Yilinga ya Apostolo 25:1-27
25 Muze Fesetu ahetele mu mbonge ni kuputuka kuyula, hakupalika cha matangwa atatu yakatuka ku Sezarea yaya ku Yerusaleme.
2 Miata a asasendote a lutwe ni malunga alemu ja A-Yunda yasolola kuli Fesetu yuma yize asumine nayo Paulu. Ni kuputuka
3 kumwita hanga aakwase kama kuneha Paulu mu Yerusaleme. Alioze o te halitesa kujikinyina Paulu hanga amushihile mu tapalo.
4 Mba Fesetu yaakumbulula ngwenyi, Paulu te katamba kununga ku Sezarea mu zuwo lia ususu, chipwe iye mwene te mahilukilako ni kawashi.
5 Kashika yaalweza ngwenyi: “Waze ali ni chiyulo hakachi kenu, akapalumuke hamwe ni yami, nyi yono lunga kalinga chimwe chuma chipi akamusume mulonga.”
6 Muze te hatwama matangwa nake hanji kumi hakachi ko, yapalumuka ku Sezarea. Mukwachako, yatwama ha chitwamo cha upatwilo mba yatuma kuneha Paulu.
7 Muze Paulu anjilile, A-Yunda waze akatukile ku Yerusaleme yamujingilika ni kuputuka kumusuma yitela yinji yikalu yize te kechi kuhasa kushindakenya ngwo, yili yamwenemwene.
8 Alioze Paulu yalisambisa ha kwamba ngwenyi: “Chalingile shili niyimwe hakutwala ku Shimbi ja A-Yunda, hakutwala ku tembele, chipwe kuli Sezare.”
9 Fesetu yazanga kupwa ni utayizo wa A-Yunda, chocho yambila Paulu ngwenyi: “Unazange kuya ku Yerusaleme hanga akakusopeseleko hakutwala ku yino yuma kumeso jami nyi?”
10 Alioze Paulu yamba ngwenyi: “Nguli kulutwe lia chitwamo cha upatwilo cha Sezare, kuze atamba kungusopesela. Chalingile nichimwe chuma chipi kuli A-Yunda ngwe chize yenu nguvulu nunanyingika kanawa.
11 Nyi ngunakalinga chipi hanji mulonga umwe wakutela kufwa, kachi chalitunyine kufwa, alioze nyi mulonga uze anangusumu hi wamwenemwene ko, niumwe uli ni ulite wakungukunjika ku moko jo wakuhi. Kashika ngunaliumbu hanga mulonga wami akausope kuli Sezare!”
12 Chocho muze te Fesetu hahanjika ni chizavu cha akwa-kuyula, yakumbulula ngwenyi: “Waliumba hanga uye kuli Sezare, kashika kuli Sezare mwoya.”
13 Hakupalika cha amwe matangwa, mwanangana Akripa ni Mberenise yeza ni kumeneka Fesetu mu Sezarea.
14 Amu mwanangana te matwamako amwe matangwa, Fesetu yamulweza mulonga wa Paulu ngwenyi:
“Tuli ni umwe lunga kuno yoze Fwelishia ahichikile ngwe funge.
15 Muze napwile mu Yerusaleme, miata a asasendote ni makulwana ja A-Yunda yangunehena sango hakutwala kuli iye, ni kungwita hanga ngumuhise.
16 Alioze yingwakumbulula ngwami, hi ndako ya A-Roma ko kukunjika mutu yoze anasumu mulonga, shimbu kanda achiliwana meso ni meso ni waze anamusumu, hanga apwe ni uhashi wa kulisambisa hakutwala ku mulonga uze anamusumu.
17 Mukwachako muze o ahetele kuno, yingutwama ni kawashi ha chitwamo cha upatwilo ni kutuma hanga angunehene lunga wacho.
18 Mba muze akwa-kumusuma hakatuka hanga ahanjike, kamusumine mulonga niumwe upi ngwe chize yami nanyongene.
19 O kapwile ni kulihamika nenyi mumu lia uwayilo* wo ni mumu lia umwe lunga avuluka ngwo Yesu yoze wafwile, alioze Paulu washindakenyene ngwenyi uchili ni mwono.
20 Shimbu te munguchikakajana ha chize mungusopa milonga yino, yinguhula Paulu nyi te kanazange kuya ku Yerusaleme hanga akamusopeseleko ha milonga yize.
21 Alioze muze Paulu aliumbile hanga anunge mu zuwo lia ususu, ni kushimbwila chiyulo cha Augustu,* yinguhana shimbi hanga atwame mu zuwo lia ususu ndo muze mungumutuma kuli Sezare.”
22 Chocho Akripa yambila Fesetu ngwenyi: “Ni yami nawa ngunazange kwivwa yono mutu.” Fesetu yamba kuli iye ngwenyi: “Hamene mukamwivwa.”
23 Kashika muze hikwacha, Akripa ni Mberenise yaheta ni uhenya unene yanjila mu chota cha usopelo hamwe ni tupitau a maswalale ni malunga alemu a mu mbonge. Chocho, muze Fesetu ahanyine shimbi, yaneha Paulu.
24 Mba Fesetu yamba ngwenyi: “Mwanangana Akripa ni yenu eswe nuli hano ni yetu nunamono mutu yono, mbunga yeswe ya A-Yunda chize ku Yerusaleme ndo kuno angwichile ni kukololoka ngwo, iye katambile kununga ni mwono.
25 Alioze yingumona ngwami, kalingile nichimwe cha kutela kufwa. Mba muze aliumbile hanga ngumutume kuli Augustu yingutayiza kumutumako.
26 Chishi nichimwe chikuma chakusonekena Mwene wami Sezare hakutwala kuli iye. Kashika hinamuneha kumeso jenu ni kuhiana chikolo kumeso jenu Mwanangana Akripa, hanga muze hitwamusopesa, ngukapwe ni chuma chimwe chakusoneka.
27 Mumu ngunanyingika ngwami, kuchalitele kutuma funge chakuhona kulumbununa chitela chize anamusumina mulonga.”
