungu no Zambi hanehe kulikonyeka akatambule mwono.”
19 Tumbaji waze amwanganyine ha luyinda yoze waputukile mumu lia Eshetevau, yaya ndo ku Fwenishia, ni Shipre, ni Andiakia ni kwambujola lie liji kuli A-Yunda wika.
20 Alioze hakachi ko hapwile malunga a ku Shipre ni a ku Sairene waze ayile ku Andiakia mba yaputuka kuhanjika ni atu waze te akuhanjika limi lia Ngregu, ni kwambulwila sango jipema ja Mwene Yesu.
21 Kwoko lia Yehova* liapwile hamwe no, kashika anji afulielele ni kukaula Mwene.
22 Sango jino jahetele ku chikungulwila cha Yerusaleme mba yatuma Mbarnabe ku Andiakia.
23 Muze iye aheteleko, yamona chawana cha keke ya Zambi, chocho yawahilila chinji mba yaputuka kukolweza eswe hanga anunge muli Mwene ni mbunge yimuwika.
24 Mumu Mbarnabe kapwile lunga mupema wa too ni spiritu yisandu ni ufulielo. Mba atu anji yaputuka kufuliela muli Mwene.
25 Chocho iye yaya ku Tarsu ni kufupa Saulu.
26 Muze amuwanyine, yamutwala ku Andiakia. Mba ha mwaka wa muundu akungulukile hamwe ni mandumbu eswe ni kulongesa mbunga yinene. Ku Andiakia kwenako aputukile kuluka tumbaji ngwo, Akwa-Kristu kupalikila mu usongwelo wa Zambi.
27 Ha matangwa aze ku Yerusaleme kwakatukile amwe aprofeta ni kupalumuka ku Andiakia.
28 Umwe wa kuli ayo avuluka ngwo Angavu, yakatuka, yamba kupalikila mu spiritu yisandu ngwenyi, mukukapwa kapunga munene mu yifuchi yeswe ya hashi. Kapunga wacho kejile ha matangwa ja mwanangana Kelautiu.
29 Tumbaji yatesa mutu ni mutu kulita ni uhashi wenyi kutuma ukwaso kuli mandumbu waze te atwama mu Yundeya.
30 Mba yachilinga hakutuma ukwaso wacho kuli makulwana a mu chikungulwila kupalikila muli Mbarnabe ni Saulu.
Footnotes
^ Hanji “kumuzwelesa.”
^ Hanji “akukalala.”
^ Hanji “kulimika ni Zambi.”
^ Tala Apendice A5.
