Yilinga ya Apostolo 18:1-28
18 “Kulutwe lia yino yuma, Paulu yakatuka ku Atene yaya ku Korindu.
2 Koko, yawanako umwe Ka-Yunda jina lienyi Akwila yoze wasemukinyine mu mbonge ya Ponta, te wachikatuka ku Italia hamwe ni mukwo-pwo Prisela. Mumu Kelautiu wahanyine shimbi ngwenyi, A-Yunda eswe akatuke ku Roma. Chocho, Paulu yaya ni kwameneka.
3 Amu eswe apwile ni kulinga mulimo umuwika, iye yatwama ku zuwo lio ni kukalakala hamwe no, mumu kapwile akwa-kutunga mbalaka.
4 Ha Sambata jeswe, Paulu te kakulongesa* mu sunangonga ni kukolweza A-Yunda ni A-Ngresia alumune manyonga jo hanga afuliele.
5 Muze Saila ni Timoteu akatukile ku Masendoniya ni kuya ku Korindu, Paulu walihanyine chikolo mu mulimo wa kwambujola liji, ni kuhana uchela kuli A-Yunda ni kusolola ngwenyi, Yesu mwe Kristu.
6 Alioze, o anungine ni kulimika nenyi ni kumwihiahia. Mba iye yakukumuna mazalo jenyi ni kwamba ngwenyi: “Manyinga jenu akapwe ha mitwe yenu. Yami ngunasambe. Chize haliapwila, kumunguya kuli akwa-mavungu.”
7 Chocho yakatuka mu sunangonga, yanjila mu zuwo lia umwe lunga avuluka ngwo, Titu Justu mukwa-kuwayila Zambi yoze zuwo lienyi liapwile sali lia sunangonga.
8 Krisepu mukwa-kuyula sunangonga, yafuliela muli Mwene hamwe ni akwa-zuwo lienyi eswe. Chikwo nawa, A-Korindu anji waze evwile lie liji yafuliela ni kwapapachisa.
9 Ha umwe ufuku, Mwene yambila Paulu mu umwe usolwelo ngwenyi: “Kanda wivwa woma, nunga ni kuhanjika kanda uhola,
10 mumu yami nguli hamwe ni yena, niumwe mutu makukwata ni kukulinga upi wakuhi. Mumu atu anji nguli no mu mbonge yino.”
11 Kashika, iye yatwamako mwaka ni tukweji asambano ni kulongesa liji lia Zambi hakachi ko.
12 Muze Ngaliu apwile nguvulu mu Akeya, A-Yunda yalichinga, yakatukila Paulu yamutwala ku chota cha usopelo,
13 ni kwamba ngwo: “Lunga yono kanashinjila atu kuwayila Zambi mu jila yize kuyalitele ni shimbi.”
14 Alioze, muze Paulu ambile kuhanjika, Ngaliu yamba kuli A-Yunda ngwenyi: “Nyi chamwenemwene chino chinatale ha chimwe chuma chipi hanji ha umwe mulonga unene, kachi nanupanjika.
15 Alioze amu chinatale ha maliji, majina ni ha shimbi yenu, ayi ya yenwene. Yami chazangile kupwa ngaji ha yuma yacho.”
16 Chocho, yaahanga mu chota cha usopelo.
17 O eswe akwachile Sosetene mukwa-kuyula sunangonga, yaputuka kumulamba kulutwe lia chota cha usopelo. Chipwe chocho, Ngaliu kakalinjishile ha yuma yacho.
18 Paulu yatwama matangwa anji ku Korindu, mba yalishika ni mandumbu yanjila mu ulungu yaya ku mbonge ya Seria hamwe ni Prisela ni Akwila. Ku Senekwea iye watewile kambu jenyi mumu lia chilakenyo chize alingile.
19 O yaheta ku Efwesu, chocho Paulu yaahichikako. Alioze iye mwene yanjila mu sunangonga ni kukwasa A-Yunda hanga awane ulumbunwiso wa Yisoneko.
20 Ayo yamwita hanga atwame no amwe mashimbu, alioze iye katayijile.
21 Paulu yalishika no ni kwamba ngwenyi: “Mungukafuna nawa kuno nyi Yehova* mapala.” Mba yakatuka ku Efwesu yanjila mu ulungu,
22 yaya ku Sezarea. Yakanduka* yameneka chikungulwila, kulutwe yapalumuka ku Andiakia.
23 Muze atwamineko amwe mashimbu, yaya mu limbo ni limbo mu chifuchi cha Ngalashia ni Fwijia ni kutakamisa tumbaji eswe.
24 Alioze umwe Ka-Yunda avuluka ngwo Apolu yoze wasemukinyine ku Alexandria yaheta ku Efwesu. Iye kapwile umwe lunga walongoloka yoze te wanyingika kanawa Yisoneko.
25 Lunga yono kamulongesele jila ya Yehova,* wazalile too ni spiritu.* Iye wahanjikile ni kulongesa pundu hakutwala kuli Yesu. Alioze te kananyingika wika upapachiso wa Yoano.
26 Iye yaputuka kuhanjika ni hamu mu sunangonga, alioze muze Akwila ni Prisela amuvwile, yamusanyika ku tenga ni kuputuka kumulumbunwina kanawa jila ya Zambi.
27 Chikwo nawa, amu Apolu azangile kuya ku Akeya, mandumbu yasonekena tumbaji ni kweeta hanga amutambule kanawa. Mba muze aheteleko, yakwasa anji waze afulielele mumu lia chawana cha keke ya Zambi.
28 Yakumika chikolo A-Yunda kumeso ja atu eswe ni kushindakenya chikolo ha Yisoneko ngwenyi, Yesu mwe Kristu.
Footnotes
^ Hanji “kuhanjika.”
^ Tala Apendice A5.
^ Kota ku Yerusaleme.
^ Tala Apendice A5.
^ Spiritu ya Zambi.
