Yilinga ya Apostolo 19:1-41
19 Shimbu Apolu te uchili ku Korindu, Paulu yapalika mu yihunda yeswe ni kupalumuka ndo ku Efwesu. Yawanako tumbaji amwe,
2 yaahula ngwenyi: “Shina nwatambwile spiritu yisandu muze nwafulielele?” O yamukumbulula ngwo: “Kanda twivwa kama nichimwe hakutwala ku spiritu yisandu.”
3 Paulu yaahula ngwenyi: “Mba ni upapachiso uka anupapachishile?” O yakumbulula ngwo: “Ni upapachiso wa Yoano.”
4 Paulu yamba ngwenyi: “Upapachiso wa Yoano wapwile chilayi cha kulikonyeka; iye kapwile ni kulweza atu hanga afuliele muli Yesu yoze te meza kulutwe lienyi.”
5 Muze evwile chino, yaapapachisa mu jina lia Mwene Yesu.
6 Mba muze Paulu aasayikile moko, spiritu yisandu yiyiza hali ayo, o yaputuka kuhanjika mu malimi ni kuprofeteza.
7 Hapwile unji wa malunga 12.
8 Ha tukweji atatu, iye wanjilile mu sunangonga ni kuhanjika ni hamu, ni kwaha shindakenyo hakutwala ku Wanangana wa Zambi.
9 Alioze, amu atu amwe akalile mbunge ni kulituna kufuliela, yaahanjika yuma yipi hakutwala ku Jila ya Mwene ku meso ja atu. Kashika Paulu yakatuka kuli ayo yahandununa tumbaji ni kwalongesa tangwa ha tangwa mu shikola ya Teranu.
10 Chino chalingiwile ha miaka yaali ndo muze A-Yunda ni A-Ngresia eswe waze te atwama mu mbonge ya Azia evwile liji lia Mwene.
11 Zambi kalingile yikomokeso yinene kupalikila muli Paulu.
12 Mumu chipwe mahina ni yitambala yize yapwile ni kukwata ku mujimba wa Paulu, te kakuyitwala kuli mieji. Chocho mieji ahindukile ni maspiritu api atuhukile.
13 Mba A-Yunda amwe waze apwile ni kuya ku yihela yeka ni yeka ni kutuhwisa andemoniu, yeseka kuvuluka jina lia Mwene Yesu hali waze apwile ni maspiritu api ngwo: “Ngunambe kuli yenu mu jina lia Yesu yoze Paulu anambujola ngwami, tuhukenu.”
14 Ana shimbiali a umwe sasendote wa lutwe Ka-Yunda avuluka ngwo, Sevwa no ye apwile ni kulinga.
15 Chocho ndemoniu yaakumbulula ngwenyi: “Yami ngunanyingika Yesu ni Paulu. Mba yenu nuli aya?”
16 Mutu yoze te uli ni spiritu yipi yaatumbukila, yaazeyesa, yalamba malunga waze eswe. O yatuhuka mu zuwo ni kuchina fuji uselesele ni yilonda ha mijimba.
17 Muze A-Yunda ni A-Ngresia waze te atwama mu Efwesu evwile yuma yacho, yevwa woma unji. Chipwe chocho, jina lia Yesu lianungine ni kufumana.
18 Anji a kuli waze afulielele, apwile ni kwiza kuli tumbaji hanga ambulule ni kutayiza yitanga yo hatoma.
19 Chikwo nawa, atu anji waze te akulinga tufutafuta yaneha mikanda yo yayocha kumeso ja atu eswe. Ha kwalula ndando yayo, yamona ngwo te yakufwika makumi atano a tununu (50,000) a mbongo ja prata.
20 Chocho, liji lia Yehova* liakolele ni tachi ni kufumana.
21 Kulutwe lia yino yuma, Paulu yatesa ngwenyi, muze mapalika ku Masendoniya ni Akeya, maya ku Yerusaleme. Iye yamba ngwenyi: “Muze munguhetako, natamba nawa kuya ku Roma.”
