Yilinga ya Apostolo 2:1-47
2 Ha tangwa lia Chiwanyino cha Pentekoste, o eswe apwile hamuwika muma mumuwika.
2 Susumuku, mwilu mwejile lundunjila ngwe kutakumuka cha fuji ya tachi yize yazalishile zuwo lieswe muze te anatwama.
3 O yaputuka kumona milengi ya kahia yalifwa ngwe malimi. Milengi yacho yalimwangine ni kupwa helu lia mutu ni mutu.
4 Mba eswe azalile too ni spiritu yisandu, yaputuka kuhanjika malimi eka ni eka ngwe chize spiritu yaakwashile.
5 Ha shimbu liacho, mu Yerusaleme mwapwile A-Yunda anji a ku mavungu eswe a hashi waze te akuvwila woma Zambi.
6 Kashika, muze te hevwa zungo lize, mbunga yalikungulula eswe, yalishimwoka mumu mutu ni mutu wevwile tumbaji kanahanjika mu limi lienyi mwene.
7 Kwamba pundu, atu eswe yakomoka chinji ni kwamba ngwo: “Wano eswe anahanjika hi A-Ngalileya ko nyi?
8 Mba kuchi tunevu mutu ni mutu mu limi lienyi* mwene?
9 Mumu mukachi ketu muli A-Parto, ni A-Media, ni A-Elame, ni waze atwama mu Mesopotamia, ni Yundeya ni Kapandosea, ni Ponto ni a mu mbonge ya Azia,
10 ni Fwikia, ni Pamafwilia, ni Engitu, ni a mu manjiza ja mu Libia waze alisulangana ni Serene, ni ngeji waze akatukile ku Roma, ngwe A-Yunda ni waze alipwishile A-Yunda,
11 ni A-Kreta, ni A-Arabia. Twevwa tumbaji kanahanjika mu malimi jetu yuma yakukomwesa ya Zambi.”
12 Ewa, atu eswe alishimwokene, ni kwamba umwe kuli mukwo ngwo: “Yika chino chinalumbunuka?”
13 Alioze, atu akwo aalelesele ni kwamba ngwo: “Kanazengewa ni vinyu yiyema.”*
14 Mba Petulu yakatuka hamwe ni tumbaji akwo Kumi ni Kashi yakololoka ngwenyi: “Akwetu A-Yunda ni yenu eswe waze nwatwama ku Yerusaleme, panjikenu kama maliji jami:
15 Kwamba pundu, atu wano kazengewele ngwe chize nunanyongo, mumu tuli ha ola* yamuchitatu ya chimene.
16 Alioze, chuma chino nunamono, kaliangile kuchamba kupalikila muli profeta Joele ngwo:
17 ‘“Ha matangwa a kusula,” chocho anambe Zambi ngwenyi: “Kumungukazukwila spiritu yami hali atu* eswe, mba ana jenu a malunga ni ana jenu a mapwo kumakaprofeteza, ni akweze jenu kumakamona usolwelo, ni tushinakaji jenu kumakalota yilota.
18 Ewa, chipwe hali ndungo jami a malunga ni hali ndungo jami a mapwo no kumungukazukwila spiritu yami ha matangwa aze, mba kumakaprofeteza.
19 Mungukalinga yikomokeso mwilu ni yilayi hashi, manyinga, kahia ni mwishi unji.
20 Tangwa kumulikalumuka milima ni kakweji kumakalumuka manyinga, shimbu tangwa linene lia Yehova* lia uhenya kanda liza.
21 Mba mweswawo yoze matambika ha jina lia Yehova* kumakamulamwina.’”
22 “Yenu A-Izalele, panjikenu maliji wano: Yesu Ka-Nazare kapwile mutu yoze Zambi atayijile kumeso jenu ni yikomokeso, ni yilayi yize Zambi alingile mukachi kenu kupalikila muli iye ngwe chize nunanyingika.
23 Nwamukunjikile ku moko ja yingulungulu, nwamuhachile ha mutondo wa lamba ni kumushiha kulita ni upale wa Zambi ni chize iye atesele.
24 Alioze, Zambi hanamutusula* ku yikola ya kufwa ha kumuhindwisa, mumu kufwa kuchahashile kumukwata nawa.
25 Mumu Ndawichi kambile hakutwala kuli iye ngwenyi: ‘Nakusa Yehova* kumeso jami matangwa eswe, mumu iye kali ku chindume chami hanga chichi katekenga nilimwe tangwa.
