Yilinga ya Apostolo 23:1-35
23 Paulu yahulikila meso jenyi kuli Akwa-Kuyula, ni kwamba ngwenyi: “Mandumbu, hingunende ni mbunge yitoma kumeso ja Zambi ndo ha tangwa lia musono.”
2 Alioze, mwata wa asasendote Ananiya yambila waze te ali hamwe nenyi amulambe ku kanwa.
3 Paulu yamba kuli iye ngwenyi: “Chilembekese,* Zambi makakulamba. Unatwama hanga ungusopese kulita ni Shimbi, alioze yena mwene unashihi Shimbi ha kutuma hanga angulambe, nyi?”
4 Waze apwileko yamba ngwo: “Yena unatuku mwata wa asasendote wa Zambi, nyi?”
5 Paulu yakumbulula ngwenyi: “Mandumbu jami, te chanyingikine ngwami kali mwata wa asasendote. Mumu hichinasonewa ngwo: ‘Kanda ukahanjika chipi hali mukwa-kuyula atu je.’”
6 Muze Paulu anyingikine ngwenyi chihanda chimwe chapwile cha A-Satuseu chikwo cha A-Fwariseu, yakololoka mukachi ka Akwa-Kuyula ngwenyi: “Mandumbu, ami nguli Ka-Fwariseu, mwana wa A-Fwariseu. Kanangusopesa mumu lia kutalatala cha uhindukilo wa afu.”
7 Muze te hamba chino, kwapwile chizungo-zungo hakachi ka A-Fwariseu ni A-Satuseu, mba chizavu cheswe chalihandunwine.
8 Mumu A-Satuseu kakwamba ngwo, kukushi uhindukilo wa afu, chipwe angelo, chipwe spiritu. Alioze A-Fwariseu kakutayiza yino yuma yeswe.
9 Kwapwile zungo linene, mba amwe alongeshi a shimbi a kuli A-Fwariseu, yakatuka ni kulihangulula chikolo ngwo: “Kutwawanyine upi muli mutu yono, nyi spiritu hanji mungelo hanahanjika nenyi—.”
10 Yikupwa vunda yinji, mwata wa maswalale yevwa woma unji ngwenyi hanji matanuna Paulu yihanda-yihanda. Kashika, yahana shimbi kuli tujita twenyi hanga apalumuke mukachi ka mbunga achize Paulu mukachi ko ni kumutwala mu chilombo cha maswalale.
11 Ha ufuku uzewene, Mwene yasoloka kuli Paulu ni kumwamba ngwenyi: “Hamuka! Mumu ngwe chizechene hiwambujola kanawa mu Yerusaleme hakutwala kuli yami, chizechene nawa chakutamba kwambujola ku Roma.”
12 Muze te hikwacha, A-Yunda yatwama punga ni kulishinga ngwo, kutuchi kulia chipwe kunwa ndo haze mutushihila Paulu.
13 Atu waze alishingile kapwile malunga kuhiana 40.
14 Malunga wano yakatuka yaya kuli asasendote a lutwe ni kuli makulwana ni kwamba ngwo: “Yetu hitunalishingi ni shingo lino ngwetu, kutuchi kulia nichimwe ndo haze mutushihila Paulu.
15 Kashika, haliapwila livwenu ni Akwa-Kuyula nuhanjike kuli mwata wa maswalale ngwenu, anehe Paulu kumeso jenu ni kusolola ngwe, nunazange kuhengwola kanawa mulonga wenyi. Yetu yitwalilulieka kulu hanga tumushihe shimbu kanda aheta kuli yenu.”
16 Alioze, mwihwa wa Paulu yevwa yize o alitesele kulinga, chocho yanjila mu chilombo cha maswalale yalweza Paulu yuma yeswe.
17 Mba Paulu yasanyika kapitau wa maswalale yamba kuli iye ngwenyi: “Twala mukweze yono kuli mwata wa maswalale mumu chimwe anazange kumulweza.”
18 Iye yamutwala kuli mwata wa maswalale ni kumwamba ngwenyi: “Funge Paulu kangusanyikanga ni kungulembejeka hanga ngukunehene mukweze yono, mumu chimwe alinacho chize anazange kukulweza.”
19 Mwata wa maswalale yamukwata ku kwoko yamutwala ku tenga ni kumuhula ngwenyi: “Yika unazange kungulweza?”
20 Mukweze yakumbulula ngwenyi: “A-Yunda kalitesa kukulembejeka hanga hamene utwale Paulu kuli Akwa-Kuyula. O masolola ngwe kanazange kunyingika kanawa mulonga wenyi.
21 Kashika kanda nwatayiza, mumu kuli malunga kuhiana 40 waze atesa kumujikinyina. O hanalishingi ngwo, kutuchi kulia chipwe kunwa, ndo haze mutumushihila. Haliapwila halilulieka, kanatwaminyina kumbululo lienu.”
22 Chocho, mwata wa maswalale yalishika ni mwe mukweze ni kumutoweza ngwenyi: “Kanda wambulwila niumwe ngwe wangulweza chikuma chino.”
23 Mwata wa maswalale yasanyika tupitau aali ni kwamba ngwenyi: “Luliekenu 200 a tujita ni 70 waze akwenda ha tuvwalu ni 200 a akwa-makunga hanga nuye ku Sezarea ha ola yamuchitatu ya ufuku.*
24 Luliekenu nawa tuvwalu haze Paulu mendela hanga numutwale kanawa ndo kuli nguvulu Fwelishia.”
25 Iye yasoneka mukanda uno ngwenyi:
26 “Yami Kelautiu Lishia ngunanusonekena yenu nguvulu Fwelishia, Mulemu Wahiana. Tambulenu mwoyo!
27 Lunga yono kanakamukwata kuli A-Yunda ni kufupa kumushiha. Muze nachivwile yinguzomboka ni maswalale jami yingumupulula, mumu nevwile ngwo, iye kali Ka-Roma.
28 Yinguzanga kunyingika chitela chize amusumine, kashika namutwalile kuli Akwa-Kuyula jo.
29 Yingumona ngwami, kalingile nichimwe chuma chipi chakutela kufwa chipwe kumusa mu zuwo lia ususu. Alioze hamusuma mulonga mumu lia chikuma cha Shimbi jo.
30 Mba muze hangulweza ngwo lunga yono kanamutwama punga, kashika namutuma ni kawashi kuli yenu ni kwita hanga atu waze anamusumu mulonga anulweze chize amulinacho.”
31 Chocho, kulita ni shimbi yize maswalale atambwile, yakwata Paulu yamutwala ha ufuku uze ndo ku Andepatri.
32 Mba muze te hikwacha, yahichika akwa-tuvwalu kuya hamwe nenyi, akwa-kwenda hashi yahiluka ku chilombo cha maswalale.
33 Akwa-tuvwalu yaheta ku Sezarea yahana mukanda kuli nguvulu ni kukunjika Paulu kumeso jenyi.
34 Chocho, nguvulu yatanga mukanda ni kuhula nyi te Paulu wa ku mbonge yika. Yamulweza ngwo wa ku Selishia.
35 Nguvulu yamba ngwenyi: “Mungukakwivwa muze akwa-kukusuma mulonga makaheta.” Mba yahana shimbi hanga amufunge mu palasiu ya Heronde.
