Yilinga ya Apostolo 22:1-30
22 “Mandumbu ni atata, ivwenu haliapwila liji liami lia kulisambisa kuli yenu.”
2 Muze amuvwile kanahanjika kuli ayo mu limi lia Hepreu, yaahola kuluu kuhiana, mba Paulu yamba ngwenyi:
3 “Yami nguli Ka-Yunda nasemukinyine ku Tarsu mbonge ya Selishia, alioze angulelele mu mbonge yino, angulongesele kuli Ngamaliele, nalongolokele kulita ni Shimbi ya tulamba twetu. Nalihanyine chinji kuli Zambi ngwe chize yenu eswe nunalingi musono.
4 Nahungumionene Akwa-Jila yino ndo ku kufwa, ni kukasa ni kusa malunga ni mapwo mu mazuwo a ususu,
5 mwata wa asasendote ni makulwana eswe kali yela ha chikuma chino. O nawa kanguhele mikanda hanga nguyitwale kuli tusongo twa A-Yunda ku Ndamaseku. Nayileko ni kukwata waze apwile ko ni kwaneha mu Yerusaleme hanga aalambe.
6 “Shimbu te nguchili mu wenyi, muze te ngunakundama ku Ndamaseku ha muchima tangwa, susumuku kwahenyene limwe pangu kukatuka mwilu lize liangujingilikile.
7 Chocho yingulimbukila hashi, mba yingwivwa liji lize liangwambile ngwo: ‘Saulu! Saulu! Mumu liaka unanguhungumiona?’
8 Yingumukumbulula ngwami: ‘Yena iya?’ Iye yamba ngwenyi: ‘Yami Yesu Ka-Nazare, yoze unahungumiona.’
9 Malunga waze apwile hamwe ni yami kamwene pangu, alioze kahashile kwivwa liji lia yoze te unahanjika ni yami.
10 Mba yingumuhula ngwami: ‘Mwene yika natamba kulinga?’ Mwene yangukumbulula ngwenyi: ‘Katuka hanga uye ku Ndamaseku, kwenako makakulweza yuma yeswe yize hanakusela kulinga.’
11 Alioze amu chakahashile kumona nichimwe mumu lia pangu lize, waze apwile hamwe ni yami, yangukwata ku kwoko yangutwala ndo ku Ndamaseku.
12 “Chocho umwe lunga avuluka ngwo Ananiya, yoze wakuvwila Zambi woma ni kukaula Shimbi jenyi, yoze nawa A-Yunda eswe a mu chihela chize akwamba yuma yipema hali iye,
13 yeza kuli yami. Yakundama hakamwihi ni kungwamba ngwenyi: ‘Ndumbwami Saulu, laula ku meso!’ Ha ola yizeyene yingulaula ku meso* yingumumona.
14 Iye yamba ngwenyi: ‘Zambi ya tulamba twetu, hanakutongola hanga unyingike upale wenyi, ukamone mwe mukwa-ululi, Yesu ni kwivwa liji lienyi,
15 mumu kumukapwa chela chenyi kuli atu eswe ha yize hiwamona ni ha yize hiwevwa.
16 Haliapwila yika unashimbwila? Katuka akupapachise, mba Zambi makonekena shili ye nyi mutambika ha jina lia Yesu.’
17 “Alioze muze nahilukile ku Yerusaleme te ngunalembe mu tembele, yingumona umwe usolwelo.
18 Mwene yamba kuli yami ngwenyi: ‘Lipupwise ukatuke ni kawashi mu Yerusaleme, mumu atu kechi katayiza uchela we hakutwala kuli yami.’
19 Yingwamba ngwami: ‘Mwene, ayo kananyingika kanawa ngwo, napwile ni kuya mu sunangonga ni sunangonga ni kukwata ni kulamba waze te akufuliela muli yenu.
20 Muze amwangine manyinga ja chela che Eshetevau, ni yami napwileho ni kutayiza ni kufunga mazalo ja waze te anamushihi.’
21 Iye yamba kuli yami ngwenyi: ‘Yako, mumu mungukutuma kusuku kuli akwa-mavungu.’”
22 Atu yaapanjika Paulu ndo ha maliji wano. Mba yaakololoka ni liji linene ngwo: “Shihenu mutu yono, mumu katambile kutwama ni mwono!”
23 Shimbu te machikololoka, nikumbila mazalo jo ni kukuwa mavu mu tetela,
24 mwata wa maswalale yatuma kutwala Paulu mukachi ka chilombo cha maswalale ni kwalweza hanga amusopese ni kumulamba, hanga anyingike mumu liaka atu te anakololoka hakutwala kuli iye.
25 Muze te hamukasa hanga amulambe, Paulu yahula kapitau ka maswalale yoze wapwileho ngwenyi: “Shina chinalite ni shimbi kulamba umwe Ka-Roma shimbu kanda amusopesa* nyi?”
26 Kapitau hakuchivwa, yaya ni kulweza mwata wa maswalale ngwenyi: “Yika unanyongo kulinga? Lunga yono kali Ka-Roma.”
27 Chocho, mwata wa maswalale yakundama kuli iye ni kumuhula ngwenyi: “Ngulweze, shina yena uli Ka-Roma nyi?” Iye yamukumbulula ngwenyi: “Ewa.”
28 Mba mwata wa maswalale yamba ngwenyi: “Yami nafwetele mbongo jinji hanga ngupwe Ka-Roma.” Paulu yamukumbulula ngwenyi: “Alioze yami nasemukine Ka-Roma.”
29 Hazehene malunga waze ambile kumulamba ni kumusopesa, yamwecha. Mwata wa maswalale wevwile woma unji ha kunyingika ngwenyi Paulu kali Ka-Roma, chikwo nawa ngwo kamukashile ni malenge.
30 Mwata wa maswalale yazanga kunyingika pundu chikuma chize A-Yunda asuminyine Paulu mulonga. Kashika muze hikwacha, yamujitula ngoji yahana shimbi kuli asasendote a lutwe ni mbunga ya ngaji ja A-Yunda hanga alikungulule. Mba yaneha Paulu mushi yamumanyisa mukachi ko.