26 Kashika, mbunge yami kuyinevu chiseke, limi liami linawahilila. Mungutwama* ni kutalatala;
27 mumu kuchi kangwecha* mu Fuka,* chipwe kwecha mujimba wami upole mumu nashishika kuli yena.
28 Hiunangunyingikisa majila a mwono; mukanguzalisa ni chiseke kumeso je.’
29 “Mandumbu, ngutayizenu kama nguhanjike kuli yenu hakutwala kuli kalamba Ndawichi ngwami, iye kafwile mba yamufunda, chipwe fuka lienyi lili mukachi ketu ndo musono.
30 Se iye wapwile profeta, mba wanyingikine ngwenyi, Zambi walishingile kulu kuli iye ngwenyi, makatwamisa umwe wa ku munyachi* wenyi ha ngunja.
31 Iye kaliangile kuhanjika hakutwala ku uhindukilo wa Kristu ngwenyi, te kechi kamuvulama mu Fuka,* chipwe mujimba wenyi te kuuchi kupola.
32 Eswe tuli yela ngwetu, Zambi kahindwishile Yesu.
33 Kashika, hanamunangamisa ku kwoko lia chindume lia Zambi, hanatambula nawa kuli mwe Tata chilakenyo cha spiritu yisandu, chipwe yuma yize nunevu ni yize nunamono yili yitanga ya spiritu yisandu.
34 Mumu Ndawichi kakazezukile mu malilu, alioze yamba ngwenyi: ‘Yehova* hanambe kuli Mwene wami ngwenyi: “Twama ku kwoko liami lia utata,
35 ndo muze mungukasa akwa-kole je kushi lia yiliato ye.”’*
36 Kashika, munyachi weswe wa A-Izalele pwenu ni shindakenyo ngwenu, Yesu yoze nwahachile ha mutondo wa lamba, Zambi hanamupwisa Mwene kanda Kristu.”
37 Muze atu evwile chino, alipikalile mu mbunge mba yamba kuli Petulu ni apostolo akwo ngwo: “Mandumbu, yika twatamba kulinga?”
38 Petulu yamba kuli ayo ngwenyi: “Mutu ni mutu hakachi kenu katamba kulikonyeka ni kumupapachisa mu jina lia Yesu Kristu, ha ukonekeno wa shili yenu, mba munukatambula chawana cha spiritu yisandu.
39 Mumu chilakenyo chino, chili cha yenu, ni cha ana jenu, ni cha eswe waze ali kusuku, eswe waze Yehova* Zambi yetu matambika kuli iye.”
40 Iye wambujolwele kanawa sango jipema ni kwakolweza ngwenyi: “Lilamwinenu ku chisemuko chino cha uhenge.”
41 Hohene, waze atayijile maliji jenyi ni uwahililo yaapapachisa. Ha tangwa lize atu* 3,000 yalichinga no.
42 Yalihana chinji ha kwivwa longeso lia apostolo, ni kuliendela* umwe ni mukwo, ni kulila hamuwika, ni kulemba.
43 Apostolo alingile yikomokeso yinji ni yilayi, chocho atu* eswe aputukile kuvwila Zambi woma.
44 Atu eswe waze afulielele apwile hamuwika ni kulianyina yuma yeswe yize apwile nayo,
45 yalanjisa yuma ni yikumba yo, yalitetela mbongo jacho kulita ni kuhona cha mutu ni mutu.
46 Mba tangwa ha tangwa alikungulwile mu tembele ni mbunge yimuwika. Alile ku mazuwo ja umwe ni mukwo ni kulianyina kulia cho ni uwahililo ni kutuwika cha mbunge.
47 Yahalisa Zambi ni kuwana vumbi kumeso ja atu eswe. Chikwo nawa, tangwa ha tangwa Yehova* wawezelele ku mbunga yo atu waze te analamwina.
Footnotes
^ Hanji “mu limi lize twasemukine nalio?”
^ Hanji “ni vinyu yaha.”
^ Ha ola 9:00 ya chimene.
^ Chize Alisonekene, “musunya weswe.”
^ Tala Apendice A5.
^ Tala Apendice A5.
^ Kota nawa, “mu ngoji.”
^ Tala Apendice A5.
^ Chize Alisonekene, “musunya wami muukahwima.”
^ Hanji “alma yami.”
^ Chize Alisonekene, “umwe mwana wakusemuka ku mutanda wenyi.”
^ Tala Apendice A5.
^ Hanji “ngwe chuma cha kunangika molu je.”
^ Tala Apendice A5.
^ Hanji “alma.”
^ Hanji “kulianyina.”
^ Hanji “alma jeswe.”
^ Tala Apendice A5.
