Yilinga ya Apostolo 12:1-25
12 Ha matangwa aze, mwanangana Heronde yaputuka kumwesa lamba amwe a mu chikungulwila.
2 Iye yatuma kushiha Tiangu yayo ya Yoano ni katana.
3 Ha kumona ngwenyi chino chevwishile A-Yunda kuwaha, yakwata nawa Petulu. (Chino chalingiwile ha matangwa a Chiwanyino cha Mbolo Kuyishi Futunwiso.)
4 Muze te hamukwata, yamusa mu zuwo lia ususu, yamukunjika ku yizavu yiwana ya maswalale hanga amufunge. Chizavu ni chizavu chapwile ni maswalale awana awana, se wazangile kumukunjika* ku mbunga hanyima lia Chizomboka.
5 Chocho Petulu yanunga mu zuwo lia ususu, alioze chikungulwila cheswe chalembele chikolo kuli Zambi mumu hali iye.
6 Ha ufuku uzewene muze Heronde hazanga kumukunjika kuli mbunga, Petulu te mu tulo ali mukachi ka maswalale aali wa kukasa ni malenge aali ni ku chikolo neko kwapwile tulayi aali waze te anafungu zuwo lia ususu.
7 Susumuku, mungelo wa Yehova* yasoloka, mba pangu yilipanguka mu zuwo lia ususu. Yanyika Petulu, yamulawisa ni kumulweza ngwenyi: “Katuka ni kawashi!” Chocho malenge aholokele ku moko jenyi.
8 Mungelo yamwamba ngwenyi: “Zala mazalo ni sapato je.” Petulu yachilinga. Mba mungelo yamwamba nawa ngwenyi: “Zala mazalo je a helu ungukaule.”
9 Chocho iye yatuhuka yamukaula. Alioze iye kanyingikine ngwenyi chuma chize te chinalingiwa kupalikila muli mungelo chili chamwenemwene. Kwamba pundu, iye kanyongene ngwe kanamono umwe usolwelo.
10 Yahiana tulayi atangu ni amuchiali, yaheta ku chajilo cha utale chize chatwala mu mbonge. Mba chene chaliazulwile, chocho, o atuhukile ni kupalika ndusu tapalo limuwika. Hazehene mungelo yamuhichika.
11 Muze Petulu amwene yuma yize te yinalingiwa, yamba ngwenyi: “Haliapwila hinanyingika chamwenemwene ngwami, Yehova* hatuma mungelo wenyi hanga angupulule ku moko ja Heronde ni ku yuma yeswe yize A-Yunda ambile kungulinga.”
12 Muze yuma yamulumbunukine kanawa, yaya ku zuwo lia Maria naye ya Yoano jina lienyi likwo Marku kuze te atu analikungulwila ni kulemba.
13 Petulu yangongwela ku chikolo cha haze, umwe mwana-pwo kavumbi jina lienyi Ronda yeza ni kwazulula.
14 Ha kwivwa liji lia Petulu, yawahilila chinji, kashika kazulwile pito. Yanjila fuji mu zuwo ni kwambulwila akwo ngwo, Petulu kanamana ku chikolo.
15 O yamba kuli iye ngwo: “Unazaluka.” Alioze iye yashindakenya ngwenyi, chamwenemwene lume. O yamba ngwo: “Mungelo wenyi.”
16 Chocho Petulu yanunga ku chikolo ni kungongwela. Mba muze azulwile, yamumona, yakomoka chinji.
17 Iye yaalinga chilayi ni kwoko hanga ahole, mba yaambulwila mu yimako-yimako chize Yehova* amuchijile mu zuwo lia ususu ni kwamba ngwenyi: “Ambululenu yino yuma kuli Tiangu ni kuli mandumbu.” Chocho yakatuka yaya ku chihela cheka.
18 Muze te hikwacha, kwapwile chizungu-zungo chinji mukachi ka maswalale mumu afupile kunyingika yize yalingiwile kuli Petulu.
19 Heronde kamufupile chinji alioze kamuwanyine. Chocho yehujola tulayi ni kutuma hanga aamwese lamba. Mba Heronde yakatuka mu Yundeya yaya ku Sezarea ni kutwamako amwe mashimbu.
20 Heronde yevwila akwa-Teru ni akwa-Sendone ufwatulo unji. Kashika e atu yalitesa ni mbunge yimuwika yeza kuli iye. Mba muze te halembejeka Mbelastu, mukwa-lutwe wa zuwo lia mwanangana, yeta hanga alivwashane ni mwanangana mumu chifuchi cho te chakutambula kulia mu chifuchi cha mwanangana.
21 Ha tangwa limwe, Heronde yazala mazalo jenyi a wanangana ni kutwama ha chitwamo chenyi cha wanangana mba yaputuka kuhanjika kuli atu.
22 Kashika, atu waze te analikungulula yaputuka kukololoka ngwo: “Ali lili liji lia umwe zambi hi lia mutu ko!”
23 Hazehene mungelo wa Yehova* yamulamba mumu iye kachichimiekene Zambi. Chocho yafwa, yamulia kuli mavuno.
24 Alioze liji lia Yehova* liafumanyine, ni atu anji afulielele.
25 Muze Mbarnabe ni Saulu te hamanununa mulimo wo wa kuhana ukwaso mu Yerusaleme, o yahiluka ni kuya hamwe ni Yoano, avuluka ngwo Marku.
Footnotes
^ Hanji “kumusolola hanga amusopese.”
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