22 Chocho, iye yatuma aali a kuli yikwashi jenyi ku Masendoniya, Timoteu ni Erasetu, alioze mwene yasala mu mbonge ya Azia ha amwe mashimbu.
23 Ha mashimbu jacho, kwapwile chizungo-zungo chinene mumu lia jina lia Mwene.
24 Umwe lunga fuli-ya-prata avuluka ngwo Ndemetriu, kapwile ni kulinga tutembele tukehe-tukehe twa prata twalifwa ni tembele ya Artimise, chocho wapichishile chinji akwa-milimo jenyi.
25 Iye yakunga wano eswe hamwe ni fuli akwo, yamba ngwenyi: “Malunga, nunanyingika kanawa ngwenu, upite wetu wakukatuka ku mulimo uno.
26 Haliapwila nunamono ni kwivwa ngwenu, hi mu Efwesu wika ko, alioze ku yihela yinji ya mu mbonge ya Azia, yono Paulu kanakununa atu anji kwalumuna manyonga jo ha kwamba ngwenyi, tuzambi waze atu akulinga hi tuzambi amwenemwene ko.
27 Chikwo nawa, hi mingoso yetu wika ko muyiholoka, alioze ni tembele ya zambi munene wa pwo wa Artimise mayilelesa kuli atu. Zambi yetu yoze akuwayila akwa-Azia ni akwa-yifuchi yeswe ya yashi, malela ni lufuma wenyi munene mapwa wamokomoko.”
28 Ha kwivwa chino, malunga yatenuka ni kuputuka kukololoka ngwo: “Artimise wa mu Efwesu iye Munene!”
29 Chocho, limbo lieswe liazalile too ni chizungo-zungo. Mbunga yakwata Ngayu ni Aristako Akwa-Masendoniya waze te akwenda ni Paulu yanjila hamwe no mu lwaza.
30 Paulu kazangile kunjila ni kulisolola kuli atu, alioze tumbaji kamwechele kuchilinga.
31 Chipwe akwa-kululieka yiwanyino ni yiheho waze apwile masepa jenyi, yamutumina lusango ni kumwita hanga achine kusa mwono wenyi mu ponde ha kuya ku lwaza.
32 Kashika, atu yaputuka kulivunjilila: Amwe yakololoka yiyi, akwo yakololoka yeka. Anji a kuli ayo te kanyingikine mumu liaka alikungulwile.
33 Chocho, yaachiza Alexandre mukachi ka mbunga mba A-Yunda yamushinjikila kulutwe, Alexandre yalinga chilayi ni kwoko lienyi mumu kazangile kulisambisa kuli atu.
34 Alioze, muze o anyingikine ngwo iye kali Ka-Yunda, eswe yaputuka kukololoka ni liji limuwika ha maola aali ngwo: “Artimise wa mu Efwesu iye Munene!”
35 Muze mwata wa mbonge te haholesa mbunga, yamba ngwenyi: “Enu malunga A-Efwesu, mutu muka kanyingikine ngwenyi, A-Efwesu e akwa-kufunga tembele ya Artimise munene ni kaponya kenyi yoze waholokele mwilu?
36 Yuma yino niumwe mahasa kulikalayo wakuhi. Kashika, nwatamba kulihumikiza kanda nulipupwisa.
37 Mumu malunga wano nwanehanga kuno, keyile mu matembele chipwe kushililika zambi yetu wa pwo.
38 Kashika, nyi Ndemetriu ni akwa-milimo jenyi chikuma ali nacho cha kusuma mulonga umwe mutu, eze asolole mulonga wacho. Mumu kuli matangwa waze ngaji akulikungulula, ni manguvulu tuli no.
39 Alioze nyi kuli chuma chikwo chize nunazange, chikuma chacho katamba kuchisopa kuli akwa-kuyula kulita ni shimbi.
40 Kwamba pundu, mu ponde tuli mumu mahasa kutusuma mulonga ha vunda ya musono. Chikwo nawa, kutuchi kuhasa kulisambisa ha chizungo-zungo chino.”
41 Muze te hamba yino yuma, yambila mbunga hanga alimwange.
Footnotes
^ Tala Apendice A5.
